Hawẽ haibu Bildadẽ haska shinaĩ Jó yusĩrianikiaki, na hãtxarã
8
1-2 Elifazĩ hãtxashũkĩ merabewakatsi ibiahawẽ hãtxa ikũ kayabimakẽ Jó danãkĩ nĩkashunama inikiaki.
Hanushũ huni betsa Suá anua Bildadẽ Jó yuikĩ:
“Na haska hãtxakĩ mĩ yuikubainairã,
hatiã mĩ neseshanai?
Mĩ hãtxarã, niwewã kushipa shũku ikai keska besti mĩ waii.
3 Deus kushipahaira dasibi binuatũ hawara haska betxipaimisrã, betsa waismaki.
Hawẽ yunuti kushipa yununi kanekĩ hawa betsa waismariki.
4 Eã ẽ unanã, txanima mĩ bakebũ Deuskiri txakabuwaimabuwẽ taeshũ
Deusũ haska betxipaiama hatu kupimaki.
5-6 Haskawẽ taeshũ Deus kushipahaira dasibi binua benariwe,
hau miwẽ nuinũ haskakiri yukakubaĩkinã.
Mĩ haska hiwei pepakĩ uĩmaya hawẽ pepawẽ mia merabewakĩ
hawara sharabu mĩ ma benuima mia ana inãshanikiki.
7 Ha mabu mĩ hayaimarã, hawama keska mĩ hayaimaki.
Hakia ha binumakĩ txipu mirima ana mia inãtiruki.
8-9 Nukurã, nũ dama kaĩshinaki,
hawa unãmarã.
Nukũ shenipabu uatiã hiwekubiranibu miyui nĩkakĩ
nukũ hutxiburi yukakĩ
habias ẽ miki txaniai miãri mĩ tapĩtiruki.
10 Nukũ shenipabu ma mawabianibũ
hatũ hãtxa nĩkakĩ itxapa mĩ tapĩkubaĩtiruki.
11 Hanira hene kesha anu ha basi betsa shatxiwã
hukuĩ ewamiski.
12 Hakia kaniriama tsuã meshteamabia
hene netsuaya hawaira shanamiski.
13 Haska keskai huni txakabubũ Deuskiri ana shinãma
ha basi betsa shatxiwã hene hayamakẽ
shanamis keskai hatũ shinã benumisbuki.
14 Harakirira shinãkĩ mestẽwãkatsis ibiamisburã, babuhairabuki,
basnẽ purũ hawẽ yumẽ babuhaira beshemis keskaburã.
15 Tsuabura unanuma hiwekĩ mestẽwãkatsis ibiai
hawa kushipa hayabumaki,
basnẽ purũ yumẽ beshea kushipama keskaburã.
16-17 Huni txakabuburã, basi hemaĩtĩ anu hukuĩ beshekaini
barĩ yume wa hawẽ tapũ txaipa mishkiki beshebiaibũ
18 tsuara hushũ ha basi hanua meshashina tsuã unãtirumaki.
19 Haska keskai huni txakabubu
hamapai dasibi hayabiashina keyumiski.
Hakia hawẽ shãtukũ basi
betsa ana benemis keskai
huni txakabu betsaburi ana hiwetiruki.
20 Deusũnã, yurabũ hawa txakabuwaisbuma
merabewakĩ hawa hatu heneismaki.
Hakia hunibu txakaburã, hawa hatu merabewakĩ benimawaismaki.
21 Hamẽ miarã, Deusũ ana mia benima inãkĩ
mia usãmakĩ sai sai imashanikiki.
22 Hakia miki sinatamisbu Deusũ hatu dakewakĩ
ha huni txakabu hawenabube hiwea yamawashanikiki”, akaya