2 LyaꞋi kelime n kavasa ayin tutu n a̱ɗu a̱ ɗa̱ a ufoɓushi n ogodiya a̱ a̱ɗu.

3 Ka̱ta̱ feu i yaꞋan avasa adama a̱ tsu.

YaꞋin avasa Ka̱shile ka̱ ɓa̱yuwa̱ uye adama a akaka a̱ tsu,

adama a na tsu dana uma ili yu usokongi i Kirisiti Kishi,

ili i na i zuwai ɗa mi ushiyi n ikani.

4 YaꞋin avasa adama a na n dansa akaka a nam pa e keteshe,

tsu na u gaꞋin.

5 Yongoi n ugboji yi baci koɓolo n aza a na i aza o Kutoni ba.

YaꞋin ulinga n ayin a̱ ɗa̱ mayin.

6 Dansai ili i singai ka̱ta̱ i zuwa kadanshi ka̱ ɗa̱ uma a̱ cuwa̱ n kaꞋa mayin,

tsu na kusaꞋan ki nu mkpaɗi.

Ɗaɗa u kuɓa̱nka̱ ɗa̱ i yeve uteku u na i kuneke wushuki u yaba dem vu na baci we ecei ɗa̱ kakuna.

7 Tikiku wi ta̱ a kudana ɗa̱ ukuna u va̱.

N ciga yi ta̱ ka̱u.

Ka̱ɓa̱nki kaꞋa ka na ki mayun a̱ ubuta̱ wi ili dem,

ɗa wi a kuyaꞋanka Vuzagbayin tsugbashi nu mpa.

8 N suku yi ta̱ a nwalu n singai n nam pa a kubana wa̱ ɗa̱ adama a na u dana ɗa̱ tsu na ci punu ka̱ta̱ kpamu u dokusu ɗa̱ utsura u ka̱ɗu.

9 Mi ta̱ feu a̱ kusuku Unisima.

A̱yi feu wi ta̱ n uneki u ka̱ɗu n vuza na n cigai kpamu ka̱u.

A̱yi vuza ɗa̱ ɗa.

I ta̱ a kudana ɗa̱ ra̱ka̱ ili i na yi punu na dem.

10 Arisataka wi ta̱ a ugbashi na nu mpa.

Wi ta̱ a̱ kukya̱sa̱ ɗa̱ feu,

koɓolo m Marukusu,

Baranaba vangu amma vi isheku kakau.

Tsu dana ɗa̱ ta̱ n ayin a ɗe i rabasa Marukusu ayin a na baci u ta̱wa̱i wa̱ ɗa̱.

11 Yesu vi yoku,

vuza na e ci ɗeke feu Yusutu,

wi ta̱ e kukya̱sa̱ ɗa̱.

Ele na ɗa a̱ ka̱tsuma̱ ka Ayahuda a na i o kutono Vuzagbayin Yesu aza a na ci koɓolo koci.

I ta̱ a kuyaꞋan ulinga nu mpa na adama o tsugono tsu Ka̱shile kpamu,

i ta̱ e kuneke mu kadanshi ku uremi u ka̱ɗu ka̱u.

12 Abafa ta wu uta̱i a̱ likuci i ɗa̱,

a̱yi feu kagbashi ke Yesu Kirisiti Kishi kaꞋa.

Wi ta̱ a̱ kukya̱sa̱ ɗa̱.

U ci yaꞋan ta̱ kavasa adama a̱ ɗa̱ n utsura.

U tsu folono ta̱ Ka̱shile ke neke ɗa̱ utsura derere,

adama a na i shamgba n utsura a̱ ubuta̱ wi ili i na Ka̱shile ka cigai ra̱ka̱.

13 Mpa a̱ ka̱ci ka̱ va̱ mi ta̱ a kudansa ukuna u ni tsu na u dakakai adama a̱ ɗa̱ n aza o Kutoni a na i a̱ likuci i Ladukiya n Harofoli.

14 Ka̱ja̱Ꞌa̱ ka̱ tsu ku usuɓi Luka,

vuza va̱ a̱guma̱,

wi ta̱ a̱ kukya̱sa̱ ɗa̱,

n Dima dem.

15 Adama a̱ Ka̱shile,

kya̱sa̱ka̱i mu aza o Kutoni a na i a Ladukiya,

koɓolo n vuka vu na e ci ɗeke Nifa n aza a na a tsu bana n a gasai a kpaꞋa ku ni.

16 Ayin a na baci i kotsoi kukece akaka a nam pa,

i neke aza o Kutoni a na i Ladukiya adama a na e kece feu.

Ka̱ta̱ a̱ɗa̱ i kece akaka a na n ɗanakai le.

17 Danai Arikibu kadanshi ka nam pa,

“Ka̱ta̱ vi yaꞋan ulinga u na Vuzagbayin u nekei nu gbende ali vu kotso.”

18 Mpa Bulusu,

n ɗanai ikya̱shi i nam pa n ekiye a̱ va̱.

Ciɓai n ikani i va̱.

YaꞋan kasingai ka̱ Ka̱shile ko yongo n a̱ɗa̱.