Mene Luhuvo niteꞌ nene aposoloꞌ Pauloꞌ gizineꞌ. Eiꞌ monovo danavaꞌve nene Aposolo bukuuꞌ gize neive. Idoꞌ Izesuꞌ Kilisitoꞌ evenele zuho Loma ebekuꞌ minaniꞌ neti luhuvo niteꞌ Pauloꞌ gize-ngidingumuꞌ gomuꞌ gataaꞌ gamazi gizuningukisi nene eiꞌ Pauloꞌ monovoꞌvemuꞌ nene ma gatelesane. Pauloꞌ luhuvo niteꞌ mene gizineꞌ nene Loma vete gizebo aniꞌ polovinisi Asia ve languꞌ Eheso ebeꞌ minineꞌ misubola Izesuꞌ evenele zuho miniꞌmi monangumuꞌ gize-ngidineꞌ ve.

Asia polovinisiuꞌ minaniꞌ ebeꞌ mukikutiꞌ Eheso ebeꞌ neꞌmo naba o minineꞌ. Aꞌmine siti nene nGiliki alevelite ganaꞌ apiꞌ igi di sotoꞌ ikeniꞌ neineꞌza Loma ve nete aꞌmineꞌ sitiloꞌ nene gamene haꞌnaloꞌ gehepeve gizebo aniꞌ ve. Idoꞌ aꞌminguꞌ nene eveneꞌ zuho ato atoꞌ mukikutikisi idoꞌ Zuda ve mukikisi minaniꞌ ve. Zuda ve minamave nete soza oꞌmoso monoꞌ li-ngimaaꞌ aniꞌ ve. Eheso aleveliti oꞌmosoꞌine gihile minineꞌ neꞌmi gulive nene Alatemeꞌ ve lo minineꞌ. Eheso numuno ebekuꞌ nene eiꞌ monoꞌ numuꞌve naba gizi-dikevo minineꞌ ve. Aꞌmine monoꞌ numuno nabauꞌ nene aꞌmine oꞌmoso veneꞌ neꞌmi avazaha mumunoꞌve nene Okulumokutiꞌ doꞌmozineꞌ ve li di otikaniꞌ. Aꞌmine avazaha niteꞌ nene amiꞌve vaikisi minineꞌ veneꞌ gele minineꞌ ve. Aꞌmine gahevela kanitili mukiꞌ minangutiꞌ nene eveneꞌ ingine Eheso ebeta aꞌmine soza oꞌmoso veneꞌ nene monoꞌ li-imilisa vaaꞌ aniꞌ ve.

Pauloꞌ aza Izesuꞌ Kilisitoꞌnimuꞌ eveneꞌ lo-ngemelesa monineꞌ gamenela nene aꞌmine Eheso numuno ebetasi vo lo-ngemaaꞌ ineꞌ. Aꞌmine Eheso numuda vo ninge-ngedelesa gamene ma vinguꞌ nene kilisimasi setohamo ivileꞌ ivo minineꞌ. Aꞌminemuꞌ nene aposolo lakaꞌni 18,19 idoꞌ 20 neuꞌ nene gatelesane. Alingeꞌ nene Izesuꞌnidoꞌ gili eleꞌvoleꞌ ilizave lo eveneꞌ lo-ngimingumuꞌ Loma ve nete nalaꞌ numunguꞌ huli-daniꞌ.

Mene luhuvo niteꞌ nene Pauloꞌ aza aꞌmine nalaꞌ numunguꞌ minineꞌ gamenela Eheso ebekuꞌ Izesuꞌ eveneleꞌ zuho minaniꞌ nene gizo hulo-ngidineꞌ. Gizo hulo-ngidineꞌ gamenela nene Kolosa ebekuꞌ Izesuꞌ eveneleꞌ zuho minaniꞌ nesi gizo hulo-ngedo idoꞌ aꞌmine Kolosa ebekuꞌ minive adoꞌ gulive Hilemoniꞌni nesi gizo hulo-dineꞌ ve. Eheso aleve gizo hulo-ngidinguꞌ lineꞌ gamazi linge mukita nene Kolosa aleve gizo hulo-ngidineꞌ nesi hamoliꞌmine o neive. Pauloꞌni hize eleꞌ i-daaꞌ aveutiꞌ Tikikoꞌ neꞌmo aꞌmine luhuvo niteꞌ setohamo nene do vo Pauloꞌ gize-ngidive ngimineꞌ.

