Ayin a ukocishi
3
Zuwa atsuvu vu pana.
A ayin a ukocishi atakaci i ta̱ a kuyaꞋan n a̱bunda̱i.
2 Ili i na i zuwai i ɗaɗa uma i ta̱ a kuciga ka̱ci ke le koci,
ka̱ta̱ kpamu a ciga ikebe i le.
I ta̱ o kokpo tukpa n kadanshi ka̱ a̱ra̱ɗi,
ka̱ta̱ o okpo aza a ugbami u kaci.
Ayin tutu o tso okpo ta̱ aza a kushika Ka̱shile.
I ta̱ o kugoyo mmaci n le,
ka̱ta̱ kpamu a iwan kuyaꞋan ogodiya a ili.
I ta̱ a kuꞋiwan kucikpa ili i Ka̱shile.
3 I ta̱ o kokpo babu maciganai,
ka̱ta̱ kpamu a iwan kucinukpaka uma unushi.
I ta̱ a kuyaꞋan aꞋuwa a kubana u uma,
ka̱ta̱ a̱ kpa̱ɗa̱ kufuɗa kuka̱na̱ kaci.
I ta̱ o kokpo aza a babu asuvayali,
ka̱ta̱ a iwan ili i singai.
4 I ta̱ e kudenge a̱ja̱Ꞌa̱ e le.
I ta̱ o kokpo aza a kuyaꞋan moloko mi ili babu kusheshe mayin,
ka̱ta̱ a shana tukpa n a̱ra̱ɗi a̱ ka̱ci ke le.
I ta̱ a kuciga ili i na a̱ɗu e le a panai uyoꞋo a na a ciga Ka̱shile.
5 I ta̱ a kuyaꞋan adanshi i ta̱ a kuyaꞋan i na Ka̱shile ki a kuciga,
amma a̱ kuka̱sa̱kpa̱ utsura u ni u sabaꞋa le ba.
YaꞋin daꞋin n icuꞋu i uma i nan lo.
6 IcuꞋu i uma a nam pa i tsu uwa ta̱ iꞋuwa n ka̱bini,
ka̱ta̱ a̱ ya̱nsa̱ a̱ma̱ci a na a̱ kpa̱ɗa̱i kushiya kaci,
aza a na ucanuku wu unushi u poloi ɗa kpamu kusheshe ku kavama ku lyaꞋi utsura u le.
7 A̱ma̱ci a nam pa,
o tsu tono ta̱ kuyotsongusu ku savu,
amma e yeve kadanshi ka mayun ba.
8 Nlum n nam pa kpamu n tsu shilika̱ ta̱ n kadanshi ka mayun uteku u na Jenesu n Jambarua a̱ shilika̱i m Musa.
A̱ɗu e le a̱ na̱mgba̱ ta̱,
uneki wa̱ a̱ɗu u le kpamu u mayun u ɗa ba.
9 Amma a kubana daꞋin ba,
adama a na yaba dem u kene ta̱ tsulau ci le.
Ta ka yaꞋin nannai n Jenesu koɓolo n Jambaru.
Bulusu u danai Timoti ili i kuyaꞋan
10 Amma avu Timoti,
vi yeve ta̱ ili i na mi o kuyotsongusu,
vi yeve ta̱ kpamu tsu na wuma u va̱ wi.
Vi yeve ta̱ ili i na mi a̱ kula̱nsa̱ n wuma u va̱.
Vi yeve ta̱ uneki u ka̱ɗu u va̱,
vi yeve ta̱ kpamu uteku u na n soꞋi atakaci.
Vi yeve ta̱ ucigi u va̱,
vi yeve ta̱ kpamu tsu na n lulukpa̱i n uremi u ka̱ɗu u va̱.
11 Vi yeve ta̱ icuꞋu ya atakaci i na i ciya̱i mu,
vi yeve ta̱ kpamu tsu na n lulukpa̱i adama a nan lo.
Vi yeve ta̱ ra̱ka̱ uteku u na a takacikai mu a Antakiya,
n Ikaniya koɓolo n Lisitira,◊
amma ɗa Vuzavaguɗu wu uta̱ka̱i mu a̱ ubuta̱ wi ili i nam pa ra̱ka̱.
12 Kadanshi ka nam pa ka mayun ɗa:
vuza na baci de dem u cigai kuyaꞋan ida̱shi n Yesu Kirisiti Kishi uteku u na Ka̱shile ka kupana uyoꞋo u ni,
u kusoꞋo ta̱ atakaci.
13 Amma uma a gbani-gbani n aza a̱ a̱da̱bu i ta̱ a kulyaꞋa kelime n ka na i a kuyaꞋan.
I ta̱ a kuya̱nsa̱ aza o yoku,
aza o yoku kpamu a̱ kuya̱nsa̱ le ta̱.
14 Amma avu,
lyaꞋa kelime n kuneke ka̱ɗu a̱ ubuta̱ wi ili i na nlum n nu n yotsongushi nu.
Vi yeve ta̱ kuyotsongusu ka mayun ɗa,
adama a na vi yeve ta̱ nlum n nu.
15 Ali ayin a na vi maku me kenu,
o yotsongusu wu ta̱ Katagarda ka̱ Ka̱shile,
ili i nam pa kpamu i ɓa̱nka̱ wu ta̱ ɗa vi ciya̱i ugboji,
ali ɗa vi ciya̱i wishi u na u tsu uta̱ a̱ ubuta̱ u kuneke ka̱ɗu u Yesu Kirisiti Kishi.
16 Iɗani ra̱ka̱ i na yi a Katagarda ka̱ Ka̱shile yu uta̱ ta̱ a̱ una̱ u Ka̱shile.
Kadanshi ka nam pa kpamu ki ta̱ n ugaꞋin adama a na ko yotsongusu tsu ili i na yi mayun,
ka̱ta̱ kpamu ka zuwa tsu kuyeve ili i na i na̱mgba̱i a̱ ubuta̱ u wuma u tsu.
Kadanshi ka̱ Ka̱shile ka nam pa ka tsu lapula ta̱ ida̱shi i gbani-gbani i tsu,
ka̱ta̱ ko yotsongusu tsu kuyaꞋan ili i na yi derere.
17 Nannai ɗa Ka̱shile ko tsu foɓuso tsu adama a ili dem,
adama a na ci ciya̱ ili dem i na ci cigai ka̱ta̱ ci yaꞋan ili i singai i na Ka̱shile ka cigai ci yaꞋan.