Yesus Ipiit Lama Pegbiaa' Nya, Pulu' Dua Tuni
9
1 Yesus imompodn lama pegbiaa' nya,
pulu' dua tuni.
Inubu' sia imori siga lama na kuasa nggien puhad kuakng ma' pekemaa' ladu.
2 Pegpunga ina,
sia gisuru' siga lama na ipanu.
Uubm nya di siga lama na,
“Nua' nyu na pekemaa' lama kiladu!
Ma' nua' nyu na pompot birta tidi Itala,
pungga' ga' Itala mingin mirinta lama!
3 Dei uhu pigiit medoot sikng sunggud,
kupuyu',
ngkoon,
siidn,
atau pudn dua ngelambar baju'!
4 Pegdatakng nyu di bunua na,
bakng kiara lama nirima dihu dia,
odop uhu na dia,
gipad nyu muhad tidi bunua na kai!
5 Nggien-gien ga bunua lama nda' nirima dihu,
uhad uhu na tidia!
Ma' pepaga' na abuk di uai nyu,
supaya siga lama na kintabm ma' kempandi deirdn nda kidusa,
pasal kabul kidoor birta tidi Itala!”
6 Nubu' lama pegbiaa' nya miuhad tidia,
ingua' pompot birta tidi Itala ma' pekemaa' lama di nggien-gien ga bobo' bunua di Gililia.
Si Herodos Nda' Ketotog
7 Raja Herodos di bunua Gililia na ikidoor kentangan kerai Yesus.
Sia nda' ketotog pasal poro' lama si Yohanes biag malik!
8 Kiara hai lama susuad nabi Elia pibelik melik.
Ma' kiara lama leidn susuad nabi ringa' bu'-bu' biag malik.
9 Uubm Herodos,
“Si Yohanes sininggulu na askar ku,
tei' osi ga lama ina?
Ou kidoor barabm susuad kentangan nya.”
Ina na,
si Herodos mingin temomu Yesus.
Yesus Mmohodn Lima Ribu Lama
10 Lama piniit Yesus pibelik malik ingua' imoro' onu ga bas kinerai nda.
Inubu' Yesus igiit siga lama na kindi bandar Betsaida sida deirdn nda.
11 Pegdoor lama dia,
siga lama na inolu' nya tidi kimidiadn.
Inubu' sia nirima siga lama na ma' moro' pungga' ga' Itala mingin mirinta siga lama na.
Sia hai pekemaa' suhu lama kiladu.
12 Peggibiidn,
lama pegbiaa' Yesus,
pulu' dua tuni na,
ingua' igsuad di nya.
Uubm siga lama na,
“Surua' na siga lama nti kindi bunua leidn,
ngua' ngirubm nggien metak ma' ngirubm koon nda,
pasal bunua nti ndara ngkoon ma' ndara nggien metak.”
13 Tei' uubm Yesus di lama pegbiaa' nya,
“Pehono' nyu na siga lama nti!”
Siga lama na miabat nya.
Uubm siga lama na,
“Nda' suhup koon ti,
set ti kiara ruti lima nggiou ma' seda' dua mbatu ga.
Ndihi ngkaap mmohodn siga lama na,
bakng ndihi moli koon malik.”
14 (Dia kiara kira-kira lima ribu tuni lahi,
nda' na kiroodn libudn ma' peranak.)
Uubm Yesus di lama pegbiaa' nya,
“Surua' siga lama na mupug simpaan lima mpulu' tuni barabm!”
15 Lama pegbiaa' Yesus miniaa' susuad nya,
igisuru' nentaadn na lama miupug.
16 Nubu' Yesus ingai lima nggiou ruti ma' dua mbatu seda' na.
Sia ininggeda' langit ma' inguduaa mantug Itala.
Inubu' sia imagi ruti ma' seda' na,
ma' imori di lama pegbiaa' nya,
ma' igisuru' mmohodn suhu lama dia.
17 Nentaadn na lama dia miohodn gipad mbiag kai.
Nubu' lama pegbiaa' Yesus imompodn opod siga lama na.
Kiara pa pulu' dua raga' bas opod siga lama na.
Kuhuan I Petrus Kentangan Yesus
18 Pegodu leidn waktu Yesus inguduaa deirdn na ga,
lama pegbiaa' nya inolu' nya.
Nubu' sia ikimuat siga lama na.
Uubm nya,
“Esi ou nti,
poro' lama?”
19 Uubm siga lama na,
“Kiara lama moro' diha si Yohanes.
Ma' kiara hai moro' diha nabi Elia.
Tei' kiara hai lama leidn susuad aha na nabi ringa' bu' biag malik.”
