Filiku u yaꞋankai Bulusu afada
24
Ana ayin a tawun a lazai,
ɗa uma o yoku a banai a Kasariya adama a na a banka nu nsata m Bulusu.
Ele ɗa anan Hananiyan mogono ma anan ganu,
n aza a̱ gba̱ra̱-gba̱ra̱ a Ayahuda o yoku,
n keyevika̱wila̱ ko yoku e ci ɗeke yi ta̱ Tatulu.
2 Ana e ɗekei Bulusu punu asuvu,
ɗa Tatulu u danai vuzagbayin vi iɗika kadanshi ka na i a kushikasa Bulusu.
U danai,
“Vuzagbayin Filiku,
vu tuka̱ ta̱ n aza a̱ tsu m ma̱ta̱na̱ ali a̱ya̱ n a̱bunda̱i a na vi yaꞋin tsugono.
Vi yaꞋan ta̱ kpamu ulinga n kuyeve ku nu adama a na vu tuka̱ n kusabaꞋa ki ili a iɗika i tsu n ubuta̱ u uma a̱ tsu dem.
3 Uma dem a yaꞋanka wu ta̱ ogodiya m ma̱za̱nga̱ babu uteku n kula adama a ili i singai i na vi yaꞋin,
Filiku.
4 Amma mi ta̱ ufolu u nu n ciga mo oꞋuso wu ba adama a̱ ma̱riki ma̱ nu.
Panaka mu ili i na n kutonuko wu,
adama a vuma vu nan lo n ili i na u yaꞋin.
5 Ci ciya̱ yi ta̱ a̱ kuɗengusa̱ a̱ɗu a uma.
Vuma va a̱yi ɗa vuza na u tsu zuwa Ayahuda o yongo a̱ kuɗengusa̱ vishili a̱ ubuta̱ u tsugono tsa aza o Roma.
A̱yi ɗa vuzagbayin va aza a̱ vishili a na e ci ɗeke Aza a Nazara.
6 U saꞋwa ta̱ kuyaꞋan ili i na yi ili i wono a kubana a̱ ubuta̱ wa̱ A̱Ꞌisa̱ a Gbayin a̱ tsu. [
7 Ci ishi ci ciga kuyaꞋanka yi afada uteku u na Wila̱ u tsu u danai,
amma ɗa Lisiya jagaba vo osoji u fa̱ba̱na̱i ni wa̱ tsu n utsura.
Amma ɗa Lisiya va u danai tsu tsu ta̱wa̱ wa̱ nu,
tsu dana wu unushi u na u yaꞋin dem a̱ ubuta̱ wa afada u nu.]
8 A̱yi ta na wi ta̱ a kudana wu ili i na u yaꞋin va mayun n una̱ u ni,
ve ecei baci mayin.”
9 Ɗa Ayahuda a na a buwai,
a̱ ushuki n ili i na Tatulu va u danai,
ali ɗa a danai mayun ɗa.
Bulusu wu ushuki Gomuna Filiku
10 Ɗa gomuna va u nekei Bulusu va ka̱ba̱nga̱ u yaꞋan kadanshi,
ɗa u danai,
“Vuzagbayin,
n yeve ta̱ avu ayin dem vi ci yaꞋanka ta̱ uma afada a singai.
Mpa n yaꞋan ta̱ ma̱za̱nga̱ ana a fuɗai a̱ tuka̱i mu a̱ ubuta̱ wa afada u nu,
n yaꞋan kadanshi n ka̱ci ka̱ va̱.
11 Vi inda baci,
ayin a laꞋa kupa n e re ba,
ana n ta̱wa̱i a Urishelima adama a na n cikpa Ka̱shile a̱ A̱Ꞌisa̱ a Gbayin.
12 Mpa n yaꞋan kanananai n vuza a̱ A̱Ꞌisa̱ a Gbayin ba,
ko n yaꞋan vishili ko a̱ kunu ka avasa,
ko a̱ likuci.
13 Uma a nam pa a a kufuɗa a dana ili i na a danai adama a̱ va̱ mayun ɗa ba.
14 “Mu ushuku ta̱ mayun ɗa n tono Uye u Vuzagbayin,
amma ɗa a danai uye u nam pa u mayun u ɗa ba.
Mi ta̱ o kutono Ka̱shile ki ikaya ka̱ tsu.
N tono ta̱ kpamu Wila̱ u Musa n ili i na Eneki a ɗanai.
