3 Wushuki u na n ci neke aza a na a ci ciga kuyaꞋanka mu afada u ɗa na:

4 Ci ta̱ n utsura ci isa ilikulyaꞋa adama a ulinga u na ci yaꞋin.

5 Azusuki a na a buwai,

n amgbu a Vuzagbayin,

m Biturusu,

yaba dem wi ta̱ n vuka vi ni o kutono Kishi,

o tsu soku le ta̱ kpamu i baci a kuyaꞋan nwalu.

Ci ta̱ a kufuɗa ci yaꞋan feu nannai.

6 Mpa m Baranaba ɗa koci sai ci yaꞋan ulinga ci ciya̱ ikebe i na tsa kutsulaka ilikulyaꞋa?

7 Kosoji ka bana baci kuvon,

sai biꞋi u ɓa̱na̱ ka̱ci ka̱ ni?

Babu vuza na u kuyaꞋan vicimba ka̱ta̱ u kpa̱ɗa̱ kulyaꞋa ili i na u cimbai.

Babu maguɓi ma na ma̱ kukpa̱ɗa̱ kupisha mani mu ushiga u ni ka̱ta̱ u soꞋo.

8 N dansa ili i nam pa n utsura u va̱ ba,

amma Wila̱ u Ka̱shile ta feu u dansai nannai.

9 Ci kece ta̱ a̱ Wila̱ u na Musa u ɗanai:

“Ka̱ta̱ vu pala una̱ u kanaka m mojibo a ayin a na wi a kulapa ilya ba.”^a

Ana Ka̱shile ka dansai nahannai,

kusheshe ka anaka ku ɗa koci wi a kuyaꞋan?

A̱Ꞌa̱!

10 Kadanshi ka n a̱tsu ɗa wi a kuyaꞋan kaꞋa.

Vuza na baci dem u yaꞋin vicimba koɓolo n vuza na u lapai,

a ci yaꞋan ta̱ ulinga u le n a̱pa̱Ꞌa̱ a na i ta̱ a̱ kuciya̱ udariki wi ili i na a kyaꞋi va.

11 Ana tsu danai ɗa̱ akaka a,

i ta̱ tsu na a̱ ci ca̱Ꞌa̱ icuꞋu i Ka̱shile punu a̱ a̱ɗu a̱ ɗa̱.

Ci ta̱ n utsura ci isa ilikulyaꞋa ko ili i yoku kau wa̱ ɗa̱ wo okpo an katsupu ka̱ ɗa̱ a̱ kuta̱wa̱ wa̱ tsu.

12 I ɓa̱nka̱ baci uma o yoku a na a yaꞋankai ɗa̱ kadanshi ka̱ Ka̱shile,

a̱tsu tsu laꞋa le ta̱ biꞋi n utsura u na ci isa ili i nan lo.

Amma ka̱ta̱ tsu saꞋwa kuzuwa ɗa̱ i neke tsu nannai ba.

Tsu kucikpa,

tsu laꞋakai n i na ci n i ɗa adama a na ka̱ta̱ tsu kpada Arabali a Singai a̱ Kishi ba.

13 I yeve ta̱ ɗe aza a na a ci yaꞋan tsugbashi a̱ A̱Ꞌisa̱ a Gbayin ta ɗe a̱ ci ciya̱ ilikulyaꞋa.

Ta kpamu nannai anan ganu vu na a ci yaꞋan alyuka n ili i kuzuwa a katalikalyuka,

a̱ ci ciya̱ ta̱ punu uzuwi u le.

14 Ta kpamu nannai,

Vuzagbayin u dana ta̱ aza a na baci a danai uma Arabali a Singai,

ta ɗe feu a̱ kuciya̱ ilikulyaꞋa.

15 Amma n saꞋwa kuzuwa ɗa̱ i neke tsu nannai ba.

Mi kpamu a kuɗanaka ɗa̱ ili i nam pa gogo na adama a na i neke mu ili ba.

Me ene ta̱ u kulaꞋa ta̱ n kugaꞋan n kuwa̱ a na ya yaꞋanka mu nannai.