20 Uubm nya,
“Tei' bakng di dihu,
osi ga ou nti?”
Uubm i Petrus,
“Aha na Kiristus piniit Itala.”
21 Ina na,
Yesus ingiart susuad na di lama pegbiaa' nya.
Nda' giu' moro' di lama leidn.
Yesus Moro' Pungga' Ga' Kipitiaadn Nya
22 Yesus susuad di lama pegbiaa' nya.
Uubm nya,
“Ou na nti piniit Itala ma' nuan nensara'.
Suhu kutua' lama Yuhudi,
ma' kupala lama pegogot ugama,
ma' sigu ugama nda' nirima diaadn.
Siga lama na musulaadn diaadn.
Ina na,
ou pitiaadn,
tei' pegodu kutuluadn ou biag malik.”
23 Pegpunga ina,
Yesus igsuad di kuberaman lama dia.
Uubm nya,
“Bakng kiara lama mingin miaa' diaadn,
sia nda' kaap miaa' kendahadn deirdn na.
Sia mistii' odu-odu nonggukng salib nya ma' miaa' diaadn.
24 Pasal esi-esi ga lama miaa' kendahadn deirdn na,
sia na nda' ngkaap kibiagadn seleid-leid na.
Tei' esi-esi ga lama mati pasal sia pisiaa di diaadn,
sia na ngkaap kibiagadn seleid-leid na.
25 Ndara guna bakng lama kiara nentaadn na arta' ma' siidn di dunya' nti,
tei' nda' ngkaap kibiagadn seleid-leid na.
26 Ou na nti piniit Itala.
Di na kimidiadn ou pebalik malik duma' meleyhat.
Waktu ina migia kuasa hu tidi ny Ama' di suruga'.
Bakng lama melou ngahudn diaadn ma' ajaardn ku,
ou pudn melou ngahudn siga lama na waktu hu pebalik.
27 Ou moro' di dihu kiara lama kati' nda' pa siga lama na mati,
siga lama na kiliid Itala mpusag pirinta nya.”
Rua Yesus Similiu
28 Pegpunga Yesus susuad ina,
kira-kira walu' rubian sia igiit i Petrus,
ny Yohanes,
ma' ny Yakobus timodik buig nggien nguduaa.
29 Atakng Yesus nguduaa,
rua nya similiu ma' pimihaadn nya pudn kimputi' sempa sikng upak na.
30 Toho-toho na kiara lama dua tuni nigsusuad ma' Yesus.
Ina na,
nabi Elia ma' nabi Musa ipiliid deirdn nda duma' siur Itala tidi suruga'.
31 Siga lama na nigsusuad kipitiaadn Yesus nda' na meleid di Yurusalam.
32 Waktu ina si Petrus ma' siga ibal na ikodop,
tei' siga lama na toho na ikitiag ma' ikiliid tuni Yesus kiara siur ma' dua tuni pa ibal nya gugusag.
33 Waktu lama dua tuni na miuhud tidia,
si Petrus igsuad di Yesus.
Uubm nya,
“Guruadn,
ayad na kiti diti.
Gaabm pa ihi mbuat rondodn tolu,
simbatu adi diha,
simbatu adi nabi Musa,
ma' simbatu pa adi nabi Elia.”
(Si Petrus nda' kerati onu sinisuad nya.)
34 Kahal pa si Petrus susuad,
miatakng na toi landas.
Nubu' siga lama na lindungan toi landas na ma' lama pegbiaa' Yesus niggolok.
35 Uubm Itala tidi soig toi landas na,
“Nti na anak ku pinili' ku.
Pikidoor uhu na nya!”
36 Pegberanti deroodn na,
lama pegbiaa' Yesus ikiliid nya gugusag deirdn na ga dia.
Waktu ina siga lama na nda' imoro' di lama leidn onu-onu bas inidadn siga lama na.
Yesus Pekemaa' Peranak Nsuahadn Kuakng
37 Sikng suub siga lama na dimua' tidi buig na.
Inubu' barabm lama ingua' timomu Yesus.
38 Kiara simbatu lahi tidi kuberaman lama dia imeragu' inoog Yesus.
Uubm nya,
“Guruadn,
tudi ou na!
Kida' gulu anak ku tunggal nti nsuahadn kuakng!
39 Bakng si eli' medetangan guakng na,
sia meragu' ma' matakng na esab nya mati sampai ngelabudn iag nya.
Megdatakng-datakng kuakng na sampai nahit nya ma' nda' pandi muhad.
40 Bas ku na ikituud lama pegbiaa' nu mpuhad kuakng na,
tei' siga lama na nda' kaap puhad.”
