Uɗengi u Yesu Kishi a kasaun
15
Uma a̱ va̱,
gogo na n ciga ta̱ n ciɓaka ɗa̱ ukuna wa Arabali a Singai a na n yaꞋankai ɗa̱ kadanshi n ayin a ɗe.
Yi isa ta̱ n ayin a nan lo a,
uneki u ka̱ɗu u na yi n u ɗa gogo na adama a nan lo a ɗaɗa.
2 Arabali a Singai a nam pa a ɗa a kisa ɗa̱ i ka̱na̱ baci ili i na n danai ɗa̱.
I yaꞋan baci nannai ba,
uneki wa̱ a̱ɗu u ɗa̱ gbani ɗa wi.
3 N dana ɗa̱ ta̱ ili i na a danai mu.
Ukuna u na u laꞋi n kugaꞋan u ɗa na:
Kishi u kuwa̱i adama a unushi u tsu,
ta kpamu Katagarda ka Ciɗa ka danai nannai.
4 A̱ ciɗa̱ngi ni,
ɗa a kanna ka tatsu a̱ ɗengusa̱i ni n wuma,
ta Katagarda ka Ciɗa ka danai nannai.
5 U yotsongi ka̱ci ka̱ ni u Biturusu,
ɗa kpamu u yotsongi ka̱ci ka̱ ni u mukumitoni n ni uma Kupanazere.
6 Ana nannai u lazai,
ɗa kpamu u yotsongi ka̱ci ka̱ ni wa aza o Kutoni a̱ ni a na a laꞋi amangatawantawun (500) a̱ ubuta̱ u te.
Uma n a̱bunda̱i a na e enei ni a buwa ta̱ n wuma,
amma aza o yoku a̱ kuwa̱ ta̱ ɗe.
7 Ɗa kpamu u yotsongi ka̱ci ka̱ ni u Yakubu,
ɗa u doki u yotsongi ka̱ci ka̱ ni wa azusuki ra̱ka̱.
8 A kubana uteku ra̱ka̱,
ɗa u yotsongi ka̱ci ka̱ ni wa̱ va̱,
uteku u na a tsu matsa maku a ayin a na a gaꞋin a matsa yi ba.
9 Azusuki a na a buwai dem a laꞋa mu ta̱.
N yawa e ɗeke mu vuzavusuki ba,
adama a na mi ishi ta̱ n neke aza o Kutoni atakaci.
10 Amma kasingai ka̱ Ka̱shile ka zuwa mu ta̱ mo okpoi ili i na mi gogo na,
kasingai ka̱ ni ta na a kubana wa̱ va̱ ki gbani ba.
N dakaka ta̱ ulinga u na n laꞋi azusuki a na a buwai dem,
amma mayun ɗa,
kasingai ka̱ Ka̱shile ka ɗa ka yaꞋin ulinga wa,
mpa ɗa ba.
11 N dana ɗa̱ baci kadanshi ka̱ Ka̱shile ko azusuki a ɗa baci a danai ɗa̱ kadanshi ka̱ Ka̱shile ka,
ili i te i ɗa ra̱ka̱ ci a kadanshi,
i ɗa kpamu ili i na i nekei a̱ɗu.
A̱ ɗengusa̱ baci ta na a̱kpisa̱ ba?
12 Tsu dana baci uma a na a̱ ɗengusa̱i Kishi n wuma,
nini ɗai a̱ɗa̱ vi yoku i kudana aza a na a̱ kuwa̱i a̱ kuɗenga̱ n wuma ba?
13 Mayun ɗa baci,
na lo va u yotsongu ta̱ a̱ ɗengusa̱ Kishi n wuma ba.
14 A̱ ɗengusa̱ baci Kishi n wuma ba,
kudana uma kadanshi ka̱ Ka̱shile ka̱ tsu n uneki u ka̱ɗu u ɗa̱ dem gbani ɗa.
15 I baci a̱ kuɗengusa̱ a̱kpisa̱ n wuma ba,
ci yaꞋanka ta̱ uma aꞋuwa an tsu danai le Ka̱shile ka̱ ɗengusa̱ ta̱ Kishi n wuma,
ashe ta na u ɗenga̱ n wuma ba.
16 A̱ ɗengusa̱ baci a̱kpisa̱ ba,
a̱ ɗengusa̱ feu Kishi ba.
