2 N folono ta̱ Afodiya koɓolo n Sitinka,

a̱ma̱ci e re a nam pa a panakpanai mayin adama a Vuzagbayin.

3 Avu toku vu ulinga vu va̱ ɗa vu mayun,

n folono wu ta̱ vu ɓa̱nka̱ le.

A dakaka ta̱ ulinga ka̱u koɓolo nu mpa adama a na a dana aza o yoku Arabali a Singai.

A yaꞋan ta̱ kpamu ulinga koɓolo n Kilementu n a̱ja̱Ꞌa̱ a ulinga a̱ va̱ a na a buwai.

Ka̱shile ka ɗana ta̱ ula a uma a nam pa ra̱ka̱ a katagarda ka uma a na i n wuma u babu uteku.

4 YaꞋin ma̱za̱nga̱ adama a Vuzagbayin ayin tutu.

Mi ta̱ kpamu o kudoku ma dana,

yaꞋin ma̱za̱nga̱!

5 Yongoi n asuvu a̱ yuwu u uma ra̱ka̱.

Ciɓai a na kuta̱wa̱ ku Vuzagbayin ku yawai ɗevu.

6 Ka̱ta̱ i muɗa̱ a̱ɗu adama a ili i yoku ba.

Amma vasai ka̱ta̱ i folono Ka̱shile ka̱ ɓa̱nka̱ ɗa̱ a̱ ubuta̱ wi ili ra̱ka̱.

YaꞋin ogodiya,

ka̱ta̱ i dana Ka̱shile ili i na i nambai.

7 I yaꞋan baci nannai,

i yeve ta̱ Ka̱shile ki ta̱ a kuzuwa a̱ɗu a̱ ɗa̱ o okpo m ma̱ta̱na̱.

Na va ɗaɗa ili i singai,

i ɗa i laꞋi ili i na ka̱ɗu ka vuma ke kuyeve.

Nannai ɗa Ka̱shile ka kinda a̱ɗu a̱ ɗa̱ n kusheshe ku ɗa̱ uteku u na yi o kuyongo a̱ ka̱tsuma̱ ka̱ Yesu Kirisiti Kishi.

8 Aza a̱ va̱,

a uteku n dana ta̱:

zuwai kusheshe ku ɗa̱ a ili i mayun n ili i tsugbayin n ili i na yi derere.

Sheshei ukuna wi ili i na yi ciɗa n ili yu ucigi n ili i na yi n tsuloboi.

Sheshei ukuna wi ili i na yi n ugaꞋin ka̱u ɗa kpamu i yawai a cikpa vuza.

9 Ka̱na̱i kuyaꞋan ili i na i piꞋisai a̱ va̱ ra̱ka̱.

Ka̱ta̱ kpamu i ka̱na̱ kuyaꞋan ili i na i panai n dansai ra̱ka̱.

Ka̱ta̱ kpamu i ka̱na̱ kuyaꞋan ili i na ye enei mu n yaꞋin ra̱ka̱.

Yi baci a kuyaꞋan ili i nam pa,

Ka̱shile ka̱ ma̱ta̱na̱ ki ta̱ o kuyongo n a̱ɗa̱.

10 N ayin a na a lazai ɗe i ɓa̱nka̱ mu ta̱,

ko a na yi a kuciga kuyaꞋan nannai ɗa ili i yoku i kpadai ali megeshe i doku i ciya̱ ka̱ba̱nga̱ ba.

Amma gogo na kpamu i ciya̱ ta̱ ka̱ba̱nga̱ ka na i kuɓa̱nka̱ mu kpamu,

mi ta̱ a̱ ma̱za̱nga̱.

11 N dansa ili i nam pa adama a na n nambai ili ba.

N yeve ta̱ uteku u na n kucuwa̱ n ili i na i ciya̱i mu dem.

12 N yeve ta̱ uteku u na vuza u ci yaꞋan,

u namba baci ili.

N yeve ta̱ kpamu tsu na vuza u ci yaꞋan,

u ciya̱ baci ili n a̱bunda̱i.

N yeve ta̱ tsu na a ci yaꞋan ma̱za̱nga̱ ayin dem.

N yeve ta̱ tsu na o ci yongo m ma̱za̱nga̱ n ilikulyaꞋa n a̱bunda̱i n tsu na o ci yongo m ma̱za̱nga̱ n kambulu kpamu.

N yeve ta̱ tsu na vuza u ci yongo m ma̱za̱nga̱ wi baci n ili n a̱bunda̱i ko babu ili.

13 Mi ta̱ a kufuɗa ma yaꞋan ili ra̱ka̱ adama a̱ ubuta̱ wu utsura u na Yesu Kirisiti Kishi u ci neke mu.

14 Amma ko n nannai,

i yaꞋan ta̱ kataci mayin adama a na i shamgba nu mpa a atakaci a na mi o kusoꞋo gogo na.

15 A̱ɗa̱ aza a̱ Filibiya,

i yeve ta̱ ɗe a̱ɗa̱ ɗa koci aza a na e nekei mu ikebe adama a na i ɓa̱nka̱ mu ana n tuka̱i ɗa̱ n Arabali a Singai ɗa n lazai a̱ kuta̱ o uɓon u Makidoniya.

Aza o Kutoni o yoku i lo a yaꞋin nannai ba.

16 Ko ayin a na mi ishi ɗe a Tosolonika i neke ta̱ ikebe u lazai kute.

17 Mi a kudansa ili i nam pa adama a na n doku mi isa kuneꞋe ku yoku wa̱ ɗa̱ ba.

Amma ili i na n cigai i ɗaɗa yi isa katsupu ka na ko yotsoi adama a kasingai ka na i yaꞋankai mu.

18 Gogo na nahannai n ciya̱ ta̱ ili i na n cigai ra̱ka̱.

Ali n ciya̱ ta̱ ili i na i laꞋi i na n cigai.

I suku ta̱ Abafaroda n kuneꞋe n a̱bunda̱i u tuka̱ mu,

mi isa ta̱ ku ɗa.

Alyuka a ɗa a̱ ma̱gula̱ni mayin,

Ka̱shile kpamu ki isa ta̱ a ɗa,

ɗa kpamu u panai uyoꞋo n a ɗa.

19 Ka̱shile ka̱ va̱ kpamu,

vuza na wi a̱ kula̱na̱ mu,

wi ta̱ feu e kuneke ɗa̱ ili i na yi a kuciga ra̱ka̱ n uciyi u tsugbayin u ni.

Uciyi u ni u ɗaɗa ili i na u nekei tsu a̱ ubuta̱ u Yesu Kirisiti Kishi.

20 Adama a ili i nam pa ra̱ka̱,

nekei tsugbayin u Ka̱shile Esheku a̱ tsu ko wanai.

Ta nannai.

21 Kya̱sa̱i aza o Kutoni e Yesu a Filibiya ra̱ka̱.

Aza a̱ va̱ a na i na i ta̱ ikya̱shi i ɗa̱.

22 Aza o Kutoni ra̱ka̱ a na a buwai feu i ta̱ ikya̱shi i ɗa̱.

Aza Kutoni a na i ulinga e kefeku ka Kaisa i ta̱ ikya̱shi i ɗa̱ kpamu mayin.

23 YaꞋan kasingai ka Vuzagbayin Yesu Kirisiti Kishi ko yongo n ayinviki a̱ ɗa̱.