A̱ ka̱na̱i Biturusu n Yahaya
4
Ayin a na Biturusu n Yahaya ele biꞋi a kuyaꞋanka uma kadanshi,
ɗa anan ganu o yoku,
n jagaba va indi a̱ A̱Ꞌisa̱ a Gbayin,
n A̱sa̱dukiyaa a banai we le.
2 A̱ɗu e le a̱ na̱mgba̱ ta̱ adama a na azusuki e re a nan lo i ta̱ a kupiꞋisaka uma a na Yesu u ɗenga̱i n wuma a kasaun,
ta kpamu a̱kpisa̱ a̱ kuɗenga̱ n wuma nannai.
3 A̱ ka̱na̱ ta̱ Yahaya m Biturusu n kulivi adama a nannai,
ali ɗa a zuwai le a ugbashi ali a kubana usana.
4 Uma n a̱bunda̱i a na a panai kadanshi ke le ɗa e nekei a̱ɗu,
ali ɗa aza o Kutoni a yimkpai a kubana ɗevu n a̱kpa̱n a tawun (5,000),
ali biꞋi ta na endeꞋen e kece a̱ma̱ci m muku ba.
5 A kanna ke ire,
aza o tsugono,
nu nkoshi,
nu nlum n Wila̱ a banai a gasai a Urishelima.
6 Hanana mogono ma anan ganu wi ta̱ ɗe koɓolo n aza o yoku a kpaꞋa ku ni.
Ele ɗa Kayafa,
n Yahaya,
n Isakandari,
n aza o yoku.
7 A zuwai Biturusu n Yahaya e kelime ke le,
ɗa a yaꞋankai le keci a danai,
“N utsura u yayi ko n kula ku yayi i yaꞋin ili i nam pa?”
8 Ɗa Biturusu u shanai n Ayinviki a̱ Ka̱shile ɗa ta na u danai,
“Nkoshi n aza e kelime a uma dem,
9 ye ece tsu ta̱ adama a ili i singai i na ci yaꞋankai ma̱kutsuma̱ ma?
I ciga ta̱ i yeve tsu na u ciya̱i upoci?
10 Yevei ili i nam pa,
a̱ɗa̱ n uma a Israila dem:
Vuma vu nam pa va u potso ta̱ adama a kula ku Yesu vu Nazara,
vuza na yu unai a maɗanga ma atakaci ɗa Ka̱shile ka̱ ɗengusa̱i ni n wuma.
11 Yesu va a̱yi ɗa vuza na kadanshi ka̱ Ka̱shile ka danai,
‘Kenene ka katali ka na amaꞋi a iwain,
ka ɗa ko bonoi kenene ke mere.’◊
12 “Wishi wi lo kuciya̱ a̱ ubuta̱ u yoku ba,
adama a na gaɗi n iɗika dem kula ku yoku ki lo ku na uma a̱ kuciya̱ wishi ba.”
13 Ana e enei uteku u na Biturusu n Yahaya a dansai Arabali a Singai n utsura,
ɗa a yaꞋin mereve adama a na uma dem e yeve an Biturusu n Yahaya uma a makara ɗa ba.
Ɗa kpamu a zuwakai an a saꞋwa ta̱ kuyongo n Yesu.
14 Amma ana i lo e kene vuma vu na o potsokpoi kashani lo koɓolo n ele,
babu kpamu ili i na a kudana.
15 A ayin a nan lo a danai le a̱ uta̱ punu a̱ ubuta̱ wa afada biꞋi.
Ɗa a lyaꞋi kelime n kadanshi uteku u le.
16 E ecei nahannai,
“Nini ɗai tsa kuyaꞋan n uma a nam pa?
Yaba dem a Urishelima u yeve ta̱ a na a yaꞋin ili i mereve ci kpamu a kunana i ɗa ba.
17 Amma uye u na tsa̱ kusa̱nka̱ ukuna u nam pa kuꞋuwa a atsuvu a uma,
sai tsu sa̱nka̱ le kuyaꞋanka uma kadanshi n kula ku Yesu.”
18 Ɗaɗa e ɗekei le punu asuvu kpamu,
ɗa a danai le ka̱ta̱ o doku a yaꞋan kadanshi ko kuyotsongu n kula ku Yesu ba.
19 Amma Biturusu n Yahaya a̱ ushuki,
“YaꞋankai ka̱ci ka̱ ɗa̱ afada,
ko u gaꞋan ta̱ tsu tono a̱ɗa̱ ko Ka̱shile?
