Koko ka kapai Bulusu
28
Ana ci cipa̱i,
ɗa ci yevei ci ta̱ o kotogu ka Malita.
2 Ɗa uma a̱ likuci a a rabasai tsu mayin.
Adama a na uta̱ni wi ta̱ lo u yoꞋo ta̱ kpamu mini,
ɗa a tasuki akina adama a na ci nyashika.
3 Ana Bulusu u ɓolongi nɗanga a kuzuwa akina.
Ɗa koko ko yoku ka gbani-gbani ku uta̱i punu adama a usuɗukpi,
ɗa ka kapai ni e kukiye.
4 Ali ɗa uma a e enei koko ka ka saɓangi punu e kukiye ka ko toɗo ba,
ɗa a̱ ka̱na̱i madananai,
“Mayun ɗa vuma vu nam pa vuma vu ma̱ga̱la̱ka̱ ɗa.
Wu uta̱i biꞋi dikyai a mala,
ɗa koko ko doku ka kapashi ni.
Ali n gogo na,
ka̱ma̱li ka na ka tsu takacika umaa ka̱ ka̱sa̱kpa̱ vuma va n wuma ba.”
5 Ɗa Bulusu u vishuwa̱i kukiye ku ni,
ɗaɗa koko ka ka̱ yikpa̱i a akina.
U doku ta na u pana mɓa̱la̱ ba.
6 Uma a i ta̱ e kene ubuta̱ wa wi ta̱ a kushita,
ko gogo lo Bulusu va wi ta̱ a̱ kukuwa̱.
Ɗa a̱ ka̱na̱i kusaka yi,
ali a kubana megeshe,
amma e ene ili i yaꞋan yi ba.
A ayin a nan lo,
ɗa uma a ka̱na̱i kusheshe adama a̱ Bulusu,
ɗa a danai,
“Bulusu va ka̱ma̱li kaꞋa.”
7 O kotogu ka lo,
kula ku gomuna ku ɗaɗa Babiliya.
Wi ta̱ n kashina ka gbayin ɗevu n ubuta̱ u na ci yawai o kotogu ka.
Babiliya vuma vu singai ɗa vuza na u ci ciga omoci ɗa u rabasai tsu,
ali ɗa ci yaꞋin ɗe ayin a tatsu a kpaꞋa ku ni.
8 Esheku a̱ ni i ta̱ babu alafiya ivaꞋin wana ɗai a saɓanai n kuta̱nu n kucaru,
ɗa Bulusu u banai adama a na we ene yi.
Ɗa u ba̱ra̱kpa̱i kukiye ku ni,
u yaꞋankai ni kavasa,
ɗa u potsokpoi ni.
9 Ana vuza vu mɓa̱la̱ va u potsoi,
ɗa a̱ ka̱na̱i kutuka̱ yi n aza a̱ mɓa̱la̱,
ɗa u ka̱na̱i kupotsokpo le.
10 Uma a a yaꞋanka tsu ta̱ ili i ma̱riki n a̱bunda̱i,
ana ci a kulaza a kubana a̱ ubuta̱ u kpantsu,
ɗa a yaꞋankai tsu kuneꞋe ku singai.
A ɗikai Bulusu a kubana o Roma
11 A̱tsu ci shamgba ta̱ a Malita ali wotoi u tatsu.
Ɗa kpantsu ku yoku lo kashani adama a na nwalu n gaꞋan n lyushi ba.
Ana lyushi i kotsoi,
ɗa ra̱ka̱ vu tsu ɗa tsu uwai a kpantsu ku nan lo ka ku likuci i Isakandariya.
E kelime ka kpantsu ka lo,
ɗa e sheꞋwei agisana a̱ a̱ma̱li e mpeshe ula e le a ɗaɗa Kasata m Poluku.
12 Ɗa ci yawai a̱ likuci i Sirakusa ɗa ci yaꞋin ɗe ayin a tatsu.
13 Ɗa tsu ka̱sa̱kpa̱i Sirakusa ɗa ci yaꞋin nwalu a kubana a̱ likuci i na e ci ɗeke Rigiyumu.
Ana kayin ka asai,
ɗa wunla̱i wu uta̱i ɗaka ɗa u tecengi kpantsu ka,
ali ci yawai a̱ likuci i Batiyoli.
14 Ɗa ci cinai aza o Kutoni o yoku ɗe Batiyoli,
ɗa o folonoi tsu ci shamgba ɗe koɓolo.
Ɗa ci yaꞋin ayin e cindere ɗe,
ɗa tsu ka̱sa̱kpa̱i ubuta̱ wa,
ɗa tsu banai a̱ likuci i Roma.
15 Aza o Kutoni a na i ɗe Roma e yeve ta̱ a na ci lo a̱ kuta̱wa̱,
ɗa a banai ɗa a gasai n a̱tsu e Kuden ka Apiyasu adama a na a rabasa tsu.
Aza o yoku o ɓolongi n a̱tsu a̱ ubuta̱ u na e ci ɗeke IꞋuwa yo Omoci i Tatsu.
Ana Bulusu we enei le,
ɗa u yaꞋin kavasa ɗa u cikpai Ka̱shile ɗa u ciya̱i katsura.
