Ka̱shile n Ayahuda
9
Mi ta̱ a kudana ɗa̱ mayun.
Mpa vuza vi Kishi ɗa,
aꞋuwa a ɗa mu ba.
Ayinviki a̱ Ka̱shile a ɗa i a kulyaꞋa tsugono a̱ ka̱ɗu ka̱ va̱,
ɗa kpamu wu ushuki a na ili i na mi a kudana mayun ɗa.
2 Ka̱ɗu ka̱ va̱ ka shana ta̱ n una̱mgbuka̱tsuma̱ nu mɓa̱la̱,
3 adama a uma a̱ va̱ a na i Ayahuda tsu va̱.
Ka̱shile ka yaꞋanka mu baci una̱ u wuya,
ɗa kpamu u pecei mu n Kirisiti Kishi,
adama a na a̱ ciya̱ wishi,
mi ta̱ a̱ kushuku gogoꞋo Ka̱shile ka yaꞋan nannai.
4 Ele ɗa uma a Israila,
aza a na Ka̱shile ka zagbai o okpo muku n ni.
U yotsonku le ta̱ tsugbayin ci ni,
ɗa u yaꞋin uzuwakpani kakau n ele.
U nekei le Wila̱ u Musa.
U danai le uteku u na a kuyaꞋan tsugbashi tsu mayun.
U zuwai le o okpo aza a na a kisa uzuwakpani u ni.
5 Ikaya i le uma a gbagbaꞋin a ɗa a̱ Ka̱shile,
Kirisiti Kishi a̱ ka̱ci ka̱ ni kpamu matsukaya me le maꞋa.
A̱yi ɗa kpamu Ka̱shile,
vuza na u ci lyaꞋa tsugono a̱ ubuta̱ wi ili dem,
ka̱ta̱ wi isa ucikpi ko wanai!
Ta nannai.
6 Mi a kudana Ka̱shile ka̱ kpa̱ɗa̱ ta̱ kuyaꞋan ili i na u yaꞋin uzuwakpani kuyaꞋan ba.
Amma a̱ ka̱tsuma̱ ka aza a Israila,
ra̱ka̱ vi le ɗa i uma a̱ ni a mayun ba.
7 A̱ ka̱tsuma̱ ka ntsukaya mi Ibrahim,
ra̱ka̱ vi le ɗa i muku n na Ka̱shile ka yaꞋankai uzuwakpani ba.
Ka̱shile ka danai ni,
“Muku mi Ishaku n ɗa koci e kukece ana ntsukaya n nu.”◊
8 Na va wi ta̱ o kuyotsongu uma dem a na i ntsukaya mi Ibrahim a ɗa i muku n Ka̱shile m mayun ba.
Muku mi Ibrahim m mayun ele ɗa aza a na o okpoi muku n Ka̱shile adama a uzuwakpani u na Ka̱shile ka yaꞋankai ni.
9 Na ɗaɗa uzuwakpani u na Ka̱shile ka yaꞋin:
“Ka̱ya̱ ko bono mi ta̱ o kubono,
Saratu kpamu wana ɗai u matsa maku mo kolobo.”◊
10 Maku ma nam pa Ishaku ma ɗaɗa akaya a̱ tsu.
Ana u gbonguroi,
ɗa u zuwai Rifikatu,
vuza na u matsai mpeshe.
11-12 Amma kafu Rifikatu u matsa,
Ka̱shile ka danai ni,
“Mokoshi ma̱ ni ma u kuyaꞋanka ta̱ vangu va tsugbashi.”◊
Ka nam pa ka yaꞋan ta̱ kafu muku ma n yaꞋan kasingai ko kawuya.
Ka̱shile ka yaꞋan ta̱ nannai ciya̱ vuza na u zagbai a̱yi ɗa vuza na u cigai adama e kusheshe ku ni,
amma adama a ili i na maku ma ma yaꞋin ba.
13 Uteku u na Katagarda ka Ciɗa ka danai,
“N ciga ta̱ Yakubu,
amma n iwan ta̱ Isuwa.”◊
14 Yi ɗa̱i wo tsa kudana adama a kakuna ka nam pa?
Ka̱shile ka yaꞋan ta̱ ili i na i kpa̱ɗa̱i kugaꞋan u yaba dem?
Ko kenu!
15 Ka̱shile ka danai Musa,
“N kuyotsongu ta̱ ugaꞋin u vuza na dem n cikalai,
ka̱ta̱ kpamu n yotsongu asuvayali u vuza na dem n cikalai.”◊
16 Ka̱shile ki ta̱ o kuyotsongu ugaꞋin u vuza na dem u cikalai,
amma adama a ili i na vuza va u kuciga ko u kuyaꞋan ba.
17 Katagarda ka Ciɗa ka danai a na Ka̱shile ka danai mogono ma Masar,
“N zuwa wu ta̱ mogono adama a ili i nam pa:
N ciga ta̱ n yotsongu utsura u va̱ wa̱ nu ka̱ta̱ ciya̱ kula ku va̱ ku ka̱ra̱Ꞌa̱ a aduniyan ra̱ka̱.”
18 Adama a nannai ye ene ta̱,
Ka̱shile ko tsu yotsongu ta̱ ugaꞋin wa aza o yoku adama a na tsu nan lo tsu ɗa u cigai,
ɗa kpamu u sheshei kuzuwa uma o yoku a yaꞋan n ugbamukaci.