17 A̱ ɗengusa̱ baci ta na Kishi ba,
uneki u ka̱ɗu u ɗa̱ wo okpo ta̱ gbani,
a buwa ta̱ ta na a kuyaꞋanka ɗa̱ afada adama a unushi u ɗa̱.
18 Mayun ɗa baci,
to,
aza a na o okpoi aza o Kutoni ɗa a̱ kuwa̱i ɗe,
a̱ ciya̱ wishi ba.
19 Ci baci a kufuɗa kuneke Kishi a̱ɗu a̱ tsu adama a na wi isa tsu a wuma u nam pa koci babu u kelime,
ili ya asuvayali i ɗa wa̱ tsu n uma a na a buwai.
Ukuna u mayun tsu na a̱ kuɗengusa̱ a̱kpisa̱
20 Amma ukuna u mayun u ɗaɗa a̱ ɗengusa̱ ta̱ Kishi n wuma,
ɗaɗa urotu u na u yotsongi uma a na a̱ kuwa̱i a̱ ubuta̱ u Kishi i ta̱ a̱ kuɗengusa̱ le dem n wuma.
21-22 Uma ra̱ka̱ a̱ kuwa̱i adama a ili i na vuma vi te u yaꞋin,
adama a na A̱da̱mu u tuka̱i tsu n ukpa̱ ra̱ka̱.
Ta kpamu nannai a̱ kuɗengusa̱ uma n wuma adama a ili i na vuma vi te u yaꞋin.
Kishi wi ta̱ a̱ kutuka̱ tsu n wuma ra̱ka̱ feu.
23 Amma yaba dem i ta̱ a̱ kuɗengusa̱ yi n wuma m motononoi.
Kishi ɗa u gita̱i kuɗenga̱ n wuma.
Ayin a na baci Kishi u bonoi,
uma a̱ ni ra̱ka̱ i ta̱ a̱ kuɗengusa̱ le n wuma.
24 Nannai u laza baci,
ka̱ta̱ e yeve kukotso ka aduniyan ku yawa.
Kishi wi ta̱ a kuna irala i ni dem,
ka̱ta̱ u neke Ka̱shile Dada tsugono ci ni tsa.
25 Adama a na Kishi wi ta̱ a kulyaꞋa tsugono ali sai ayin a na u lyaꞋi irala i ni ɗa u bonokoi le ɗaka vi idasakpatsu i ni.
26 Vurala vi ni vu ukocishi vu na u kuna a̱yi ɗa ukpa̱.
27 Ana Katagarda ka Ciɗa ka danai wi ta̱ a kuzuwa ili dem yo okpo ɗaka vi ni,
Ka̱shile ki punu a̱ ka̱tsuma̱ ka nan lo ba.
Ka̱shile kaꞋa ka zuwai ili dem Kishi wo okpo mogono mi i ɗa.
28 Ayin a na baci u lyaꞋi ili ra̱ka̱,
ka̱ta̱ Maku ma ma zuwa ka̱ci ka̱ ni a̱ ka̱ca̱pa̱ ka̱ Ka̱shile,
vuza na u zuwai ili dem yo okpoi ka̱ca̱pa̱ ka̱ ni.
Ka̱shile ka lyaꞋa tsugono e kelime ki ili ra̱ka̱.
29 Aza a na a yaꞋankai kusumbu ka akucina adama a na a̱ ɓa̱nka̱ aza a na a̱ kuwa̱i tamkpamu,
nini ɗai ugaꞋin u ni wi?
A̱ ɗengusa̱ baci a̱kpisa̱ n wuma ba,
yi ɗa̱i i zuwai ɗa uma a yaꞋin kusumbu ka akucina adama e le?
30-31 A̱ ɗengusa̱ baci a̱kpisa̱ ba,
yi ɗa̱i i zuwai ɗa ayin tutu ci ci yongo ɗevu n ukpa̱?
Uma a̱ va̱,
n dana ɗa̱ mayun n ci yongo ta̱ e kene ukpa̱ n a̱shi a kanna dem.
Mayun ɗa kpamu uteku u na ma̱za̱nga̱ ma̱ va̱ mi adama a ili na Yesu Kishi Vuzagbayin vu tsu u yaꞋin a̱ ka̱tsuma̱ ka̱ ɗa̱.