Aꞌmine Eheso aleve luhuvo niteꞌ gize-ngidinguꞌ nene aza neꞌmine initekumuꞌ gizuve lo ma lamineꞌ ve. Ne neiha Oꞌmosoꞌmo gozopotatiꞌ neꞌmine olove lo lokidoꞌ nene idise apiꞌ ogo noeꞌmetive. Adoꞌ Izesuꞌ Kilisitoꞌ aza Okulumokuko nizaniꞌ initekisi idoꞌ misubouko nizaniꞌ initekisi nene do hamoꞌ molo nabaꞌine minelive lo lokidoꞌ nene noeꞌmetive lo aꞌmine luhuvo niteꞌveuꞌ nene gizineꞌ ve. Aꞌmidoꞌ imineꞌ molo tiꞌ lo gizineꞌ: Aꞌmine gozopotatiꞌ olosa gala gele minineꞌ initekutiꞌ ma nene eiꞌ lulo emekineꞌ gipele Izesuꞌ Kilisitoꞌ gono dadotiꞌ nene eiꞌ izipahala zuho minilizave lo leliꞌ leleꞌmize molaniꞌ ne neive. Oꞌmosoꞌmo lihimete gilito do hulo-ledo do eiꞌ izipahala loloꞌ o-ledelive lo Izesuꞌ aza lelitoꞌ medelo mino malipo zaloꞌ hilineꞌ. Izesuꞌ Kilisitoꞌnidoꞌ gele eleꞌvoleꞌ uneꞌ gamenelotiꞌ nene eiꞌ evenele zuho nizave lo eiꞌ Sikalahuꞌve netunuꞌ nene do sotoꞌ ogo lehize-lidineꞌ ve. Oꞌmoso aza neꞌmine o-lidineꞌ nene haza gehepeve meniꞌve nomineꞌ o-lidineꞌ ve. Oꞌmosoꞌmo neꞌmine o-lidineꞌ nene laza initeꞌ ma uningumuꞌ o-lidineꞌ nevoba asi eitoꞌ gele eleꞌvoleꞌ uningumuꞌ neꞌmine o-lidineꞌ ve. Laza aꞌmidoꞌ initeꞌ ma meni hize-deloneꞌ nomive. Neꞌmine idiꞌmo Zuda ve minamaniꞌ aleve nete ezemuꞌ gili eleꞌvoleꞌ i minaniꞌ Zuda vesi di hamoꞌ igi hamoꞌ zuho liliꞌ igi eiꞌ evenele zuholite dalizave lo lo huko-ngidineꞌ initeꞌ mukiꞌ dalizangumuꞌ nene Oꞌmosoꞌmo akaꞌine do ngoloꞌ lo-ngidineꞌ ve. Neꞌmino Kilisitoꞌ malipo zaloꞌ hilineꞌ neꞌmo Zuda vesi idoꞌ Zuda ve minamavesi nene ge lovo o neme ne lovo o geme li minaniꞌ monovoꞌine nene do hulavo gohi neꞌmine ilizadoꞌ minamineꞌ. Aꞌmine mulise gosohoꞌ adoꞌ eze evenele zuho do bize-ngidineꞌ mene Okulumokuko guveꞌinesi ve naba minanikisi idoꞌ numudoꞌ namadoꞌ minanikisi ingine mukitoꞌ neꞌmine idotiꞌ nene eiꞌ amuzoꞌvesi idoꞌ gala gele nge laaꞌ neineꞌ monovoꞌvesi nene ningi gililizave lo do bize-ngidineꞌ ve.

