5
yuikĩ: “Jó, haratu nai tsumã mia merabewakĩmia kemaimẽkaĩ? Hatu sai atã manawe.
2 Tsuabũra yura betsã mabu uĩ hawẽ kemui inũ
tsuabura hawaira sinatai unaĩsmapai debumisbuki.
3 Huni betsa mabu paipaimayakĩ hatu binuai ẽ uĩmiski.
Hakia txipu ha huni unaĩsmapa hawenabube hiwea
hawaira dasibi habu yamai keyuimabuki.
4 Hanua hawẽ bakebu hiweyuabu tsuã hatu merabewatima hiweabu
shanẽ ibubu itxashũ hatu itxakawakĩ beparãtã
ana tsuã hatu nemashũtirumawẽ taeshũ
5 hatũ bai anua hatũ yunu bunikĩ hatu biãkĩ
musha anu mapubiakẽ bishũ hatu piãkĩ keyuabu
ha inũ, hatũ inabu inũ hatũ mabu bianũ ika
hawẽ kemui hatuki sinatakubainimabuki.
6 Mai anua txakabu hamebi kaĩsmaki.
Hawara bika betsa mai anua hamebi tashnismariki.
7 Haska karu kuabu hawẽ dekẽ sa imis keskakĩ
yurabũ txakabu tuekĩ bika betsa betsapa hatu tenemakubaĩmisbuki.
8 Mĩ teneai keska eã tenekinã, hau ea merabewakĩ pewanũ
Deus anu ẽ txĩtũkeanaii.
9 Hatunã, haska tsuã atirumahaira hatu haba imakĩ
hawara sharabu itxapa Deusũ akubaĩmiski.
10 Mai anu Deusũ ui imakĩ yunumiski,
nukũ bai anu yunu txa akinã.
11 Habu keĩsbuma shinã pepabu Deusũ hatu shanẽ ibu wamiski.
Bika teneaibu hanira pashawakĩ
hanu pe hiwetirubu anu Deusũ hatu pe arumiski.
12 Unanepa hãtxai yubakai parananaĩbu
hatũ shinã hamẽ wãkĩ Deusũ hatu txakabuwamakĩ
hatu itimaska wamiski.
13 Huni unanepa hawẽ shinã txakabuwẽ yubakai parananãmisbu
Deusũ hatu beshtemiski.
14 Huni txakabubu bariri mapubiarã, bekũ kai
me me akubainaibu meshu bekĩ hatu atxia keskabuki.
15 Huni betsa hãtxa kushipa nupe kenuhaira keskawẽ
hãtxakĩ hatu nuitapa wakĩ hatu itxakawabiaibũ
Deus hatuwẽ nuikĩ hatu nemashũmiski.
16 Deusũnã, huni babubu merabewakĩ hatu shinã txãkãwãkĩ
ha itxakanikabũ kesha hatu hãbepukĩ nesewamiski.
17 Hau hiwei penũbũ yusĩkĩ
tsuara Deusũ hatu nemakubaina shinã txãkãmisbuki.
Haskawẽ taeshũ Deus kushipahairatũ mia nemai hawẽ hãtxa hawa danãyamawe.
18 Ha dikabi ibubis Deusũ mia deteshũ ha mĩ dete habiatũ mia neashanikiki.
Hawẽ mekẽwẽ mia detekĩ txakãshũ ibubis Deusũ mia shusha watiruki.
19 Hawẽ yusĩti hãtxa mĩ nĩkakĩ txibãkubainaya
mia mese mese wakĩ mia bika tenemaibu
Deusũ hatu mia nemashũshanikiki.
Hawa txakabu hau miki nukuyamanũ
haska wakĩ Deusũ mia ashũkubaĩshanikiki.
20 Piti hayama buni mawabaunaibũ
Deusũ mia merabewakubaina mĩ mawama ishanaii.
Ha inũ, hanu detenameaibutiã nupe txaipawẽ mia detenũ ika ibiaibũ
Deusũ hatu mia nemashũshanikiki.
21 Mikiri txakabu yuikĩ mia yuaĩbu Deusũ mia nemashũshanikiki.
Mia haska nemashunaya mese atimapahaira hubiaya mĩ dateama ishanaii.
22 Buni teneaibu inũ hamapai txakabu tashnibiabiranaya mĩ usã bestishanaii,
yuinaka pianãbuki hawa hatuki meseamarã.
23 Mĩ shekiwã trigo bai anu
mishki kaĩkĩ mia itimaska wama ishanikiki.
Ha dikabi yuinaka pianãburã, mĩ ina pepa keska
ikubaĩshãkanikiki, mia hawa mese wamarã.
24 Minabu mibe hiweabu unanuma pe hiwei mabu itxapa hayakubaĩshãkanikiki.
Hanua mĩ inabu dasibi mĩ mekea mĩ pe uĩkubaĩshanaii,
hawa betsa benuamarã.
25 Mĩ bababurã, pai itxapahairashãkanikiki,
bai anu basi mirimahaira benei pamis keskairã.
26 Anibuhairai mĩ ma mawa kemabia kushipai mĩ benimakũkaĩshanaii,
shekiwã trigo ma hushĩhaira tsekamisbu keskairã.
27 Nukunã, haska nũ uĩkubaĩmis nũ ma tapiãki. Txanima habiaskaki.
Na haska nĩkakĩ ibubis mĩtsiri unãti wakĩ tapĩkubaĩwẽ”, akaya