41 Inubu' Yesus nigsuad di siga lama na dia.
Uubm nya,
“Uhu baar-baar kisala' nda' pisiaa di Itala!
Ndou ketaadn nggimung ma' dihu.”
Punga na ina Yesus igsuad di lama na,
“Uta' na anak nu kinditi!”
42 Pegdatakng peranak na,
kuakng na ipereba' nya di tana' ma' miatakng na esab nya.
Yesus ipuhad kuakng na ma' ipekemaa' peranak na.
Inubu' ipupuli' peranak na kindi ama' na malik.
43 Nentaadn na lama dia kinorokng ikiliid kuasa Itala migia.
Yesus Igsuad Melik Kentangan Kipitiaadn Nya
Lama dia kahal kinorokng kentangan onu ndedi kinerai Yesus.
Nubu' Yesus igsuad di lama pegbiaa' nya.
Uubm nya,
44 “Intomo' nyu na biidn ku nti,
ou na nti piniit Itala.
Nda' na meleid ou dekapadn.”
45 Lama pegbiaa' nya nda' kerati onu rati sinisuad nya ma' nda' ketogu' kimuat nya.
Sikng tiutup na pihiardn siga lama na.
Esi Palikng Milibuat Panggat?
46 Lama pegbiaa' Yesus niggaga deirdn nda esi palikng milibuat panggat.
47 Yesus pandi pihiardn siga lama na.
Ina na,
sia gisuru' simbatu peranak musag di sodi nya.
48 Inubu' sia igsuad di siga lama na.
Uubm nya,
“Esi-esi nirima peranak sikng nti,
pasal peranak na pegbiaa' diaadn,
ina na sia singgurua nirima diaadn kai.
Ma' esi-esi ga nirima diaadn,
sia hai nirima Itala.
Pasal esi-esi ga dihu pisidukng deirdn nyu,
sida na palikng milibuat panggat!”
Esi-esi Nda' Lemoon Dihiti, Sia Miaa' Dihiti
49 Uubm ny Yohanes,
“Guruadn,
ihi ikiliid lama ipuhad kuakng,
mahi ngaardn nu.
Ihi bas na ingerarakng nya,
pasal sia leidn ga tidi paan ti.”
50 Yesus igsuad di ny Yohanes ma' lama pegbiaa' nya leidn,
“Dei uhu na pengerarakng nya!
Esi-esi nda' lemoon dihiti,
sia miaa' dihiti.”
Yesus Nda' Tinirima Lama Samaria
51 Yesus kerasa deirdn na nda' na meleid anggatadn kindi suruga'.
Ina na,
sia ngai kuputusadn kindi Yurusalam.
52 Sia ipiit lama pegbiaa' nya igulu tidi deirdn na kindi bunua Samaria nggien nidia' adi nya.
53 Tei' lama Samaria nda' nirima Yesus,
pasal sia ipanu ingonong kindi Yurusalam.
54 Ina na,
lama pegbiaa' Yesus,
si Yakobus ma' ny Yohanes susuad,
“Guruadn,
aha mingin dihi kibori api tidi suruga' nggien minasa lama Samaria?”
55 Tei' Yesus ingilingu ma' inagur siga lama na.
56 Pegpunga ina,
sia ma' lama pegbiaa' nya kindi bunua leidn.
Lama Mingin Medadi Pegbiaa' Yesus
57 Waktu Yesus ma' lama pegbiaa' nya ipanu,
kiara lama simbatu igsuad di nya.
Uubm nya,
“Ou sidia' miaa' diha nggien-gien ga onong nu.
Miaa' ou diha sei.”
58 Yesus igsuad,
“Asu toidn kiara pa gogu' nggien muli' ma' bohit kiara pa rumun,
tei' ou na nti piniit Itala ndara gien ku milakng ma' temalakng.”
59 Sia igsuad di lama leidn na,
“Gaabm aha miaa' diaadn.”
Tei' uubm lama na,
“Yesus,
muli' ou gulu.
Nggait ou ny ama' mati,
nubu' ou miaa' diha.”
60 Uubm Yesus,
“Biardn na sia mati,
lebongon hai lama,
tei' panu na!
Nua' na moro' lama pungga' ga' Itala mingin mirinta lama.”
61 Kiara pa lama igsuad di Yesus.
Uubm nya,
“Pelepasa' ou gulu muli' muun waris ku!
Nubu' ou miaa' diha.”
62 Uubm Yesus di lama na,
“Bakng kiara lama majak,
sembela' nya ngilingu kindi kimidiadn na,
ina rati sia kahal mingin miaa' kendahadn nya bu'.
Itala nda' mingin mahi lama oo' nga rua gaya.”