16 Mpa n yaꞋan a̱ra̱ɗi adama a na mi ta̱ a kudana uma Arabali a Singai ba.

Ulinga u nan lo u ɗaɗa u na Ka̱shile ka danai mu n yaꞋan,

sai ta na n yaꞋan u ɗa.

Ili ya atakaci i ɗa wa̱ va̱,

n yaꞋan baci ulinga wa ba.

17 Ishi baci n yaꞋan ulinga u nam pa adama a na mpa ɗa n zagbai u ɗa,

wi ta̱ a kulaꞋa n kugaꞋan i tsupa mu.

Amma mi ta̱ a kuyaꞋan ulinga u nam pa mayun adama a na Ka̱shile kaꞋa ke nekei mu u ɗa.

18 Katsupu ka̱ yi ɗa̱i n kisa?

Ka̱ba̱nga̱ kaꞋa ka na n kudana uma Arabali a Singai ba̱ri.

N saꞋwa kuzuwa uma ta na a tsupa mu adama a ulinga wa ba.

19 Mpa kagbashi ka vuza ka mi ba.

Amma m bonoko ta̱ ka̱ci ka̱ va̱ kagbashi u uma dem adama a na n ciya̱ uma n a̱bunda̱i.

20 Mi baci koɓolo n Ayahuda,

n ci yongo ta̱ ci le adama a na n ciya̱ le.

Wila̱ u Musa u ɗa i o kutono mayin,

amma u lyaꞋa tsugono wa̱ va̱ ba.

Mpa mi ta̱ o kutono Wila̱ derere adama a na n ciya̱ n ka̱na̱ le.

21 Ta kpamu nannai,

mi baci koɓolo n Aza̱ka̱yimbi,

n ci yongo ta̱ ci le,

n tsu tono Wila̱ ba,

adama a na n ciya̱ n ka̱na̱ le.

Na va wi a kadanshi ka na n goyoi wila̱ u Ka̱shile ba,

amma mi ta̱ o kutono wila̱ u Kishi.

22 Ayin a na baci mi koɓolo n aza a na uneki u ka̱ɗu u le u tsurakpai ba,

n ci yongo ta̱ adanshi uneki u ka̱ɗu u va̱ feu u tsurakpa ba,

adama a na n ka̱na̱ le.

N ci yongo ta̱ tsu na uma o ci yongo a̱ ubuta̱ u na de dem m banai,

adama a na n fuɗa n ka̱na̱ yaba dem tsu na n kufuɗa.

23 N ci yaꞋan ta̱ ili i nam pa dem adama a na n ka̱ra̱Ꞌa̱ka̱ Arabali a Singai,

ka̱ta̱ n ciya̱ ma̱za̱nga̱ adama a una̱singai u Ka̱shile.

24 Ciɓai,

i baci a kuyaꞋan malazanai mi ilaɗi,

yaba dem u tsu suma ta̱,

amma vuza te ɗa u kufuɗa wa lyaꞋa ka̱ta̱ u ciya̱ katsupu.

A̱ɗa̱ feu sumai nannai adama a na i ciya̱ katsupu.

25 Vuza na baci wi a kusuma a̱ ubuta̱ wi ilaɗi i malazanai wi ta̱ o kufoɓuso ka̱ci ka̱ ni adama a na u ciya̱ katsupu ko oroliko a̱ a̱vuku a na e kugeshe ba.

Amma a̱tsu tsu foɓuso ta̱ ka̱ci ka̱ tsu adama a na ci ciya̱ katsupu ka na ki ko wanai.

26 I ɗaɗa i zuwai n tsu suma magaba a kubana a kakariki ku uteku.

I ɗaɗa i zuwai ɗa n dakakai tsu vuza na u ci yaꞋan vishili n a̱kuꞋun adama a na u lyaꞋa,

tsu vuza na u tsu ɗengusa̱ a̱kuꞋun a̱ ni gbani ba.

27 N tsu foɓuso ta̱ ikyamba i va̱ ka̱ta̱ m bonoko i ɗa kagbashi ka̱ va̱ adama a na n kotso baci kudana uma o yoku Arabali a Singai,

ka̱ta̱ Ka̱shile ka̱ sa̱nka̱ mu katsupu ka ba.