15 Mi ta̱ n a̱pa̱Ꞌa̱ a̱ ubuta̱ u Ka̱shile wi ta̱ a̱ kuɗengusa̱ aza a̱ usuɓi n aza a gbani-gbani dem a kasaun,
uteku u na aza a kadanshi a nam pa a a danai.
16 Adama a nannai n ci yongo ta̱ mayin n Ka̱shile koɓolo n uma dem.
17 “N ka̱sa̱kpa̱ ta̱ Urishelima ali a̱ya̱ n a̱bunda̱i.
N bono ta̱ n ikebe adama a na m ɓa̱nka̱ aza a̱ va̱.
M bono ta̱ kpamu adama a na n yaꞋanka Ka̱shile alyuka.
18 Aza a na i a kushika mu gogo na,
a ayin a na e enei mu a̱ A̱Ꞌisa̱ a Gbayin,
mi ta̱ a kushatangu a̱ ka̱ɗiva̱ ka na ko okpoi mu mayun n yaꞋan adama a na n takpa nshinda̱.
Uma i lo ɗevu nu mpa ba,
babu vuza na u shilika̱i.
19 Ayahuda o yoku a na a̱ uta̱i a iɗika i Asiya feu,
i ta̱ lo a̱ ubuta̱ wa i baci a kuyaꞋan kadanshi ka wi ishi u gaꞋan a yaꞋan lo.
20 Uma a na i na a dana wu unushi u na n yaꞋin,
a dana wu kpamu i na a̱ ciya̱i n yaꞋin a̱ ubuta̱ wa Aza e Kusheshe,
a ayin a na a yaꞋankai mu afada.
21 Kadanshi ka na a kufuɗa a̱ tuka̱ a̱ ubuta̱ wa afada u nam pa ke te kaꞋa,
ana n yaꞋin lo a̱ ubuta̱ wa,
n danai,
‘I tuka̱ mu ta̱ a̱ ubuta̱ wa afada adama a na mu ushuku ta̱ n ukpa̱ n kuɗenga̱ ku wuma.’ ”
22 Amma gogo na,
Gomuna Filiku u yeve ta̱ Uye u Vuzagbayin n a̱bunda̱i,
ɗa u shamkpai le.
U danai,
“Sai ayin a na Kovonshi Lisiya u yawai,
ka̱ta̱ n yeve kukiɗaka yi afada.”
23 Ɗa u zuwai jagaba vo osoji wi inda yi,
amma ka̱ta̱ u zuwa yi a̱ kunu ku ugbashi ba,
ka̱ta̱ kpamu u sa̱nga̱ a̱ja̱Ꞌa̱ a̱ ni a bana e ene yi ba.
Bulusu u yaꞋin kadanshi n Filiku
24 Ana ayin e re a lazai,
ɗa Filiku va u yawai n vuka vi ni.
Kula ku ni ku ɗa Durusila,
a̱yi Kayahuda kaꞋa.
Ɗa a̱ suki vuza yoku u ta̱wa̱ m Bulusu,
ɗa a panakai ni kadanshi ka na u danai adama e uneki u ka̱ɗu n Yesu Kishi.
25 Ɗa Bulusu u yaꞋankai ni kadanshi uteku u na o kuyongo n usuɓi,
uteku u na kpamu a̱ kuka̱na̱ ka̱ci ke le,
n afada a na a̱ kuta̱wa̱.
Adama a nannai,
ɗa Filiku u panai wovon n a̱bunda̱i.
Ɗa u danai Bulusu,
“U yawa ta̱.
Ka̱sa̱kpa̱ nannai,
vi ta̱ a kufuɗa va laza biꞋi,
n ciya̱ baci ayin mi ta̱ e kuɗeke wu kpamu.”
26 Ayin n a̱bunda̱i,
Filiku u suku ta̱ ka̱ta̱ a bana e ɗeke Bulusu,
adama a na u yaꞋan kadanshi n a̱yi.
Adama a na wi ta̱ a kinda ko Bulusu wi ta̱ e kuneke yi ikebe adama a na u ka̱sa̱kpa̱ yi.
27 Ana a̱ya̱ e re a lazai,
ɗa a̱ suki Filiku a̱ ubuta̱ u yoku.
Ɗaɗa vuma vi yoku u lyaꞋi tsugomuna,
a̱yi ɗa Poruku Fesata.
Adama a na a̱yi wi ta̱ a kuciga u ciya̱ ucigi a̱ ubuta̱ wa Ayahuda,
ɗa Filiku u zuwai Bulusu u yongo a̱ kunu ku ugbashi.