6
Aza o Kutoni e Yesu a na i agbashi e neke aza a gbayin e le tsugbayin.
A yaꞋan nannai ta lo uma a shika kula ku Ka̱shile n kuyotsongusu ku ni.
2 Aza o Kutoni a na i agbashi n azagbagbaꞋin a na feu i aza o Kutoni,
ka̱ta̱ na lo u zuwa kagbashi ka ka iwan kucikpa vuzagbayin vi ni ba.
Amma u kucikpa,
u yaꞋan ulinga ka̱u adama a na vuza na u kuciya̱ ugaꞋin wu ulinga wa vuza ni ɗa feu,
vuza na kagbashi ka ka cigai kpamu.
Ili i nam pa ya i ɗaɗa vo kuyotsongusu ka̱ta̱ vu dana aza o Kutoni a a yaꞋan.
Uciyi u mayun
3 Nlum ma aꞋuwa n yoku mi ta̱ a kufuɗa ma nana kuyotsongusu ku nam pa,
amma kuyotsongusu ku nam pa ku utsura ku ɗa ku mayun ku Vuzagbayin Yesu Kishi,
ɗaɗa kumiꞋi ku na ku tsu zuwa vuza u yaꞋan ida̱shi i na Ka̱shile ka cigai.
4 Vuza na de dem u yaꞋin kuyotsongusu ku yoku kau wi ta̱ n ugbamukaci ka̱u.
Wi feu n kuyeve ku mayun ba.
Vuma vu nan lo u ci yaꞋan ta̱ ma̱za̱nga̱ ma kavama n kadanshi ka kanananai ka na a yaꞋin dem.
U yaꞋan baci nannai,
ka̱ta̱ u gita̱ kanananai ka na ka kuzuwa uma maꞋiwanai n vishili.
U tsu zuwa le ta̱ feu a dansa kadanshi ka na ka̱ kula̱nga̱sa̱ uma,
ka̱ta̱ kpamu u zuwa le o yongo a mindanai n kusheshe ku kavama.
5 Uma a nam pa a ci yaꞋan ta̱ kadama ayin tutu.
A̱ɗu e le a i ta̱ n unata,
a tsu dansa kpamu kadanshi ka mayun ba.
A ci yaꞋan ta̱ kutoni adama a na a̱ ciya̱ uciyi koci.
6 Gogo na mayun ɗa uneki u ka̱ɗu u tsu ili i singai i ɗa ka̱u,
adama a na vuza wi baci n uneki u ka̱ɗu u nan lo wa wi ta̱ o kuyongo n ka̱ɗu ida̱shi mayun.
7 A ayin a na a matsai tsu,
tsu ta̱wa̱ n ili a aduniyan a nam pa ba.
Ta kpamu nannai a ayin a na baci tsu kuwa̱i,
ci a kuɗika ili ba.
8 Adama a nannai ci baci n ilikulyaꞋa nu ntogu n kuꞋuka,
u yotso ta̱ u yawa tsu nannai.
9 Amma uma o yoku a ciga ta̱ a̱ ciya̱ ili n a̱bunda̱i adama a na o okpo aza a̱ uciyi,
ka̱ta̱ ta na a̱ yikpa̱ a̱ ubuta̱ u kukondo ka̱ta̱ ta na a aza ka̱ci ke le adama a na a ciga ta̱ ili ya n umici ali ka̱ta̱ a uka ka̱ci ka̱ le a maza n kadama ka̱ta̱ a̱ la̱nga̱sa̱ ka̱ci ke le n uma a na a buwai.
10 Ili i na i zuwai i ɗaɗa ucigi wi ikebe u ɗaɗa ugiti wu unushi ra̱ka̱.
Uma o yoku kpamu a̱ puwa̱nka̱ ta̱ a̱ ubuta̱ wu uneki u ka̱ɗu,
ɗa ta na a̱ tuka̱i ka̱ci ka̱ le m ma̱shi adama a na a ciga ta̱ ikebe ka̱u.
Bulusu u yaꞋankai Timoti odoki
11 Amma Timoti,
avu vuza vu Ka̱shile ɗa.
Adama a nannai,
ka̱ta̱ vi yaꞋan daꞋin n ili i kavama i nam pa,
ka̱ta̱ kpamu vu tono ili i na yi derere ka̱ta̱ vi yaꞋan ili i singai.
