Akaka a Iyain a̱ Bulusu a kubana wa
Aza o Tosolonika
Kuɓa̱yuwa̱
1
A̱tsu anan Bulusu n Sila koɓolo n Timoti tsu ɗana ta̱ akaka a nam pa a kubana wa aza o Kutoni a na i o Tosolonika.
Akaka a,
adama a uma a̱ Ka̱shile n Vuzagbayin Yesu Kristi Kishi a na i ɗe a̱ ubuta̱ wa.
N yaꞋan ta̱ kavasa ɗa n folonoi Ka̱shile ko yotsongu ɗa̱ kasingai ka̱ ni ka̱ta̱ u zuwaka ɗa̱ una̱singai m ma̱ta̱na̱!
Uma o Tosolonika i ta̱ n uneki wa̱ a̱ɗu
2 Ci cikpa ta̱ Ka̱shile ayin tutu adama a̱ ɗa̱ ra̱ka̱.
Ayin dem ci baci a kuyaꞋan avasa,
ci ci yaꞋan ta̱ a ɗa kpamu adama a̱ ɗa̱.
3 Ci yaꞋan baci kadanshi adama a̱ ɗa̱ a̱ ubuta̱ u Ka̱shile Esheku a̱ tsu,
tsu tsu dansa ta̱ ili i na i ci yaꞋansa adama a̱ uneki wa̱ a̱ɗu u ɗa̱,
ci yaꞋan ta̱ kpamu kadanshi adama a uteku u na i ci yaꞋan ulinga ka̱u,
adama a na yi ta̱ a kuciga uma,
ci ci yaꞋan ta̱ kpamu kadanshi uteku u na yi a kulyaꞋa kelime n kinda Vuzagbayin Yesu Kishi yi baci a̱ ka̱tsuma̱ ka atakaci.
4 A̱ja̱Ꞌa̱ a̱ va̱,
Ka̱shile ki ta̱ a kuciga ɗa̱,
a̱tsu feu ci yeve ta̱ u zagba ɗa̱ ta̱ adama a na yo okpo uma a̱ ni.
5 Ana tsu danai ɗa̱ Arabali a Singai,
n una̱ u ɗa koci ba,
amma koɓolo n utsura kpamu,
adama a na Ayinviki a̱ Ka̱shile e neke ɗa̱ ta̱ kuyeve gbende a na ili i na tsu dansai mayun ɗa.
Ana ci ida̱shi koɓolo n a̱ɗa̱,
ɗa ye enei tsu na ci o kuyongo adama a na tsu ɓa̱nka̱ ɗa̱ n ukuna kakau ra̱ka̱.
6 Ta nannai ɗa i piꞋisai kuyongo tsu na ci o kuyongo koɓolo kpamu n tsu na Vuzagbayin u yongoi.
Ali a̱ ka̱tsuma̱ ka atakaci a̱ a̱bunda̱i ɗa yi isai akaka a,
ɗa Ayinviki a̱ Ka̱shile a zuwai ɗa̱ kpamu i yongo m ma̱za̱nga̱.
7 Ta kpamu nannai ɗa yo okpoi agisana a uma ra̱ka̱ a na o tonoi Vuzagbayin a Makidoniya n Akataya.
8 Adama a̱ ɗa̱,
akaka a Vuzagbayin a̱ ka̱ra̱Ꞌa̱ ta̱ a̱ ubuta̱ dem a ukambu u nan lo,
ali a lazai a̱ ubuta̱ u nan lo wa dem.
Uneki wa̱ a̱ɗu u ɗa̱ u Ka̱shile uma e yeve ta̱ u ɗa a̱ ubuta̱ kakau.
Adama a nannai sai kpamu ci yaꞋan biꞋi kadanshi ka̱ ni ba.
9 Uma a̱ ka̱ci ke le o yongoi a kadanshi uteku u na i rabasai tsu mayin.
O doku a yaꞋin kpamu kadanshi tsu na i ka̱sa̱kpa̱i a̱ma̱li ɗa i bonoi kutono Ka̱shile ka mayun n ka wuma.
10 A yaꞋin kpamu kadanshi tsu na yi a kuvana kubono ku Maku ma̱ ni Yesu ma na mi a̱ kuta̱ gaɗi a̱ Ka̱shile.
Ka̱shile ka̱ ɗengusa̱i Yesu n wuma,
gogo na Yesu vu nan lo va wi ta̱ a kisa tsu a̱ ubuta̱ wa atakaci n afada a na i a̱ kuta̱wa̱.