Ulinga u na azusuki a yaꞋin
4
U gaꞋan ta uma a ɗika tsu a̱tsu agbashi e Kishi a ɗa,
aza a na Ka̱shile ke nekei ili i mayun i na yi usokongi.
2 Uma e neke baci agbashi ulinga a yaꞋan,
i ta̱ a kuciga le a yaꞋan u ɗa n ka̱ɗu ke te.
3 N tsu va̱,
n keɓece ko a̱ɗa̱ i yaꞋanka mu afada ba,
ko a̱ kunukafada a yaꞋanka mu afada.
N yaꞋanka biꞋi ka̱ci ka̱ va̱ afada ba.
4 N yeve ta̱ mi ta̱ n asuvu a singai,
amma ili i nam pa i zuwa mu mo okpo ciɗa ba.
Vuzagbayin ɗa vuza na u kuyaꞋanka mu afada.
5 Ka̱ta̱ i yaꞋan afada babu ayin a yawa ba,
vanai sai ayin a na Vuzagbayin u bonoi.
Wi ta̱ a̱ kuta̱ka̱ ili i na yi usokongi a̱ ka̱yimbi gogo na e keteshe,
ka̱ta̱ u palukpa ili yu usokongi i na uma i a mali a̱ a̱ɗu e le.
Ka̱ta̱ ayin a nan lo Ka̱shile ka cikpa yaba dem tsu na u gaꞋin.
6 Uma a̱ va̱,
n zuwa ɗa̱ ta̱ yi indana Apolosu nu mpa tsa agisana a ili i na mi a kadanshi,
adama a na a̱ɗa̱ feu i la̱na̱ ili i na ansa i a kudana,
“Tonoi ili i na a ɗanai a Katagarda ka Ciɗa koci.”
Ta lo ya cikpa vuza te i ka̱sa̱kpa̱ vuza te.
7 A̱ɗa̱ ɗa tamkpamu anan ya?
I dana ta̱ i laꞋa ta̱ aza o yoku a na i aza o Kutoni?
Yi ɗa̱i yi n i ɗa i na Ka̱shile ka̱ kpa̱ɗa̱i kuneke ɗa̱?
Ili i na yi n i ɗa ra̱ka̱ i Ka̱shile i ɗa baci,
yi ɗa̱i i zuwai ɗa yi a̱ra̱ɗi adanshi a̱ɗa̱ ɗa i yaꞋin i ɗa ra̱ka̱ n ka̱ci ka̱ ɗa̱?
8 I sheshe ta̱ yi ta̱ n ili ra̱ka̱ i na i cigai.
I sheshe ta̱ yi ta̱ n uciyi.
I sheshe ta̱ yo okpo ta̱ ngono,
amma n a̱tsu ba.
N ciga ta̱ yi ishi yo okpo ngono adama a na a̱tsu feu tso okpo ngono koɓolo n a̱ɗa̱.
9 Me ene ta̱ adanshi Ka̱shile ka zuwa tsu ta̱ azusuki tso okpo uma a na osoji e ci neke wono e keteshe,a
tsa aza a na i ugbashi a kuvana kilukpa̱.
Ci ta̱ tsu uma a na a tsu banka a̱ ubuta̱ u kuna e keteshe,
ka̱ta̱ uma n alingata dem e ene le a̱ kukuwa̱.
10 Uma a aduniyan a nam pa a dana ta̱ a̱tsu va alau a ɗa ci,
adama a na ci ta̱ a kuyaꞋanka Kishi ulinga.
Amma a̱ɗa̱,
i sheshe ta̱ yi ta̱ n ugboji adama a na yi ta̱ o kutono Kishi,
ashe ta na ba.
I sheshe ta̱ ci n a̱ɗu a ugbami ba,
a̱ɗa̱ i laꞋa tsu ta̱ a̱ɗu a ugbami,
ashe ta na ba.
I sheshe ta̱ uma i ta̱ e kuneke ɗa̱ tsugbayin,
amma e neke tsu tsugbayin ba,
ashe ta na ba.
11 Ali n gogo na ci ta̱ a kupana kakuli n kambulu.
Akashi a̱ tsu a na a karai a ɗa a buwai tsu koci.
Uma e nekei tsu atakaci ka̱u.
Ci m kpaꞋa ku ka̱ci ka̱ tsu ba.
12 Tsu dakakai adama a na ci yaꞋan ulinga n ekiye a̱ tsu.
Ayin a na baci uma a yaꞋankai tsu una̱,
a̱tsu tamkpamu ci yaꞋanka le una̱singai.
Uma e neke tsu baci atakaci,
a̱tsu tsu lulukpa̱ ta̱ n a ɗa.
13 Uma a dansa baci ili i gbani-gbani adama a̱ tsu,
a̱tsu tsu dansa ta̱ ili i singai adama e le.
Ali a̱ kuta̱wa̱ gogo na uma a ɗika tsu ta̱ an ka̱kiza̱ koɓolo kpamu n akama a tsuwaꞋa.
14 N ɗana ili i nam pa adama a na n ciga ɗa̱ ta̱ i pana wono ba.
N ciga ta̱ m ɓarangu ɗa̱ adama a na a̱ɗa̱ muku n va̱ n ɗa yi.
15 Uma a̱kpa̱n kupa (10,000) i ta̱ a kufuɗa kupiꞋisaka ɗa̱ ukuna u Kishi,
amma mpa ɗa esheku a̱ ɗa̱ koci.
Yo okpo ta̱ muku n va̱ ana n danai ɗa̱ ukuna u Yesu Kishi.
16 Adama a nannai n folono ɗa̱ ta̱,
tonoi agisana a̱ va̱,
ka̱ta̱ i yaꞋan tsu na mi a kuyaꞋan.
17 I ɗaɗa i zuwai ɗa mi a̱ kusuku maku ma̱ va̱ Timoti wa̱ ɗa̱.
A̱yi ɗa macigi ma̱ va̱,
kagbashi ka Vuzagbayin kaꞋa mayun.
Wi ta̱ a kuciɓaka ɗa̱ uteku u na n yongoi adama o kutono Kishi,
tsu na mi a kuyaꞋan kuyotsongusu ku va̱ a̱ a̱Ꞌisa̱ aza o Kutoni a na m banai dem.
18 Aza o yoku a̱ ɗa̱ i ta̱ a̱ra̱ɗi adama a na e sheshe ta̱ mpa mi a̱ kuta̱wa̱ me kene ɗa̱ ba.
19 Amma Vuzagbayin wu ushuku baci n kuta̱wa̱ ku va̱,
mi ta̱ a̱ kuta̱wa̱ babu megeshe.
N ta̱wa̱ baci mi ta̱ e kene ili i na aza a a̱ra̱ɗi a nan lo i a kuyaꞋan.
N kuyeve ta̱ an mayun ɗa baci yi n utsura a̱ ubuta̱ u Ka̱shile,
ko an kadanshi ka gbani ka baci i a kuyaꞋan n una̱.
20 Tsugono tsu Ka̱shile adama a kuyaꞋan kadanshi a ɗa koci ba,
amma adama o kuyongo n utsura u Ka̱shile.
21 Punu a̱ ka̱tsuma̱ ki ili i re i nam pa,
yi ɗa̱i i zagbai:
n ta̱wa̱ wa̱ ɗa̱ adanshi mi ta̱ m macaka ma mafabuka,
ko n ta̱wa̱ n ucigi n kuleꞋeshe?