YaꞋan ida̱shi adama a na Ka̱shile ka pana uyoꞋo u nu.
Yotsongu uneki u ka̱ɗu,
ka̱ta̱ kpamu vi yotsongu ucigi.
LyaꞋa kelime n kuyaꞋan ulinga,
ka̱ta̱ kpamu vi yaꞋan ulinga u nu n ka̱ɗu ida̱shi.
12 YaꞋan vishili adama a kasingai ku uneki u ka̱ɗu u tsu.
Reme n utsura,
wuma u babu uteku u na Ka̱shile ke nekei nu.
Vi yaꞋanka ta̱ ɗe uma n a̱bunda̱i kadanshi ka wuma u nam pa n utsura.
13 Mi ta̱ a kudana wu n utsura a̱ ubuta̱ u Ka̱shile,
vuza na u ci neke uma ra̱ka̱ wuma,
n dansuka wu ta̱ feu a̱ ubuta̱ u Yesu Kishi,
vuza na u nekei kadanshi ka mayun u Binutu Bilatu.
14 Ka̱ta̱ vu tono wila̱ u ni babu a̱shinda̱ ta lo vuza wa a shika wu.
Vi yaꞋan baci nannai vuza u kuciya̱ unushi a̱ nu ba,
sapu Vuzagbayin vu tsu Yesu Kishi u bono.
15 A ayin a yaꞋan baci derere Ka̱shile ki ta̱ o kuyotsongu Kishi gaɗi.
Ka̱shile endeꞋen a̱yi ɗa vuza na u yawai a cikpa yi,
a̱yi ɗa Uba̱nga̱ri Mogono.
A̱yi ɗa Mogono mo ngono a̱yi ɗa kpamu Vuzagbayin va azagbagbaꞋin.
16 A̱yi endeꞋen wi a̱ kukuwa̱ ba,
wi ta̱ kpamu ida̱shi a̱ ubuta̱ u kutashi ka̱u ali vuma wi lo vuza na u kuyawa ɗevu n a̱yi ba.
Vuza wi lo u saꞋwai kene yi ba,
wi kpamu e kene yi ba.
Ci neke yi tsugbayin n utsura ko wanai.
Ta nannai.
17 Dana aza a na i n uciyi a aduniyan a nam pa ka̱ta̱ a yaꞋan a̱ra̱ɗi ba,
ka̱ta̱ kpamu a zuwa utsura a̱ ubuta̱ wi ikebe i le ba.
Ikebe i nan lo yi ta̱ a̱ kuta̱wa̱ ya laza babu megeshe.
Amma e neke a̱ɗu e le u Ka̱shile vuza na wi n wuma vuza na kpamu u ci neke tsu n a̱bunda̱i adama a na ci ciya̱ ili i na ci a kuciga ka̱ta̱ ci yaꞋan ma̱za̱nga̱.
18 Dana le a yaꞋan ulinga n ikebe i le a yaꞋan kasingai.
A yaꞋan kawalatsu a̱ ubuta̱ wu ulinga u singai ka̱ta̱ kpamu e neke babu mogogu a̱ ubuta̱ wa aza a unambi.
Ayin tutu o yongo ufoɓushi adama a na e pece n aza o yoku ili i na Ka̱shile ke nekei le dem.
19 A yaꞋan baci nannai,
i ta̱ a kuzuwaka ka̱ci ke le uciyi gaɗi vu Ka̱shile.
Wi ta̱ o kokpo tsu kumiꞋi ku singai na kelime,
i ta̱ feu a kufuɗa kuciya̱ wuma u mayun gogo na.
20 Timoti,
vo okpo vuza vu kindi vi ili i na Ka̱shile ke nekei nu vu la̱na̱.
Iwan kuyongo ku kavama n aza a na i a̱ vishili n avu n kuyeve ku na a danai i n ku ɗa.
Kuyongo ku na lo ku ci cikpa Ka̱shile ba.
21 Uma o yoku a̱ puwa̱nka̱ ta̱ a uye u Ka̱shile adama o kutono kuyongo ku kavama ku nan lo.
Ka̱sa̱kpa̱ ugaꞋin u Ka̱shile u yongo n avu n aza o Kutoni a na i ɗe feu.