Yesus Pekemaa' Dipadn Kutua' Askar Tidi Rum
7
1 Pegpunga Yesus nigsuad di lama dia,
sia kindi bandar Kepernaum.
2 Dia kiara kutua' askar Rum.
Sia kiara dipadn kisiangan nya.
Na dipadn migia ladu,
susa na nggien ngguit.
3 Pegdoor kutua' askar na birta kentangan Yesus,
sia igisuru' kutua' lama Yuhudi ngua' Yesus nggien kituud pekemaa' dipadn nya.
4 Pegdatakng siga lama na di Yesus,
siga lama na imogos nya.
Uubm siga lama na,
“Patut aha nuud nya,
5 pasal sia mingisiadn bangsa ti ma' bas na igbuat bali simbiangan adi dihiti.”
6 Inubu' Yesus miniaa' siga lama na minili'.
Waktu nya mingad na kompot di bali na,
kutua' askar na igisuru' pangan nya ngua' Yesus.
Uubm nya,
“Perai nyu di Guruadn na,
‘Dei na punusa deirdn nu matakng kindi bali hu pasal ndou patut pusuak diha di soig bali hu.
7 Ina na hai,
ou nda' patut begtomu ma' diha.
Gipad nu susuad ga,
dipadn ku asal kemaa'.
8 Ou di sidukng lama kiara kuasa ma' ou pudn nguasa askar leidn.
Bakng ou nggisuru' simbatu kindi,
sia pudn kimindi.
Bakng ou nggisuru' kinditi,
sia pudn kinditi.
Bakng ou suru' dipadn ku,
buata' nti,
sia pudn mbuat.’ ”
9 Yesus kibunggakng baar-baar ikidoor susuad tidi askar na.
Sia ingilingu,
sembela' nya inginonong lama miniaa' nya.
Uubm nya di siga lama na,
“Ndou pa bas iketomu kipisiaadn lama Israil migia singgurua nti.”
10 Peguli' lama piniit kutua' askar na kindi bali,
siga lama na kimpandi dipadn na kimaa' na.
Yesus Miag Anak Lama Nipuud
11 Nda' ga keleid Yesus ma' lama pegbiaa' nya kindi bandar Nain.
Kiara barabm lama miniaa' siga lama na.
12 Pegingad Yesus di luangan bandar na,
kiara lama inonggukng banggi anak tunggal nipuud na.
Barabm lama miniaa' ingiaat nya.
13 Pegliid Yesus libudn nipuud na,
sia mingisiadn,
sembela' nya igsuad,
“Dei tangis,
dakng!”
14 Nubu' Yesus ineronggodn tenggungan giramba' na,
supaya ga lama inonggukng na beranti.
Pegberanti siga lama na,
nubu' Yesus nigsuad.
Uubm nya di banggi na,
“Udukng na,
ali'!”
15 Pegpungaan Yesus nigsusuad,
miudukng na peranak ma' mulei susuad.
Inubu' Yesus inunda' nya kindi indu' na.
16 Nentaadn na lama dia igegolok ma' imantug Itala.
Uubm siga lama na,
“Kiara nabi migia kuasa miatakng di tenga'-tenga' ti.
Itala miatakng nelamat dihiti.”
17 Birta kentangan Yesus ikompot di nentaadn na bunua Yudia ma' bunua leidn.
Lama Piniit Ny Yohanes Kindi Yesus
18 Si Yohanes kidoor birta kentangan Yesus tidi lama pegbiaa' nya.
19 Nubu' sia igisuru' lama pegbiaa' nya dua tuni ingua' kimuat Yesus,
bakng sia na piniit Itala ma' nda'.
Ma' suru' ngintotog,
bakng mistii' nggait lama leidn ma' nda'.
20 Pegdatakng lama pegbiaa' ny Yohanes di Yesus,
siga lama na ikimuat nya.
Uubm siga lama na,
“Si Yohanes gisuru' dihi kimuat diha,
bakng aha na piniit Itala ma' nda'.
Suru' ngintotog,
bakng mistii' ihi nggait lama leidn pa ma' nda'.”
21 Waktu ina Yesus pekemaa' barabm lama,
mpuhad kuakng,
ma' pekemaa' barabm lama buta.
22 Nubu' Yesus miabat siga lama na.
Uubm nya,
“Uli' uhu na!
Perai nyu di ny Yohanes onu ga bas kinidadn nyu ma' onu ga ndengoordn nyu.
Lama buta kiliid malik,
lama kohod kaap mpanu,
lama kikusta kemaa',
lama bongol kidoor,
lama mati biag malik,
ma' lama miskidn peroodn birta mpia tidi Itala.
23 Itala merahat lama,
bakng nda' alakng-alakng pisiaa di diaadn.”
24 Peguli' lama pegbiaa' ny Yohanes,
Yesus igsuad kentangan ny Yohanes di kuberaman lama.
Uubm nya,
“Onu kinidadn nyu waktu nyu kindi ny Yohanes di tenga'-tenga' bunua na?
Uhu leidn ga kiliid lama alakng-alakng pisiaa singgurua purupuk megrabi-rabi.
