Galesia Kimbi
Polnöŋ Galesia yeŋgöra Kimbi alök.
Jim-asa-asari
Polnöŋ Buŋa Kimbi ki Galesia prowinsgö urumeleŋ könagesö yeŋgöra ohoyök. Galesia prowins mi Eisia Mainö (Töki) uruŋe Rom yeŋgö bapŋine malget.
Aposol yeŋön Anutugö Buŋa keu jim sehigetka mutuk Juda tosatŋi aka könaŋgep kian kantri tosatŋan mewöyök uruŋini meleŋget. Nalö miaŋgöreŋ Juda yeŋön kapaŋ köla keu yahöt kewö jigetka lömböriyök:
1) “Kian kantri yeŋön Mosesgöreŋ Köna keugö dop Anutugö aiwesökŋi sileŋine qahö yandime ewö, yeŋön mönö urumeleŋ könagesö ölŋi qahö akŋe.” Anutunöŋ ambazip nanŋaŋgöra möwölöhöm eŋgiyöhi, yeŋgö aiwesökŋi mi sile yandiyandi. Jen 17.10–12. Polnöŋ mi möta “Keu mi ölŋi qahö!” jiba kewö jim kutum eŋgiyök, “Kian kantri yeŋön Jisös möt narigetka Anutunöŋ mötnaripŋini miaŋgöra aka keuŋini jim teköi solaniba urumeleŋ kambu ölŋi akŋe.”
2) Böhi takapulakaŋi yeŋön Polnöŋ Uŋa Töröŋaŋgö ösumnöŋ nup meyöhi, mi memba et ala kewö jiget, “Pol mi aposol ölŋi qahö akzawaŋgöra keuŋi kude mötme.” Mewö jigetmö, Polnöŋ köhöiba jiyök, “Nöŋön Jisösgö Ölöwak Buŋa jiji azia aka Anutunöŋ meköba kuŋgum niŋgiiga aposol ölŋa maljal.” Mewö jiba Galesia yeŋgö urumeleŋ kambuŋi kambuŋi ahakmemegö qambaŋ keu ohoyök. Urunini meleŋbin ewö, mönö amqeba Kraist jöpaköba nupŋi meinga ölŋi asuhuma.
Buk kiaŋgö bahöŋi bohonŋi 5 mi kewö:
Keu mutukŋi 1.1-10
Pol ni aposol ölŋi akzal 1.11–2.21
Anutu kalem möriamŋaŋgö Buŋa keu 3.1–4.31
Nanini imbi-imbi akinbukö soŋgo 5.1–6.10
Kimbigö keu kötŋi bohonŋi 6.11-18