2 Ka̱shile Dada u zagba ɗa̱ ta̱ ali m mani-mani,

ɗa kpamu Ayinviki a̱ Ka̱shile o bonokoi ɗa̱ ciɗa.

Adama a nannai,

ɗa i panakai Yesu Kishi ɗa mpasa n ni kpamu n za̱Ꞌi ɗa̱.

N yaꞋan ta̱ kavasa adama a na i ciya̱ ugaꞋin u Ka̱shile m ma̱ta̱na̱ ma̱ ni n a̱bunda̱i a wuma u ɗa̱.

3 Cikpai Ka̱shile,

vuza na wi Esheku e Yesu Kishi Vuzagbayin vu tsu.

Wi ta̱ n asuvayali ka̱u ɗa u matsasakai tsu kpamu usavu.

Adama a umaci u savu wa ɗaɗa ci n a̱pa̱Ꞌa̱ a na i n wuma,

ci ciya̱ ta̱ kpamu u ɗa adama a na a̱ ɗengusa̱ ta̱ Yesu Kishi a kasaun.

4 Umaci u savu wa feu u tuka̱ tsu ta̱ n agadu a na a̱ kuna̱mgba̱ ba,

i ta̱ ciɗa a ɗa ta na a ci yaꞋan matsafu ba.

Ka̱shile ki ta̱ n agadu a̱ ɗa̱ gaɗi,

wi a̱ kuka̱sa̱kpa̱ ili i saꞋwa a ɗa ba.

5 I neke baci a̱ɗu n Ka̱shile,

adama a utsura u ni,

wi ta̱ a̱ kusa̱nka̱ ili i gbani-gbani kusaꞋwa ɗa̱ ali u yotsongu wishi u ni a ayin a ukocishi.

Uma ra̱ka̱ i ta̱ o kokpo ngan n wishi u nam pa.

6 Ili i nam pa ya mayun ɗa u yotso ta̱ kpamu i yaꞋan ma̱za̱nga̱ n i ɗa.

Amma gogo na yi ta̱ o kusoꞋo atakaci o kukondo kakau ayin kenu.

7 Atakaci a a̱ ta̱wa̱ ta̱ adama a na o yotsongu uneki u ka̱ɗu u ɗa̱ ko mayun ɗa.

Uneki u ka̱ɗu u ɗa̱ wi ta̱ n ugaꞋin ka̱u,

u ɗa u laꞋa ta̱ ugaꞋin wa azanariya.

Akina a tsu zuwa ta̱ azanariya o okpo ciɗa amma ko n nannai a ɗa o tso okpo ta̱ ili i gbani a kubana megeshe.

A ayin a nan lo o yotsongu baci Yesu Kishi u yaba dem,

yi ta̱ a̱ kuciya̱ ucikpi,

n tsugbayin,

m babu kugoyi adama a uneki u ka̱ɗu u mayun u ɗa̱.

8 I ciga ta̱ Kishi ko a na i saꞋwai kene yi ba.

Ko an ye enei ni gogo na ba,

yu ushuku ta̱ n a̱yi.

Ko n gogo na kpamu yi ta̱ a̱ ma̱za̱nga̱ m mereve ma na yi a kufuɗa ya gisanku mayin ba.

9 Adama a na yu ushuku ta̱ n a̱yi,

yi ta̱ a kisa kuneꞋe ku wishi a wuma u ɗa̱.

10 Eneki a yaꞋan ta̱ kadanshi uteku u na Ka̱shile ko kuyotsongu ugaꞋin u ni wa̱ ɗa̱.

Ɗa kpamu o goɗumoi mayin sawu adama a na a̱ ciya̱ kuyeve ku wishi ku na Ka̱shile ki e kuneke ɗa̱.

11 Ayinviki a̱ Kishi i ta̱ n ele,

ɗa a yaꞋin kadanshi ka atakaci a̱ Kishi n tsugbayin tsu na feu ci a̱ kuta̱wa̱ wa̱ ni,

atakaci a a laza baci.

Eneki a ciga ta̱ e yeve ko wana ɗai,

n ko nini ɗai ili i nam pa ya i kuyaꞋan.

12 Ka̱shile ko yotsongu le ta̱ i a kadanshi ki ili i na i kuyaꞋan a ayin e le ba,

ili i nam pa mayun adama a̱ ɗa̱ a ɗa.

Gogo na Ka̱shile ka̱ suku ta̱ Ayinviki a̱ Ka̱shile a̱ ɓa̱nka̱ uma a a ayin a na a dansai Arabali a Singai wa̱ ɗa̱.

Ko alingata a ciga ta̱ e yeve kakuna ka nam pa.

13 Adama a ili i nam pa ra̱ka̱,

sheshei tsu na u yotsoi ka̱ta̱ i yongo n kureme ku ka̱ci ka̱ ɗa̱.

