5
Uma a̱ va̱,
babu ili i na i kuzuwa mu n ɗanaka ɗa̱ nini ɗai n wana ɗai ili i nam pa ra̱ka̱ i kuyaꞋan,
2 adama a na i yeve ta̱ mayin a na kanna ko kubono ka Vuzagbayin vu tsu ki ta̱ a̱ kuta̱wa̱ tsu koboki n kayin.
3 A ayin a na uma i a kudana,
“Kakuna ki lo ba;
ili ra̱ka̱ yi ta̱ m ma̱ta̱na̱ m babu i na i kusaꞋwa le,”
ka̱ta̱ ma̱dukpa̱ ma̱ ta̱wa̱ le babu uzuki,
tsu na mɓa̱la̱ n limata n vuka n ci gita̱ a ayin a kumatsa maku a̱ ni a yawa baci ɗevu.
Babu tsu na vuza u kufa̱ta̱tsa̱ atakaci a nan lo.
4 Uma a̱ va̱,
yi n ka̱yimbi n ukuna u nam pa ba,
yi kpamu a kuyaꞋan mereve a kanna ka na Vuzagbayin u kuta̱wa̱ an koboki ba.
5 Ili i na i zuwai i ɗaɗa adama a na a̱ɗa̱ muku n kutashi n ɗa ra̱ka̱ koɓolo m muku n kanna kpamu.
A̱tsu aza a̱ ka̱yimbi a ɗa ba,
ci kpamu aza a kayin ba.
6 Indanai mayin,
ka̱ta̱ i lata tsa aza o yoku ba.
Yongoi ufoɓushi a kindi kpamu.
7 N kayin kaꞋa uma a tsu lata ka̱ta̱ kpamu a yaꞋan isoshi.
8 Amma a̱tsu na ci a̱ ubuta̱ u kutashi tsu ka̱na̱ ka̱ci ka̱ tsu.
Uteku u na kosoji ka ci isa ka̱ci ka̱ ni u shiya baci ma̱ra̱ga̱ ma̱ viyum u palai ma̱ka̱nga̱ ma̱ ni,
mayun ɗa ci isa ka̱ci ka̱ tsu Kalijani ka lapa tsu baci ka̱ta̱ ci lyaꞋa kelime n kuneke a̱ɗu u Yesu n kuciga aza o yoku.
Uteku u na kosoji ka ci isa ka̱ci ka̱ ni u uka baci ma̱kuꞋun mo kuvon,
ce kukeɗe ta̱ a̱pa̱Ꞌa̱ n ka̱ɗu ida̱shi a na Yesu wi a kisa tsu.
9 Sai ci yaꞋan ili i nam pa ya adama a na Ka̱shile ke sheshe ta̱ ka isa tsu a̱ ubuta̱ u Vuzagbayin Yesu Kishi ka̱ tsu.
A̱yi u yaꞋan wupa u ni a kubana wa̱ tsu ba.
10 Vuzagbayin Yesu u kuwa̱ ta̱ adama a̱ tsu ciya̱ ci yongo n a̱yi ali ayin a babu uteku.
Na lo va mayun ɗa ko ci n wuma ko ukpa̱ a ayin o kubono a̱ ni.
11 Adama a ili i nam pa ra̱ka̱,
dokushi utsura wa̱ a̱ɗu ka̱ta̱ i ɗengusa̱na̱i mayin,
tsu na i gita̱i kuyaꞋan ɗe.
Kuyotsongusu ku uteku
12 Uma a̱ va̱,
nekei tsugbayin wa aza a na i aza e kelime a̱ ɗa̱ a̱ ubuta̱ wu ulinga u Vuzagbayin.
A dakaka ta̱ kuyaꞋan ulinga a̱ ka̱tsuma̱ ka̱ ɗa̱,
a danai ɗa̱ kpamu ili i na i kpa̱ɗa̱i kugaꞋan i yaꞋan.
13 Nekei uma a nam pa tsugbayin ka̱u,
ka̱ta̱ i ciga le adama a ulinga u le.
A̱ɗa̱ kpamu n ka̱ci ka̱ ɗa̱ i yongo m ma̱ta̱na̱ uteku u ɗa̱.
14 Uma a̱ va̱,
i dansuka aza a na i orogo.
I dokusu aza o wovon utsura.
I tono sawu ka̱ta̱ yi inda aza a na utsura u le u gusa̱i.
I reme a̱ɗu n yaba dem.
15 I ka̱sa̱kpa̱ vuza u tsupa kawuya n kawuya ba,
amma i dakaka kuyaꞋan kasingai wa aza a̱ ɗa̱ koɓolo n yaba dem.
16 I yongo a̱ ma̱za̱nga̱ ayin tutu.
17 LyaꞋi kelime n kuyaꞋan kavasa.
18 Ko yi ɗa̱i i ciya̱i ɗa̱,
ayin tutu yaꞋin ogodiya,
adama a na i ɗaɗa i na Ka̱shile ka cigakai ɗa̱ a̱ɗa̱ vu na yi aza e Yesu Kishi.
19 Ka̱ta̱ i kpada Ayinviki a̱ Ka̱shile ba.
20 Ka̱ta̱ i yaꞋanka kene ulami ba,
21 amma i kondo ili dem i na a danai.
Ka̱na̱i gbam-gbam i na i gaꞋin.
22 Sumai ili i na yi i gbani-gbani dem.
23 Ci yeve ta̱ a na Ka̱shile ke ci neke ma̱ta̱na̱.
Kavasa ka̱ va̱ kaꞋa u kuzuwa ɗa̱ ta̱ yo okpo ciɗa n ili i na i buwai dem.
Kavasa ka̱ va̱ kaꞋa u kusa̱nka̱ ta̱ wuma u ɗa̱ n a̱ɗu a̱ ɗa̱ ra̱ka̱ n ikyamba a̱ ubuta̱ u kuyaꞋan unushi,
ali sai kanna ka na Vuzagbayin Yesu Kishi ka̱ tsu u kubono kpamu.
24 Vuza na u zagbai ɗa̱ va u yawa ta̱ a̱ ushuku n a̱yi,
wi ta̱ a kuyaꞋan ili i nam pa.
25 Uma a̱ va̱,
yaꞋin kavasa adama a̱ tsu.
26 Kya̱sa̱i aza o Kutoni a na i ɗe ra̱ka̱ m moɓongbonoi ma ciɗa.
27 N dana ɗa̱ n kula ku Vuzagbayin i kece akaka a nam pa u uma a na i a kpaꞋa ku Vuzagbayin ra̱ka̱.
28 N ciga ta̱ Vuzagbayin u yotsongu kasingai ka̱ ni a kubana wa̱ ɗa̱ ra̱ka̱.