32 A̱ ɗengusa̱ baci a̱kpisa̱ n wuma ba,
ugaꞋin we ne u ɗai n kuciya̱ punu n shilika̱ n aza a na i a Afisu,
nnama m gbani-gbani n nan lo?
A̱ ɗengusa̱ baci a̱kpisa̱ ba,
yi ɗa̱i ɗa tsa kukpa̱ɗa̱ kuyaꞋan ili i na uma a danai,
“YaꞋan ci lyaꞋa ka̱ta̱ tsu soꞋo,
adama a na mkpaꞋa ci ta̱ a̱ kukuwa̱.”
33 Ka̱ta̱ i ka̱sa̱kpa̱ uma a nan lo a o doro ɗa̱ ba.
I yeve ta̱ udani u na u danai,
“A̱ja̱Ꞌa̱ a gbani-gbani i ta̱ a̱ kula̱nga̱sa̱ ma̱riki ma̱ nu.”
34 Bonokoi kusheshe ku ɗa̱ a̱ ubuta̱ u singai,
ka̱ta̱ i ka̱sa̱kpa̱ kuyaꞋan ku unushi.
Panai wono a na aza o yoku a̱ ɗa̱ a̱ kpa̱ɗa̱i kuyeve Ka̱shile.
Uteku u na tso kokpo u Ka̱shile
35 Aza o yoku i ta̱ e kece,
“Nini ɗai a̱ kuɗengusa̱ a̱kpisa̱ n wuma?
IcuꞋu yi ikyamba ye ne i ɗai o kokpo n i ɗa?”
36 Keci ku tsulau ku ɗa na lo va.
Vi ca̱Ꞌa̱ baci icuꞋu a iɗika,
yi a̱ kuta̱ ka̱ta̱ i yaꞋan a̱vuku ba,
sai biꞋi i ɗa i kuwa̱.
37 IcuꞋu i na a̱ ca̱Ꞌi a iɗika i kuyotso a̱vuku a ayin a na i gbonguroi ba.
VicuꞋu vi ɗekpu ɗa koci vu na vi ca̱Ꞌi,
vu ɗaɗa vu kuyotso vilya ko ili i yoku.
38 Ka̱shile kaꞋa ka tsu zuwa vicuꞋu vu nan lo vu uta̱ ka̱ta̱ vi yaꞋan uteku u na u cigai,
vicuꞋu dem vi ta̱ o kutopo icuꞋu ya̱ a̱vuku a̱ ni.
39 Ikyamba yi ili i wuma yi ta̱ kakau.
Vuma wi ta̱ n ikyamba i ni kau.
Nnama mi ta̱ n ikyamba i le kau.
Nnu n adan i ta̱ feu n ikyamba i le kakau.
40 Ikyamba kakau yi ta̱ ɗe gaɗi,
ikyamba kakau feu yi ta̱ punu kpamu a aduniyan i na yi kau n i na yi gaɗi.
Tsuloboi ci ikyamba i gaɗi ci ta̱ kau,
n tsuloboi ci ikyamba ya aduniyan.
41 Kanna ki ta̱ n tsuloboi ci ni,
wotoi wi ta̱ n tsuloboi ci ni,
azangata i ta̱ n tsuloboi ci le kpamu kau;
a̱ ka̱tsuma̱ ka azangata ka tsuloboi ci le ci ta̱ kakau.
42 Tsu nam pa tsu ɗa ayin a na baci a̱ ɗengusa̱i a̱kpisa̱.
Ikyamba i tsu,
i na i kuwa̱i ɗa i shamai,
yi ta̱ o kokpo kau a ayin a na baci a̱ ɗengusa̱i i ɗa,
adama a na a ayin a nan lo o kudoku a̱ kuwa̱ ba.
43 Ayin a na baci a̱ ciɗa̱ngi ikyamba i tsu,
i ɗa yi n tsuloboi kpamu ba,
benle utsura.
Ayin a na baci Ka̱shile ka̱ ɗengusa̱i le n wuma,
i ta̱ o kokpo n tsuloboi n utsura kpamu.
44 Gogo na ele ikyamba i ɗa i na a maꞋi n kayala,
amma ayin a na baci a̱ ɗengusa̱i le,
i ta̱ o kokpo ikyamba i na Ayinviki a̱ Ka̱shile e nekei wuma feu.