20 Wi a kuyaꞋan wa̱ tsu ba,
tsu kpa̱ɗa̱ kudansa ili i na tsu panai ɗa ce enei ba.”
21 Uma n a̱bunda̱i a̱ ka̱na̱ ta̱ kucikpa Ka̱shile adama a ili i na a yaꞋin.
Adama nannai ɗa a ɓarangi le,
ɗa a̱ ka̱sa̱kpa̱i le,
adama a na a̱ ciya̱ unushi u na e kuneke le atakaci ba.
22 Vuma vu na o potsokpoi m mereve ma,
u laꞋa ta̱ a̱ya̱ amangere ana a matsai ni nu mɓa̱la̱ n nan lo.
Kavasa ka aza o Kutoni
23 Ana a̱ ka̱sa̱kpa̱i le,
Biturusu n Yahaya a banai a danai uma e le ili i na anan ganu vu gbagbaꞋin nu nkoshi n danai le.
24 Ana a panai nannai,
ɗaɗa o ɓolongi ɗa a yaꞋin kavasa u Ka̱shile n utsura.
Ɗa a̱ ɗengusa̱i a̱la̱ka̱tsu e le a danai,
“Vuzavaguɗu MalaꞋimili,
avu ɗa vi yaꞋin gaɗi n iɗika m mala n ili i na yi punu dem.
25 Dawuda ɗa kagbashi ka̱ nu n esheku a̱ tsu kpamu.
Vu zuwai ni u yaꞋin kadanshi n utsura wa Ayinviki a̱ Ka̱shile,
u danai:
‘Yi ɗa̱i ɗa aza a iɗika kakau o ci yongo a wupa?
Ɗa kpamu uma o ci yongo e kusheshe ku gbani?
26 Ngono mi iɗika o foɓusoi ka̱ci ke le adama o kuvon,
aza e kelime a yaꞋin oɓolo adama a na a̱ shilika̱ n Vuzavaguɗu n Kishi ka̱ ni.’◊
27 “Mayun ɗa,
Hiridu m Binutu Bilatu a yaꞋan ta̱ oɓolo punu a̱ likuci koɓolo n Aza̱ka̱yimbi n uma a Israila adama a kadanshi ke Yesu kagbashi ka ciɗa ka̱ nu vuza na vu zuwai u yaꞋan Kishi.
28 Adama a utsura u nu,
a yaꞋan ta̱ ili i nam pa uteku u na vi sheshei n ayin a cau.
29 Vuzavaguɗu,
indana maza ma na a zuwakai tsu.
A̱tsu agbashi a̱ nu a ɗa.
Ɓa̱nka̱ tsu ci yaꞋan kadanshi ka̱ nu babu wovon.
30 Ba̱ra̱kpa̱ kukiye ku nu vu potsokpo uma,
ka̱ta̱ vi yaꞋan ili i mereve n kula ku kagbashi ka ciɗa ka̱ nu Yesu.”
31 Ana a yaꞋin kavasa,
a̱ ubuta̱ u na i a kuyaꞋan oɓolo a ɗa u gba̱ɗa̱i ɗa ra̱ka̱ vi le a shanai n Ayinviki a̱ Ka̱shile.
Ɗa a dansai kadanshi ka̱ Ka̱shile babu wovon.
Aza o Kutoni e pece ucanuku u le
32 Aza o Kutoni gbende ɗa o ɓolongi a̱ɗu e le a̱ ubuta̱ u te.
Babu vuza na u danai wi ta̱ n ili i ka̱ci ka̱ ni,
amma e tsu pece ta̱ ra̱ka̱ ili i na i n i ɗa e mere me le.
33 N utsura u Ka̱shile,
azusuki a lyaꞋi kelime n kudansa kadanshi ku uɗengi u Vuzagbayin Yesu,
ɗa kpamu kasingai ka̱ Ka̱shile ko yongoi koɓolo n ele.
34 Babu vuza na wi n unambi wi ili a̱ ka̱tsuma̱ ke le.
Adama a na aza a ashina ko iꞋuwa i ta̱ e kudenge,
ka̱ta̱ a banka n ikebe ya.
35 Ɗa e nekei i ɗa wa azusuki,
ɗaɗa e pecekei i ɗa yaba dem vu na wi n unambi.