Kadanshi ka̱ Bulusu o Roma
16 Ana tsu uwai a̱ likuci i Roma,
ɗa a̱ ka̱sa̱kpa̱i Bulusu u da̱sa̱ngu endeꞋen ni a kpaꞋa n kosoji ka na ki a kinda yi.
17 Ana ci yaꞋin ayin a tatsu,
ɗa Bulusu u ɗekei nkoshi m gba̱ra̱-gba̱ra̱ ma Ayahuda lo,
ɗa u danai le,
“Aza a̱ va̱,
a̱ ka̱na̱ mu ta̱ a Urishelima,
ɗa e nekei mu a̱ ubuta̱ wa aza o tsugono tsa aza o Roma.
Mpa n yeve ta̱ n yaꞋan unushi u yoku a kubana u uma a̱ tsu,
ko n nusa a̱ ubuta̱ wa agadu wi ikaya i tsu ba.
18 Aza o Roma a̱ la̱na̱ ta̱ a cina mu n unushi ba,
ali ele va a ciga ta̱ kuka̱sa̱kpa̱ mu.
19 Amma Ayahuda a̱ kpa̱ɗa̱i kushuku.
Mpa ta na me ene ta̱ n ɗika kadanshi ka u Mogono Kaisa,
amma n ciga kubanka aza a̱ va̱ a̱ ubuta̱ wa afada ba.
20 I ɗaɗa i zuwai ɗa mpa n ɗekei ɗa̱ i ta̱wa̱i na,
adama a na ci yaꞋan kadanshi.
A shiya mu ta̱ n ikani,
adama a na n dana ta̱ mayun ɗa vuza na wi n a̱pa̱Ꞌa̱ a̱ Israila u yawa ta̱ ɗe.
A̱yi ɗa Yesu Kishi Kawawi.”
21 Ɗa ele ta na a danai,
“Tsu pana kadanshi ka gbani-gbani ko akaka o yoku a na a̱ uta̱i a Yahuda adama a̱ nu ba,
ko ci ciya̱ akaka a uɗani wa aza a na a yawai na.
22 Amma ci ta̱ a kuciga tsa pana ili i na avu vi nekei ka̱ɗu ka̱ nu.
Ili i na ci yevei adama a uma a uye u savu u nam pa,
i ɗaɗa uma o ci yongo a kuyaꞋan kadanshi ka gbani-gbani adama e le.”
23 Ɗa a zuwai ayin a na a̱ kuta̱wa̱ a gasa m Bulusu,
ɗa uma n a̱bunda̱i a̱ ta̱wa̱i u Bulusu a kpaꞋa ku ni.
Ali n usana a kubana kanna ka̱ kulivi,
ɗa ta na Bulusu u ka̱na̱i kuyaꞋanka le kadanshi ko tsugono tsu Ka̱shile.
Ɗa u ka̱na̱i kuyaꞋan ulinga n atagarda a̱ Wila̱ u Musa n atagarda e Eneki adama a na u zuwa le o tono Yesu.
24 Aza o yoku a̱ ushuku ta̱ n Yesu,
aza o yoku ta na a̱ ushuku ba.
25 Ɗa a̱ ka̱na̱i kanananai uteku u le a̱ ka̱na̱i kubana n o bonoi.
Ana i a kulaza ɗa Bulusu u danai le,
“Ayinviki a̱ Ka̱shile a dana ta̱ mayun,
ana a dansai ukuna wi ikaya i tsu a̱ ubuta̱ u keneki Ishaya,
u danai,
“Ka̱shile ka dana mu ta̱,
26 ‘Bana,
vu dana uma a̱ va̱,
yi ta̱ a kupana kadanshi ka̱ va̱,
amma i kuyeve kaꞋa ba.
Yi ta̱ e kene ili i na mi a kuyaꞋan,
amma ya kufuɗa ye kuyeve ili i na mi a kuyaꞋan ba.
27 Ra̱ka̱ vu ɗa̱ yi ta̱ n a̱ɗu a ugbawansuvu.
Atsuvu a̱ ɗa̱ dem i ta̱ uvotsuki,
a̱shi a̱ ɗa̱ kpamu a ɗa i ta̱ upali,
ye kene ili ba,
ya kupana ba,
benle i yeve i ɗa ko i ciga kuyeve.
Ishi baci i fuɗa ya yaꞋan nannai,
yi ishi o kubono wa̱ va̱,
mi ishi o kupotsokpo ɗa̱.’◊
28 “Adama a nannai,
mi ta̱ a kuciga i yeve wishi u nam pa wa u Ka̱shile u ɗa a kubana u yaba dem,
Aza̱ka̱yimbi kpamu,
i ta̱ feu a kisa u ɗa gbani.” [
29 Ana u kotsoi kadanshi ka nan lo,
ɗa Ayahuda a lazai.
Ɗa a lyaꞋi kelime n kanananai uteku u le.]
30 Ɗa Bulusu u da̱sa̱ngi a kpaꞋa ku na u kutsupa ikebe ali a̱ya̱ e re.
Ɗa u ka̱na̱i kpamu kisa uma a na a̱ ka̱na̱i kuta̱wa̱sa̱ wa̱ ni adama a na e ene yi.
31 Ɗa u ka̱na̱i kudana uma ukuna u tsugono tsu Ka̱shile babu wovon,
n u yotsongi uma ukuna u Vuzavaguɗu Yesu Kishi.
Babu vuza na kpamu u kusa̱nka̱ yi.