Mayun ɗa ikyamba i na ci yevei yi lo,
mayun ɗa feu ikyamba i na Ayinviki a̱ Ka̱shile e nekei wuma yi lo dem.
45 Katagarda ka Ciɗa ka danai,
“A̱da̱mu vuma vi iyain u ciya̱ ta̱ wuma.”
Vuma vu ukocishi,
a̱yi Kishi,
wo okpoi ayinviki a na e ci neke wuma.
46 Ili i na i gita̱i kuta̱wa̱ i ɗaɗa ikyamba i na ci yevei,
ɗa yeve ikyamba ya ayinviki i ta̱wa̱i n ka̱ca̱pa̱.
47 Ka̱shile ke kenuki kayala ɗa u maꞋi A̱da̱mu vuma vi iyain.
Vuma vi ire tamkpamu ta ɗe wu uta̱i gaɗi.
48 Yaba dem a aduniyan wi ta̱ n ikyamba tsa̱ A̱da̱mu.
Yaba dem feu gaɗi wi ta̱ n ikyamba tsu vuza na wu uta̱i gaɗi va.
49 Tsu na ci gogo na tsa̱ A̱da̱mu,
vuma vu na a maꞋi n kayala,
kanna ke te ci ta̱ o kokpo tsu Kishi,
vuma vu na wu uta̱i gaɗi.
50 Uma a̱ va̱,
n ciga ta̱ i yeve ikyamba nu mpasa n tsu i nam pa,
yi ta̱ a kushama.
Ɗaɗa ikyamba ya i kuciya̱ tsugono tsu Ka̱shile ba,
tsu na ci babu uteku.
51-52 Gogo na mi ta̱ a kudana ɗa̱ ili yi usokongi i na Ka̱shile ko yotsongi tsu:
Ra̱ka̱ vu tsu ɗa tsa kukuwa̱ ba,
amma ayin a na baci a̱ lika̱i kavana ku uteku,
Ka̱shile ki ta̱ a kusabaꞋa tsu ra̱ka̱ kute an ulaɗi,
tsu na vi ci inda ili kute gipi.
A̱ lika̱ baci kavana ka,
i ta̱ a̱ kuɗengusa̱ a̱kpisa̱,
o kudoku a̱ kuwa̱ ta na ba,
ka̱ta̱ ra̱ka̱ vu tsu ci isa ikyamba i savu.
53 Adama a ikyamba i tsu i na ci yevei i na i kukuwa̱ ka̱ta̱ i shama,
yi ta̱ a kusabaꞋa i bono ci ikyamba i gaɗi i na i kukpa̱ɗa̱ kukuwa̱.
54 Ili i nam pa i yaꞋan baci,
ɗa ikyamba i tsu i na ci yevei i na i kukuwa̱,
i sabaꞋi i bonoi ci ikyamba i gaɗi i na i kukpa̱ɗa̱ kukuwa̱,
ka̱ta̱ e yeve Katagarda ka Ciɗa ka shana ta̱ mayun:
“Ukpa̱ u buwa ba!
UlyaꞋi wu utsura u shana ta̱!
55 Te ɗai ubuta̱ u na ukpa̱ u lyaꞋi utsura?
Te ɗai kpamu utsura u mataɗatsu mu ukpa̱ mi?”
56 Wila̱ u neke ta̱ unushi utsura,
ɗaɗa unushi u zuwai ukpa̱ u ciya̱ utsura u kuneke mɓa̱la̱.
57 Amma ci yaꞋanka ta̱ Ka̱shile ogodiya tsu na u ka̱sa̱kpa̱i Vuzagbayin vu tsu Yesu Kishi u neke tsu utsura u kulyaꞋa.
58 Uma a̱ va̱ a na n cigai,
adama a na Ka̱shile ka yaꞋin ili i nam pa ra̱ka̱,
shamgbai n utsura.
Ka̱ta̱ i ka̱sa̱kpa̱ ili i yoku i zuwa ɗa̱ i gba̱ɗa̱ ali i sherewengu ba.
Ayin tutu yi baci a kuyaꞋan ulinga u Vuzagbayin,
yo okpo aza a kuyaꞋan ulinga n utsura,
adama a na i yeve ta̱ ulinga u na yi kuyaꞋan adama a Vuzagbayin gbani ɗa ba.