Senhor Deusũ Samuel hãtxa wanikiaki, na hãtxarã
3
Elĩ yunua Samuel Senhor Deus dayashũkũkainaya habiatiãri haska tashnimakĩ Senhor Deusũ tsua hawẽtsaĩs hãtxa waisma inũ hatiraki tsuara shabakabi namai keskawẽ hatu uĩmakĩ hawẽ hãtxa hatu yuisma 2 Elĩ beru betsai ma beshushi taekĩ ana pe uiãmakẽ meshu betsatiã hawẽ dĩtu anu ma ushakẽ 3 Senhor Deuski nukuti tari hiwe pũtenibu anu hanu hawẽ hatube yubakani hãtxa aruni bau aruabu inũ hanu dĩtu tari meribi anuri bĩ nukaisma anu Samuel daka ushakẽ 4 hanushũ Senhor Deusũ kenakĩ:—Samuel!— aka
hatũ kemakĩ:
—Ma ẽ huai hawamẽkaĩ ea yuiriwe— aka
Elĩ kemakĩ yuikĩ:
—Ẽ mia hawa kenamaki. Ushari kawe— aka
—Samuel!— aka
Samuel benikaini ana Eli anu kashũ yuikĩ:
—Ana ẽ huai hawamẽkaĩ ea yuiwe— aka
Elĩ ana kemakĩ yuikĩ:
—Ẽ bakeẽ, ẽ mia kenamaki. Usha tenẽwãma ushari kawe— aka ana ka dakakẽ
7 Samuelĩ Senhor Deusũ hãtxa nĩkakĩ tapĩ pewariama inũ hawa Senhor Deuskiri uĩriamawẽ taea 8 ma 3ki Senhor Deusũ Samuel ana kenakĩ:
—Samuel!— aka hawaira bestẽtã ana Eli anu benikaĩ yuikĩ:
—Ana ẽ huaii. Hawamẽkaĩ ea yuiwe— aka
—Ka dakashũ manatãwẽ. Senhor Deusũ mia ana kenaya kemakĩ eska yuishãwẽ: “Mĩ dayarũ ẽ mia nĩkai ea hãtxa wawe”, ashãwẽ— aka
—Samuel! Samuel!— aka
hanushũ Samuelĩ kemakĩ yuikĩ:
—Mĩ dayarũ ẽ mia nĩkai ea hãtxa wawe— aka
11 Senhor Deusũ Samuel yuikĩ:
—Israelĩ enabu hiwebaunabu anu hawara kaĩmakĩ ẽ hatu datea nĩkai e ibaũshãkanikiki. 12 Hawenabukiri haska ẽ Eli yuima hawa binumama na habia shaba betsatiã ẽ hatu bika tenemashanaii. 13 Ẽ hãtxa danãkĩ hawẽ huni bake dabetũ txakabuwakĩ ekiri hãtxa txakabukĩ yuiaibũ Elĩ hawẽ bakebũ txakabuwakubainaibu unãbiakĩ hatu nemakĩ pewaismawẽ taeshũ haska ẽ bebũkiri yuishina keska wakĩ hawa heneama ẽ hatu kupikubaĩshanaii. 14 Eska hatu wakatsi ẽ hatukiri yubakashinaki. Ea daewakĩ hatũ txakabu ea buamanũ, ishũ, hatũ inabu itxapa tesẽshũ hirabi ea menukĩ keyushũkĩ inũ hawara inãkuĩ itxapawẽ ea daewabiabu Elĩ enabu hatũ txakabu ẽ hatu tere ataskama ishanaii— atã kakẽ
15 Samuel dakayukẽ penama bestẽshũ Senhor Deuski nukuti tari hiwe hikiti shui bepeã haska Senhor Deusũ yuiwana Samuelĩ shinaĩ Eli yuikatsi ikama hawẽ dateaya 16 hakia Elĩ Samuel kena hua
17 Elĩ yukakĩ yuikĩ:
—Haskara Senhor Deusũ mia yuishinai hawa huneama dasibi ẽ mia yukai ea yui keyuwe. Dasibi mĩ ea yuiama betsa mĩ huneawẽ taeshũ hau Deusũ mia kupihairanũwẽ— aka
18 Senhor Deusũ hãtxa Samuelĩ Eli banabimakĩ huneama dasibi yui keyua, Elĩ nĩkatã yuikĩ:
—Aa, mĩ ea peirawawa! Txanimaki. Nukũ Shanẽ Ibu kayabiki. Hawenaki. Haska betxipaiai keska hau anũwẽ— aka
19 Senhor Deusũ merabewa Samuel yumekũkaini huni ewakũkaĩkĩ haska Senhor Deus yubakani hãtxa hawa betsa heneama Samuelĩ ashũkubainaiwẽ taeshũ 20 Israelĩ enabũ maiwã pakebukuã norte kesha betsa Dã anua inũ sul kesha betsa Berseba anu hiweabũ yuikĩ: “Samuel txanima Senhor Deusũ hãtxa yuishunika kayabiki”, iwanã, unanibukiaki. 21 Siló anu Samuel hiwekẽ habianuas Senhor Deusũ hawẽ hãtxa shabakabi Samuel ana yusĩkubainaya