Yesus Pekemaa' Lama Kiladu
14
1 Odu simbiangan Yesus ingua' miohodn di bali lama Pirisi migia panggat.
Dia kiara barabm lama nondu' Yesus.
2 Waktu ina kiara lama igubara' uai ma' longon ingua' Yesus.
3 Yesus igsuad di sigu ugama ma' lama Pirisi.
Uubm nya,
“Pungga' buat bakng miaa' ugama ti,
kaap pekemaa' lama kiladu odu simbiaakng atau pudn nda'?”
4 Tei' siga lama na nda' miabat.
Ina na,
Yesus inoog lama na ma' ipekemaa' nya.
Pegpunga ina,
sia igisuru' lama na minili'.
5 Peguli' lama na,
Yesus igsuad di siga lama na.
Uubm nya,
“Pungga' buat bakng kiara anak nyu atau pudn sapi' nyu medabu' di soig telaga odu simbiaakng?
Uhu tanggas ngua' ngoun atau pudn nda'?”
6 Tei' siga lama na nda' miabat.
Ajaardn Pisidukng Deri
7 Yesus nipat lama mili' bangku' ayad nggien mupug di ramai na.
Ina na,
sia igsuad ndalabm di siga lama na.
8 Uubm nya,
“Bakng kiara lama ngujumput dihu kindi ramai koidn,
dei uhu upug di bangku' ayad!
Bangkali kiara pa lama leidn lobi migia panggat tidi dihu matakng.
9 Nubu' lama sengompu' bali na ngua' susuad di dihu,
‘Biria' na bangku' nti di nya!’
Nubu' uhu melou,
pasal uhu terpaksa' mupug di kimidiadn.
10 “Tei' bakng kiara lama ngujumput dihu,
gaabm pa uhu mupug di bangku' nda' ayad,
supaya lama sengompu' bali na ngua' susuad di dihu,
‘Pangan,
upug na di bangku' ayad nti!’
Bakng oo' nga rua,
lama leidn dia ngurmat dihu.
11 Pasal esi ga lama mantug deirdn na,
sia nuan mpisidukng,
ma' esi ga mpisidukng deirdn na,
sia nuan mantug.”
12 Punga ina Yesus igsuad di lama sengompu' bali na.
Uubm nya,
“Bakng uhu ngujumput lama mohodn odu atau pudn robi,
dei pungujumput pangan nyu,
waris nyu,
atau pudn lama kaya!
Pasal bakng uhu ngujumput siga lama na,
uhu nuan malas malik.
13 Bakng uhu muha' ramai,
ayad pa uhu ngujumput lama miskidn,
lama sasat,
lama timpakng,
ma' lama buta.
14 Walaupudn siga lama na nda' ngkaap balas pia nyu,
Itala balas merahat dihu waktu nya nguhubm munusia'.”
Susuad Ndalabm Kentangan Ramai Migia
15 Waktu kuberaman lama dia kidoor susuad Yesus,
kiara simbatu lama igsuad.
Uubm nya,
“Untukng baar lama mupug mohodn ma' Itala di soig suruga'.”
16 Yesus miabat lama na.
Uubm nya,
“Kiara lama muha' ramai migia.
Sia mpiit jumputadn di barabm lama.
17 Pegbuha' mata ramai,
sia ipiit dipadn na ingua' mengai siga lama na.
Uubm dipadn na,
‘Biaa' uhu na diaadn,
pasal nentaadn na sisidia' na!’
18 “Tei' nentaadn na siga lama na igahal.
Na simbatu na moro' di dipadn na,
‘Ndou ngkibiaa' diha pasal ou baru pa moli tana' ma' ou mistii' kiliid gulu.
Kibori ou ga maap.’
19 “Uubm lama ngindua na,
‘Ou baru pa moli pulu' mbatu kerbou ma' ou mingin nginam pekerai.
Kibori ou ga maap.’
20 “Uubm lama ngintolu na,
‘Ndou ngkibiaa' diha,
pasal baru pa ihi igesaa.’
21 “Nubu' dipadn na minili' imoro' di tuadn nya susuad siga lama na nentaadn na.
Pegdoor tuadn na,
sia ndoot ati.
Uubm nya,
‘Ketanggas na kindi aludn-aludn bandar!
Iruma' na lama!
Uta' kinditi lama miskidn,
lama kohod,
lama buta,
ma' lama timpakng!’
22 “Dipadn na pudn ipanu.
Punga na ina sia pibelik ma' igsusuad.
Uubm nya,
‘Tuadn,
bas ku na imanggil barabm lama,
tei' kahal pa muluag bali nti.’
23 “Tuadn na miabat,
‘Kaadn na kindi daidn di luar bandar!
Riata' na nggiit kinditi nentaadn na lama,
supaya bali hu kemponu'.
24 Ou moro' di dihu ma' simbatu pudn lama bas ginumput ku nda' kerasa koon ramai hu.’ ”
Pungga' Ga' Miaa' Yesus
25 Mbarabm lama miniaa' Yesus ipanu.
Sia ngilingu ma' susuad di siga lama na.
Uubm nya,
26 “Ndara lama ngkaap miaa' diaadn,
bakng sia nda' mingisiadn diaadn lobi tidi indu'-ama' na,
ma' anak saa nya,
ma' pusud,
ma' deirdn na hai.
27 Esi-esi ga lama nda' nonggukng salib nya,
sia nda' ngkaap medadi lama pegbiaa' ku.
28 “Bakng kiara dihu mingin mpusag bali batu,
ayad pa uhu mpihir gulu ayad-ayad,
supaya uhu kempandi bakng suhup siidn ma' nda'.
29 Bakng nda',
set bansuk ga musag ma' nda' na kumpunga.
Nubu' nentaadn na lama kiliid nggesab.
30 Siga lama na susuad,
‘Kida' nyu gulu bali nya nti set ipusag bansuk ga,
tei' nda' pa kimpunga.’
31 “Ina hai bakng kiara raja kiaskar pulu' ribu tuni mingin megperakng ma' raja leidn kiaskar dua mpulu' ribu tuni,
sia mistii' mupug ma' mpihir gulu mogos nya lemoon atau pudn nda'.
32 Bakng sia kerasa deirdn na mala,
kahal pa modu' musu nya,
sia nggisuru' lama susuruadn nya temomu raja na nggiit nggaman.”
33 Yesus imutus susuad na,
“Ina hai ndara simbatu pudn dihu medadi lama pegbiaa' ku,
bakng nda' mori nentaadn na kibiagadn na di Itala.”
Susuad Ndalabm Timus Temonu
34 Uubm Yesus,
“Timus kiara guna,
tei' bakng temonu na,
nda' na maap ngasidn malik.
35 Ina na,
ndara hai guna bakng ipaadn di perook atau pudn ingien baja.
Ayad pa igondi'.
“Bakng uhu mingin kempandi,
pikidoor uhu na!”