Wupa u Ka̱shile n asuvayali a̱ ni
19 Vuza yoku wi ta̱ e kece,
“Nini ɗai Ka̱shile ka kudansuka tsu,
u zuwa tsu baci ci yaꞋan ili a uye u na u cigai tsu ci yaꞋan?”
20 Ka̱ta̱ vu dana nannai ba!
Ka̱ja̱Ꞌa̱ ka̱ va̱,
me ece wu,
“Avu ɗa vi ci yaꞋan ya ali ɗa va kuyaꞋan kanananai n Ka̱shile?
Mogbodo me ci ece ta̱ vuza na u maꞋi ni,
‘Yi ɗa̱i i zuwai ɗa vu maꞋi mu nahannai?’ ”
21 KamaꞋi ki ta̱ a kufuɗa ka maꞋa ili dem i na u cikalai kumaꞋa.
Wi ta̱ a kufuɗa wa ɗika ciꞋin tsa ka̱ta̱ u maꞋa ili i yoku adama a ulinga u gbayin,
ili i yoku kpamu adama a ulinga u ayin tutu.
22 Ta ki nannai n Ka̱shile.
Wi ta̱ n utsura u kuyotsongu wupa u ni,
ka̱ta̱ u zuwa uma e ene utsura u ni.
Amma ɗa u kucikpa u remei ka̱ɗu n aza a na a gaꞋin a̱ la̱nga̱sa̱ yi.
23 U yaꞋan ta̱ nannai a̱ ubuta̱ u kuyotsongu tsugbayin ci ni n a̱bunda̱i ana u panai asuvayali a uma a,
aza a na u foɓusoi n ayin a ɗe a isa tsugbayin ci ni.
24 A̱tsu ɗa ta na uma a nan lo a na Ka̱shile ke ɗekei va.
U zagbai tsu a̱ ka̱tsuma̱ ka Ayahuda,
nannai kpamu koci ba,
amma ɗa feu u zagbai tsu a̱ ka̱tsuma̱ ka Aza̱ka̱yimbi.
25 Tsu na Ka̱shile ka danai a katagarda ke keneki Hosiya:
“Aza a na i uma a̱ va̱ ba,
gogo na mi ta̱ e kuɗeke le uma a̱ va̱.
Mi ta̱ kpamu o kuyotsongu ucigi u va̱
u uma a nan lo a na n iwain n cacau.”◊
26 Tsu nan lo kpamu,
“A̱ ubuta̱ u na Ka̱shile ka danai le ɗe,
‘A̱ɗa̱ uma a̱ va̱ a ɗa ba,’
ta ɗe Ka̱shile ka wuma
ke kuɗeke le muku n ni.”◊
27 Na ɗa kpamu ili i na keneki Ishaya u danai adama a uma a Israila:
“Uma a Israila a yimkpa ta̱,
an kayala a̱ ka̱kina̱ ka mala,
amma uma ukeci a̱ ka̱tsuma̱ ke le ɗa a̱ kuciya̱ wishi.
28 Vuzavaguɗu wi ta̱ a kuyaꞋan gogoꞋo
ka̱ta̱ u takacika uma a aduniyan ra̱ka̱ gbende.”◊
29 Ishaya u danai kpamu:
“Vuzavaguɗu Uba̱nga̱ri u ka̱sa̱kpa̱i uma ukeci a ntsukaya n tsu o yongo n wuma.
Ta baci nannai ba,
ishi ta̱ a kuna tsu ra̱ka̱
tsu likuci i Sodom n Gomora.”◊
Aza a Israila n Arabali a Singai
30 Ashe yi ɗa̱i wo tsa kudana adama a ukuna u nam pa?
Ta ki nahannai:
Aza̱ka̱yimbi i a kugbagbala a̱ ciya̱ o bonoko ka̱ci ke le aza a̱ usuɓi u Ka̱shile ba,
amma Ka̱shile kaꞋa ko bonokoi le aza a̱ usuɓi,
adama a na e neke ta̱ a̱ɗu n a̱yi.
31 Uma a Israila a gbagbala ta̱ kutono Wila̱ ciya̱ o bonoko ka̱ci ke le aza a̱ usuɓi u Ka̱shile.
Amma a fuɗa ba.
32 Yi ɗa̱i a̱ kpa̱ɗa̱i kufuɗa?
Adama a na a dakaka ta̱ o bonoko ka̱ci ke le aza a̱ ma̱riki a̱ ubuta̱ wi ili i na i a kuyaꞋan,
a na e neke a̱ɗu n Ka̱shile ciya̱ u bonoko le aza a̱ ma̱riki.
A̱ ta̱ɗa̱tsa̱i a katali ka gbayin ka na ki a uye u le.
33 Uteku u na Ka̱shile ka danai a Katagarda ka Ciɗa:
“Panai!
Mi ta̱ a kuzuwa katali a Sihiyona◊
ka na ka tsu zuwa uma a̱ ta̱ɗa̱tsa̱,
ka na ki an kakpanlai ka na ka tsu zuwa le a̱ yikpa̱.
Vuza na u nekei ka̱ɗu n a̱yi wa kupana wono ba.”◊