Aꞌmine gamazi mene gize osuꞌ lo nelotiꞌ imineꞌ molo tiꞌ lo lineꞌ: Oꞌmosoꞌmo initeꞌ naba neꞌmine o-ngidineꞌ nenako nemuꞌ nene aꞌmine Zuda ve minamaniꞌ aleve ingine engiꞌ monovo golosoloꞌ eꞌmeti minaaꞌ adotiꞌ nene hulilizadoꞌ o neive. Aꞌmine monovo goloso nene neꞌmino neive: Soza laaꞌ idoꞌ eveneꞌ mamuꞌ lizeboloꞌ molaaꞌ idoꞌ gumine ogaꞌ idoꞌ lolize gamazi laaꞌ idoꞌ gipe alu veneꞌ vemohoꞌ gopoꞌ napa ingiꞌmi monaaꞌ naniꞌ idoꞌ initekumuꞌ gililinga laaꞌ idoꞌ noso no sipaki ogaꞌ nevoꞌmine monovo nene hulilizave. Neꞌmine monovo ami monovo atoꞌ ma ilizaniꞌ monovo nene adoꞌ eveneꞌ monovo lamineꞌ i-ngimi lihime nii-ngidavo ma ingine lihimeꞌine di minami huli-ngidii hize eleꞌ o-ngedelineꞌ gamazivoꞌ lilizave. Neꞌmine ogaꞌ monovoutiꞌ ma nene do bizo mino makatoꞌ Oꞌmoso gulive do hozi lo nama laaꞌ ne neive. Veneꞌ ingine vaꞌninginemuꞌ nene gizebo vete neive li gilii gamaziꞌine gili dalizave. Vemohoꞌ ingine eleꞌningine muluꞌine ngimii monovo lamineꞌ i-ngimilizave. Izipe ingine gamene gamene izeꞌninge meꞌninge gamaziloꞌ gili dalizave. Izeꞌninge meꞌninge ingine gamene gamene izipahaꞌineliti luꞌine di goloso ami asi ingine naba igi minilizadaa eveneꞌ lamineꞌ minilizangumuꞌ ve li Guvelesi vemukisi idoꞌ eiꞌ monovoꞌvemukisi apizi ngimilizave. Gelekeleꞌ ve ingine gizebo veꞌinelite liliza gamaziloꞌ gili di mini gono amuzo mili di-ngidilizave. Gizebo ve ingine gelekeleꞌ izipeꞌine nene monovo goloso i-ngidamii asi monovo lisihekovoꞌ i-ngidilizave.

Idoꞌ neꞌmine lo Pauloꞌ tiꞌ lo gizineꞌ: Ingine nene Guvelesi velatiꞌ amuzo dalizave lineꞌ. Ve goloso Satani aza ngemenguꞌ molalosa alineꞌ gamenela nene ngivileꞌ amilingumuꞌ nene ingine Oꞌmosoꞌmo ngeme neineꞌ monovo lamineꞌ tamineꞌ mukiꞌ nene igi mili minilizave. Aꞌmine ve goloso Satani ivileꞌ ilizangumuꞌ igi mili minilizaniꞌ monovo nene adoꞌ gamazi laminetokovoꞌ laaꞌ idoꞌ lisiheꞌ lamineꞌ minaaꞌ idoꞌ Oꞌmososi evenekisi bizo makaꞌ lamineꞌ minaaliꞌmi gamazi nene eveneꞌ li-ngimaaꞌ idoꞌ Oꞌmosomuꞌ gele eleꞌvoleꞌ ogaꞌ idoꞌ Oꞌmosoꞌmo do nguꞌ izingumuꞌ gili minaaꞌ idoꞌ Oꞌmosoꞌmo lineꞌ gamaziloꞌ gili eleꞌvoleꞌ igaꞌ idoꞌ Oꞌmosola laaꞌ neꞌmine monovo nene igi mili minilizave lineꞌ.

Gamazi gize osuꞌ lolosa nene Oꞌmosola eikumuꞌ lilizave lo longoꞌ o-ngedoo idoꞌ Tikikoꞌni nene gamazi lo-ngemelive lo noimiseluve lo lo-ngimineꞌ. Neꞌmine ogo luhuvo niteꞌve nene noꞌnohoꞌ gamazitunuꞌ gizo osuꞌ lineꞌ ve.