25 Ma' uhu leidn ga kiliid lama begpimihaadn ayad singgurua lama di istana'.
26 Perai nyu di diaadn onu ga inidadn nyu.
Sia nabi,
tei' ou moro' dihu sia lobi migia kuasa tidi nabi.
27 Si Yohanes na sinisuad di soig Kitab:
‘Pikidoor!
Ou mpiit lama nggulu tidi diha.
Sia nidia' lama gien nu matakng,
sikng kedaadn lama ngeloos daidn gien raja matakng.’ ”
28 Uubm Yesus.
“Ou moro' dihu si Yohanes lobi milibuat panggat tidi nentaadn na munusia' leidn bas biag di dunya' nti.
Tei' esi-esi ga lama pisidukng deirdn na di tingguangan Itala,
sia na lobi milibuat panggat tidi ny Yohanes.”
29 Nentaadn na lama dia ma' lama pegpungut wakng kupala ikidoor susuad Yesus ma' moro' Itala mpia pasal siga lama na bas na pionsu' ny Yohanes.
30 Tei' lama Pirisi ma' sigu ugama nulak kingein Itala ma' nda' mou' punsuudn ny Yohanes.
31 Uubm Yesus,
“Pungga' ga' hu mpusugut lama na haa' na?
Singgurua esi siga lama na?
32 Siga lama na singgurua peranak gugupug di pasar ma' inoog siga ibal nda.
Uubm siga lama na,
‘Ihi nsulikng,
tei' nduhu menari'.
Ihi nsindarikng,
tei' nduhu temeis.’
33 “Si Yohanes miatakng begpuasa ma' nda' nginum semsu,
tei' poro' nyu sia nsuahadn kuakng.
34 Ou mohodn ma' nginum,
tei' poro' nyu nsuak ma' melu.
Poro' nyu hai,
ou mpangan lama pegpungut wakng kupala ma' lama kedetaan.
35 Walaupudn oo' nga rua,
kiara bukti' di kimidiadn esi ga miaa' kendahadn Itala.”
Yesus Di Bali Simun
36 Kiara lama Pirisi,
ngaardn nya Simun.
Sia ngujumput Yesus mohodn di bali nya.
Pegdatakng Yesus dia,
sia miupug miohodn.
37 Di bandar na kiara libudn kidusa.
Pegdoor libudn na Yesus miatakng dia,
sia ingua' ma' igiit terapus suga' amut.
38 Sia musag di arag Yesus,
sembela' nya temeis ingebasa' uai Yesus nggien nya imiid ma' obuk na.
Inubu' ingadak uai Yesus,
sembela' inuug amut di uai nya.
39 Pegliid Simun aal ina,
sia mpihir di soig guakng na,
“Bakng baar-baar Yesus nabi,
sia pandi esi libudn na ma' pungga' rua kibiagadn nya.”
40 Nubu' Yesus nigsusuad di Simun.
Uubm nya,
“Kiara susuad ku di diha.”
Uubm Simun,
“Pegsuad ga!”
41 Uubm Yesus,
“Kiara dua lama ingutakng siidn.
Na simbatu,
lima atus ringgit,
ma' na simbatu,
lima mpulu' ringgit.
42 Na dua-dua na nda' kibiaar utakng nda.
Ina na,
lama pebolos siidn na nda' na nggintabm utakng na.
Tei' perai ou na osi na palikng mingisiadn lama bas pebolos siidn na?”
43 Uubm Simun,
“Undakng ku,
lama lobi migia utakng na,
sia na palikng mingisiadn.”
Yesus miabat,
“Ina berhai tigoodn nu.”
44 Inubu' Yesus ingilingu libudn na,
sembela' nya igsuad di Simun.
Uubm nya,
“Kida' gulu libudn nti!
Ou simuak di bali nu,
tei' ndaha bas imori diaadn beig nggien masa' uai ku.
Tei' sia imasa' uai ku ma' romu na,
nubu' imiid ma' obuk na.
45 Ndaha bas ingadak diaadn,
tei' sia ingadak uai ku tidi bu' hu miatakng kina sampai na haa' na.
46 Ndaha bas inidia' lana nggien nginsu' di ulu ku,
tei' sia inuug uai ku ma' amut nti.
47 Ou moro' diha libudn nti mbarabm dusa ma' Itala bas na ingampudn nya.
Ina na,
sia baar-baar mingisiadn diaadn.
Bakng lama nda' mbarabm dusa nuan Itala ngampudn,
sia kurakng mingisiadn Itala.”
48 Inubu' Yesus nigsuad di libudn na,
“Dusa nu inampudn na dakng.”
49 Pegdoor kuberaman lama miupug miohodn di mija' na,
siga lama na mulei susuad deirdn nda.
Uubm siga lama na,
“Esi lama nti sampai ngkaap ngampudn dusa lama?”
50 Nubu' Yesus nigsuad di libudn na,
“Pasal aha pisiaa di diaadn,
Itala bas na nelamat diha.
Dei na kususa guakng!
Uli' na,
dakng!”