Hawẽ hiwea txakabuhaira Jó tenekubaĩshinakiri hatu yui ha inikiaki, na hãtxarã
3
1-2 7 shaba inũ meshu habiatiri binuayaJó hãtxai taekĩ hanu kaini shinaĩ hãtxa txakabukĩ yuikĩ:
3 “Ha meshu merã ẽ ewa inũ ẽ epã ea bikĩ nanenibu txakabuhairaki.
Ha shabatiã ẽ hanu kaini txakabuhairariki.
4 Ha shaba ẽ kaiaĩtianã, Deusũ hawa ekiri shinãma
meshu besti wakẽ penama ikeaniki.
5 Ha shaba ẽ kaiaĩtiã meshuhairatũ shaba bepukĩ keyua
nai kuĩ meshuhairatũ bepukĩ ushe hunei meshukẽ
dasibibu datehairakeanibuki.
6 Ha meshu merã ẽ ewa inũ ẽ epã ea bikĩ naneaibũ
kini meshuhaira anu ha meshu benua pe ikeaniki.
Haskakẽ ha hanu ẽ kaini calendario
hawẽ dia inũ, hawẽ mes inũ, hawẽ ano hawa tanabuma inibu pe iriakeanaii.
7 Hanu ẽ kaini shabatiã hau hanu besi benimai
sai sai iyamanũbũ, ishũ ẽ shinaiĩ.
8 Tsatsakapetãwã ewapa mukayabũ
hatũ kushipawẽ yunumisbũ
hanu ẽ kaiaĩtiã habũ yupuniburã, pe ikeanaii.
9 Pena kemaya pena bishi txashaya bari tashni hawẽruai taeaya
hanu ẽ kaiaĩ tsuã ea datxukĩ uiãma ini pe ikeanaii.
10 Txakabu mekĩ uĩ ẽ isĩ tenehairai
ẽ kaiaĩ ea nemama iniwẽ taeshũ
ha meshu merã ẽ kaini txakabuhairaki.
11 Haskai ẽ mawama inimẽ,
ẽ ewã bake nãti meranua kasmai ẽ kaĩ taeirã?
12 Hanua ẽ kaiaĩ, haskakĩ aĩbu betsã
hawẽ dãtũku dabewẽ ea kebẽtã ea binimẽ?
Haskakĩ ẽ ewã hawẽ txutxu amakubaĩkĩ ea yume wanimẽ?
13-15 Hamẽ kaĩtãs ẽ mawayamarã,
shanẽ ibuhairabu inũ hatũ merabewanikabubetã
mishki hiwe ewapa keyatapa hatu wamanibu anu hatu maiwamisbu anu inũ,
yununikabu betsã hatũ mishki hiwe ewapa hawẽrua watã
ouro mane inũ prata mane arukĩ mata watã
hatu maiwamisbube ẽ hatube daka
unanuma huĩrukuĩ pepakeanaii.
16 Aĩbu bake kaũma inũ hawẽ ewã bake nãti anua kaĩriama
ibubis mawa maiwa keska wakĩ eari kaĩtã ẽ hiwebiakẽ
haskakĩ ẽ ibuã ea maiwama inimẽ?
17 Mawa hanu hatu mai wamisbu anu ha pubẽbũ ana hatu bika watirubuma inũ
nuitapai hĩ imisbu ana hawama huĩrukũtirubuki.
18 Habiaskariai yura betsa atxibaĩ hatu dayamakĩ yunutxakayamisbu ma hatu tenãburã,
ana hatũ dayamanikã hui sai ikaibu hawa ana hatu nĩkama pes dakashãkanikiki.
19 Habianuri mabuyanibu inũ nuitapanibu ana haskama dasibi habiaska dabes ishãkanikiki, mawairã.
Ha inũ, huni betsã hatu tsuma wakĩ escravo wanibu henebaini ana hatũ tsumama ishãkanikiki.
20 Nuitapai yumeshanaibu haskakĩ Deusũ shaba uĩmakĩ kaĩmamismẽ?
Huĩti nishmai hiwekũkaĩshanai
haskakĩ Deusũ hatu hiwemamismẽ?
21-22 Haska keskabu mawa manairã,
pei itxapa hanira hunea bena txakayamamis keskabuki.
Hakia ha huni benimairã, atimas mawaitiã
haska hãtxamis uĩ benimakubaĩmisbuki.
23 Haskakĩ habu Deusũ baiwẽ hiwekatsi ikaibu
Deusũ hatu bika tenemakĩ
hawẽ kushipawẽ hatu kebeãmẽ, hawauma wakinã?
24 Ẽ isĩ tenehairai mei ẽ eẽ ikairã, txanima ẽ piti keskaki.
Ẽ isĩ tenehairai hãtxai ẽ ari ari ikairã, harã, ẽ nushuti keskaki.
25 Dasibibu hawarawẽ ẽ mesemis inũ ẽ hawẽ datehairamis
ma habu beshũ ea atxiaki.
26 Pes ẽ huĩrukũtirumaki.
Shaba inũ meshu merã dabekea akeakei
unanuma ẽ dakatirumaki”, hatu waya