Jongöreŋ Kimbi 1
Jonöŋ Kimbiŋi mutukŋi alök.
Malmal köhöikŋaŋgö keuŋi mi Jisös Kraist
1
*Nöŋön malmal köhöikŋaŋgö keuŋi jimamgöra kimbi ki ohozal.
Mutuhök malmalgö keu Toŋan maliga miaŋgö könaŋe öröyuai pakpak asuhuyök.
Yaŋön mala kota gölmenöŋ eriga i jeninan eka böröninan sileŋi misiriinga keuŋi jii möta malin.
2 *Oyaeŋkoyaeŋ malmalgö Toŋan asuhuiga neŋön i eka könaŋi naŋgöba jiba dangunu ewö kinjin.
Malmal teteköŋi qahö miaŋgö Toŋan Iwibuk mala kota eta asuhum neŋgiyöhi,
neŋön miaŋgö Buŋaŋi jim asariba uruŋini kuŋguzin.
3 Neŋön Iwi aka yaŋgö Nahönŋi Jisös Kraist yetpuk urunini jöhöba mohot maljin.
Iŋini mewöyök uruŋini nembuk jöhöba mohot malbingöra yuai eka mörini,
mi jim tuarim eŋgizin.
4 Sösöŋgainöŋ urunini kokolak qei malbingöra keu ki jim tuariba ohozin.
Mewö.
Kembugö asakŋe malmal
5 Buŋa keu yaŋgö Nahönŋaŋgöreŋök möta jim tuarim eŋgizini,
mi kewö:
Anutunöŋ asakŋaŋgö Toŋi akza aka yaŋgöreŋ söŋaup kun qahö ahöza.
6 “Neŋön yambuk urunini jöhöba mohot maljin,”
mewö jitnöŋ jiba töndup aiakaninan jipjap aka söŋaupnöŋ maljin ewö,
mönö keu muneŋ jiba ahakmemeninan keu ölŋi qahö wuataŋgömakzin.
7 Anutunöŋ asakŋaŋgö uruŋe maliga neŋön miaŋgö dop aiakanini asakŋaŋgö uruŋe ahakzin ewö,
mönö sutnine urunini jöhöm aŋguba mohok malinga Nahönŋi Jisös Kraistkö sepŋan mönö siŋgisöndoknini pakpak saŋgoŋmakza.
8 Urunine siŋgisöndok qahö ahöza,
mewö jibinak ewö,
mönö nanini tilipköm aŋguinga keu ölŋan urunine qahö kinma.
Qahö!
9 Siŋgisöndoknini jim miwikŋaizin ewö,
yaŋön mönö uruŋi diŋdiŋaŋgö dop jöhöjöhö keuŋi pöndaŋ wuataŋgöba siŋgisön-doknini mosöta ahakmemenini goŋgoŋi pakpak saŋgoŋmakza.
10 “Siŋgisöndok qahö ahin,”
mewö jibin ewö,
mönö keu Toŋi oŋgiringa Anutunöŋ muneŋ jiji azi tandök aiga keuŋan urunine qahö kinma.
Mewö.