Sheshei uteku u na Ka̱shile ko kuyotsongu ugaꞋin u ni wa̱ ɗa̱ a ayin a na Yesu Kishi u kubono.

A ayin a na dem i ciɓai n kakuna ka nan lo yi ta̱ a̱ kuciya̱ a̱pa̱Ꞌa̱.

14 Panakai Ka̱shile adama a na muku n ni n ɗa yi.

Ka̱ta̱ kpamu i kucikpa i bono i yaꞋan ili i kavama uteku u na i yaꞋin ci cau ba.

A ayin a nan lo i yeve uteku u na i kuyaꞋan ili i singai ba.

15 Ka̱shile ka zagba ɗa̱ ta̱ yo okpo muku n ni,

gogo na kpamu mayun ɗa yo okpo ciɗa a̱ ubuta̱ wi ili i na yi a kuyaꞋan dem,

uteku u na Ka̱shile ki ciɗa.

16 Adama a na Ka̱shile a̱ ka̱ci ka̱ ni u dana ta̱,

“Mayun ɗa yo okpo ciɗa adama a na mpa mi ta̱ ciɗa.”^◊

17 Ciɓai a na kavasa ka̱ ɗa̱ ki a kubana u Dada vu gaɗi.

A̱yi ɗa keyevikafada,

u ci ciga uma m malaꞋansanai ba.

Wi ta̱ a kutakacika ko u yaꞋanka ɗa̱ kasingai adama a ili i na i yaꞋin.

Adama a nannai mayun ɗa i neke Ka̱shile tsugbayin a ayin a na yi o kuyongo an omoci aduniyan a nam pa.

18 I yeve ta̱ Ka̱shile ke neke ta̱ katsupu ka gbayin adama a na wi isa ɗa̱ a̱ ubuta̱ wu uye u kavama wi ida̱shi i na i tonoi,

adama a na ikaya i ɗa̱ i yaꞋan ta̱ nannai.

Katsupu ka na kpamu u tsupai ki tsa azanariya ko azurufa ba.

Ili i nan lo ya i ci yaꞋan megeshe ba.

19 U tsupaka ɗa̱ ta̱ nu mpasa n singai n Kirisiti Kishi.

A̱yi ɗa Ma̱giri ma alyuka ma̱ Ka̱shile ma na ma yaꞋin unushi ba ko kenu,

ko a̱shinda̱ kpamu wi n a ɗa ba.

20 Ka̱shile ka zagba yi ta̱ adama a kakuna ka nam pa n ayin a cau kafu aduniyan a̱ gita̱,

gogo na kpamu a ayin a ukocishi a nam pa,

Ka̱shile ka̱ suku yi ta̱ a aduniyan adama a na yaba dem we ene.

Ka̱shile kpamu ka yaꞋanka ɗa̱ ta̱ ili i nam pa ra̱ka̱.

21 Yu ushuku ta̱ n Ka̱shile gogo na adama a̱ Kishi.

Adama a na kpamu Ka̱shile ka̱ ɗengusa̱i Kishi a kasaun ɗa u nekei ni tsugbayin ka̱u,

yi ta̱ a kufuɗa ya̱ kushuku ka̱ta̱ i keɗe a̱pa̱Ꞌa̱ u Ka̱shile mayun.

22 Gogo na yi ta̱ a kufuɗa ya̱ ciya̱ ucigi u mayun a kubana wi itoku i ɗa̱ uteku u na uma a kpaꞋa ku te i a maciganai,

adama a na a zuwa ta̱ a̱ɗu a̱ ɗa̱ a yaꞋin ciɗa ana yu ushuki n Arabali a Singai a ili i mayun.

Adama a nannai i ciga aza a̱ ɗa̱ ka̱u,

n utsura dem u na wi a̱ a̱ɗu a̱ ɗa̱.

23 Ka̱shile ka zuwa ta̱ a matsasakai ɗa̱ kpamu.

Wuma u savu u ɗa̱ ta punu u ɗa wu uta̱i a̱ ubuta̱ wi isheku i ɗa̱ i na yi a aduniyan na ba,

adama a na wuma u na ele e nekei ɗa̱ wi ta̱ o kukotso a̱ ubuta̱ wu ukpa̱.

Amma wuma u savu u nam pa wi ta̱ o kuyongo babu uteku adama a na wu uta̱ ta̱ a̱ ubuta̱ u Kadanshi ka̱ Ka̱shile ka na ki n wuma,

kadanshi ka nan lo ta na ki o kukotso ba.

24 Keneki Ishaya u ɗanai:

“Uma ra̱ka̱ i ta̱ an mita̱ ma na ma̱ tsu kuwa̱ babu megeshe;

Kadanshi ka Vuzavaguɗu ka nam pa kpamu ka ɗaɗa Arabali a Singai a na tsu danai ɗa̱ va.