Uciyi o mgbodo n ciꞋin
4
Ka̱shile,
n asuvayali a̱ ni,
u nekei tsu ulinga u nam pa ci yaꞋan.
I ɗaɗa i zuwai ɗa tsu kpa̱ɗa̱i koꞋo.
2 Ci iwain kuyaꞋan ili i wono ko yi usokongi.
Tsu ya̱nsa̱ vuza ba,
tsu sabaꞋa kuyotsongusu ku Ka̱shile ba.
Tsu dansa ta̱ mayun e kelime ka̱ Ka̱shile,
adama a na aza a na a buwai e yeve a na ci aza a̱ ma̱riki.
3 Uma o yoku e yeve baci Arabali a Singai a na tsu danai le va ba,
na lo wo okpo ta̱ urotu an uma a nan lo i ta̱ a̱ kukuwa̱.
4 Vuza vu gbani-gbani wi ta̱ lo,
vuza na wi a kulyaꞋa tsugono tsa aduniyan a nam pa.
MalyaꞋi maꞋa.
Ɗa u palai a̱ɗu a aza o yoku ɗa okpoi a̱yimba̱.
Uma a nam pa a̱ kpa̱ɗa̱i kuneke a̱ɗu,
adama a nannai e kene tsugbayin tsu kutashi ka Arabali a Singai ku na ki a kakana le ba.
A kufuɗa e yeve akaka a na tsu danai le a ukuna u tsugbayin tsu Kirisiti Kishi ba,
vuza na u yotsoi Ka̱shile derere.
5 Ana tsu banai a̱ kuka̱ra̱Ꞌa̱ kudana uma Arabali a Singai,
ka̱ci ka̱ tsu kaꞋa ci a kuyaꞋanka ba,
amma ci ta̱ a kudana uma,
Yesu Kishi Vuzagbayin ɗa.
Ili i na tsu fuɗai tsu danai adama a̱ ka̱ci ka̱ tsu koci i ɗaɗa a̱tsu ɗa agbashi a̱ ɗa̱,
adama a ili i na Yesu u yaꞋin adama a̱ tsu.
6 Ka̱shile kaꞋa ka danai,
“Ka̱sa̱kpa̱ kutashi kakana a̱ ka̱yimbi!”
U yotsongu tsu ta̱ ɗe a na kutashi ku nam pa ka ku ɗaɗa wakani punu a̱ a̱ɗu a̱ tsu adama a na ci yeve tsugbayin tsu Ka̱shile tsu na a̱shi e Yesu Kishi o ci yotsongu.◊
7 Ci ta̱ n uciyi u nam pa a̱ ubuta̱ u Ka̱shile,
amma a̱tsu na ci a̱ kuɓa̱na̱ uciyi wa ci ta̱ an mgbodo n na a maꞋi n ciꞋin.
Na va u yotsongu ta̱ a na utsura u gbayin wa ta wi u Ka̱shile,
a̱tsu ɗa ba.
8 A zuwai tsu a̱ ka̱tsuma̱ ka atakaci ka̱u,
amma a minjarangu tsu ba.
Ko an ci yevei ili i na tsa kuyaꞋan ba,
tsu ka̱sa̱kpa̱ ba.
9 E nekei tsu atakaci,
amma Ka̱shile ka̱ ka̱sa̱kpa̱ tsu ba.
Ayin o yoku a ɓasangu tsu ta̱ a iɗika,
amma a una tsu ba.
10 Tsu soꞋo baci atakaci nannai,
ayin tutu ikyamba i tsu i ci yotsongu ta̱ tsu na Yesu u soꞋi atakaci ana u kuwa̱i,
adama a na uma a fuɗa e ene wuma u Yesu a ikyamba i tsu.
11 E,
i ta̱ a kufuɗa kuna tsu a ayin a na e sheshei dem,
adama a na ci ta̱ a kuyaꞋanka Yesu tsugbashi.
Nannai ɗa uma a̱ kuciya̱ kene wuma u Yesu a ikyamba i tsu i na i kufuɗa kukuwa̱.
12 Tsu ushuku ta̱ kuyaꞋan kataci nannai ali a̱ ukpa̱,
adama a na i ciya̱ wuma.
13 A ɗana ta̱ a Katagarda ka Ciɗa,
“N yaꞋan ta̱ kadanshi adama a na n neke ta̱ ka̱ɗu.”◊
Ci ta̱ n uneki u ka̱ɗu icuꞋu i te,
ci yaꞋan ta̱ kpamu kadanshi adama a na ci neke ta̱ a̱ɗu.
14 Ka̱shile ka̱ ɗengusa̱i Vuzagbayin Yesu n wuma,
ci yeve ta̱ kpamu Ka̱shile ki ta̱ a̱ kuɗengusa̱ tsu koɓolo n Yesu.
Ka̱shile ki ta̱ a kuɗika tsu,
koɓolo n avu,
ka̱ta̱ ci shamgba e kelime ka̱ ni.
15 Ili i nam pa ra̱ka̱ adama a̱ ɗa̱ a ɗa.
Tsu na uma n a̱bunda̱i a̱ ciya̱i kasingai ka̱ Ka̱shile,
a kulaꞋa ta̱ n kuneke ogodiya ayin dem ka̱ta̱ kpamu Ka̱shile ka̱ ciya̱ tsugbayin n a̱bunda̱i.
Kuneke ku ka̱ɗu u Vuzagbayin
16 I ɗaɗa i zuwai ɗa tsu kpa̱ɗa̱i kuka̱sa̱kpa̱.
Ko a na ikyamba i tsu yi a̱ kukuwa̱,
ayinviki a̱ tsu i ta̱ a̱ kuciya̱ utsura u savu kanna dem.
17 Atakaci a na ci n a ɗa gogo na i gbayin ba,
i kpamu e kugeshe ba.
Amma i ta̱ a̱ kuɓa̱nka̱ tsu,
adama a na ci ciya̱ tsugbayin tsu na tsu laꞋi atakaci a̱ tsu ka̱u,
tsugbayin tsu nan lo ta na tso kukotso ba.
18 Tsu zuwa a̱shi a̱ tsu a̱ ubuta̱ wi ili i na ce enei ba,
amma a̱ ubuta̱ wi ili i na tsu kpa̱ɗa̱i kene.
Ili i na ci e kene ye kugeshe ba,
amma i na ci a̱ kukpa̱ɗa̱ kene yi o kukotso ba.