Kucipa̱ ka Ayinviki a̱ Ka̱shile
2
Ana kanna ka̱ Ka̱ɗiva̱ ka Amangerenkupaa ka yawai,
ele aza o Kutoni a ida̱shi a̱ ubuta̱ u te.
2 Gogo lo,
ɗa a panai izumgbi i yoku yu uta̱i gaɗi vu Ka̱shile an wunla̱i u gbayin ɗa ta na u shatangi kpaꞋa ka ra̱ka̱ ele ida̱shi punu.
3 Ɗa e enei ili i yoku an elentsu ma akina a̱ kucipa̱ we le,
ɗa i yikpa̱i i yongoi a aci e le.
4 Ɗaɗa a shanai n Ayinviki a̱ Ka̱shile,
ɗa a̱ ka̱na̱i kuyaꞋan kadanshi n elentsu a uma o yoku a na Ayinviki a̱ Ka̱shile a o yotsongi le.
5 A ayin a nan lo a ta na,
Ayahuda a na a̱ uta̱i a̱ ubuta̱ kakau i o kutono Ka̱shile,
ɗa a̱ da̱sa̱ngi ɗe a Urishelima.
6 Ana uma a nam pa a panai izumgbi i wunla̱i ya,
ɗa o ɓolongi a̱ ubuta̱ u te.
Ɗa ra̱ka̱ vi le a dagazai ɗa a̱ ka̱na̱i mereve,
adama a na a panai aza o Kutoni a a kuyaꞋan kadanshi n elentsu a̱ likuci i le.
7 Ɗa a yaꞋin mereve ka̱u ɗa a danai,
“Ashe aza a kadanshi a aza a̱ Ga̱lili a ɗa ba?
8 Nini ɗai ci a kupanaka le a kudansa n elentsu a̱ tsu?
9 Aza o yoku a̱ tsu aza a Paratiya,
n aza a Madaya a ɗa.
Aza o yoku kpamu aza e Elam,
n uma a Bagadaza,
n Yahuda a ɗa.
Aza o yoku kpamu aza a uɓon u Kafadakiya,
m Pontu,
n Asiya a ɗa.
10 Aza o yoku aza a Firijiya koɓolo m Bamafila,
m Masar,
n uɓon u Libiya ɗevu n Kure,
ali n omoci a uɓon u Roma dem.
11 Aza o yoku aza a Karita n aza a Alaraba.
A̱ ka̱tsuma̱ ka̱ tsu aza o yoku a matsa tsu ta̱ Ayahuda,
aza o yoku a zagbai kutoni ka Ayahuda.
Tsu panaka le ta̱ a kudansa ili i mereve i Ka̱shile n elentsu a̱ tsu.”
12 Ra̱ka̱ vi le ɗa a yaꞋin mereve,
ɗa a dagazai a̱ ka̱na̱i mecenshenei,
“Yi ɗa̱i nannai?”
13 Amma ɗa aza o yoku o zoꞋosoi le,
a danai,
“Ma̱ra̱ maꞋa o soꞋi.
Yi ɗa̱i i zuwai ɗa yi e mereve me le?”
Biturusu u danai uma a kadanshi ka̱ Ka̱shile
14 Ɗa Biturusu u ɗenga̱i kashani n azusuki kupa n vuza te.
Ɗa u ɗengusa̱i ka̱la̱ka̱tsu ka̱ ni ka̱u,
ɗa u yaꞋankai le kadanshi,
u danai,
“Aza a̱ va̱,
Ayahuda n aza a na i ida̱shi a Urishelima,
panai i doku i zuwa atsuvu n ili i na mi o kudoku ma dana ɗa̱.
15 Uma a nam pa a ma̱ra̱ maꞋa o soꞋi,
ɗa ma makai le ba,
tsu na yi a kudansa.
Tsu na ci a kadanshi gogo na viyum vu kuci vu usana ɗa na biꞋi.
16 Ili i na ye kene na va,
ta keneki Juwelyu u danai nannai:
17 ‘Ka̱shile ka danai:
A kubana ayin a uteku:
Mi ta̱ e kuneke uma dem Ayinviki a̱ va̱.
Muku n ali m muku mi nkere n ɗa̱ i ta̱ o kokpo eneki.
Olobo a̱ ɗa̱ i ta̱ e kene ili tsalatani.
Nkoshi n ɗa̱ kpamu i ta̱ e kene ili ya alatani.
18 A ayin a nan lo,
mi ta̱ e kuneke agbashi a̱ va̱ ali n a̱ma̱ci Ayinviki a̱ va̱.
Ele i ta̱ a kudana uma kadanshi ka̱ va̱.
19 Mi ta̱ a kuzuwa ili i mereve gaɗi ve eleshu n ili yi iyoci kpamu a aduniyan a nam pa.
I ta̱ o kokpo ana mpasa n tsa akina n ka̱nga̱ da̱n.
20 Kanna ki ta̱ a̱ kulima̱na̱,
wotoi wi ta̱ o kokpo ushili ana mpasa,
kafu kanna ka tsugbayin tsu Vuzavaguɗu ka yawa.
21 A ayin a nan lo uma a na i e kuɗeke kula ku Vuzavaguɗu dem
i ta̱ a̱ kuciya̱ wishi.’◊
22 “Gogo na a̱ɗa̱ uma a Israila,
panai ili i na n kudana ɗa̱ adama e Yesu vu Nazara vu na Ka̱shile ka̱ suꞋuki ɗa̱.
Ka̱shile ko yotsongu ta̱ Yesu mayun ɗa.
I ɗa i zuwai ɗa Yesu u yaꞋin ili i mereve i na a̱ɗa̱ dem i yevei.
23 E neke ɗa̱ ta̱ Yesu,
amma ɗa a̱ɗa̱ yu unai ni,
i bapai ni gaɗi a maɗanga ma atakaci,
ɗa i kutangi ni ikusa.
I yaꞋan ta̱ nannai n aza a gbani-gbani a na a̱ ɓa̱nka̱i ɗa̱.
Ka̱shile a̱ ka̱ci ka̱ ni u yeve ta̱ ili i nam pa i kuyaꞋan ta̱ ali n ayin ugiti,
ɗa kpamu u zuwai i ɗa i yaꞋan nannai.
24 Ta ta na nannai Ka̱shile ka̱ ɗengusa̱i Yesu a kasaun.
Ka̱shile ka̱ ka̱sa̱kpa̱ yi u soꞋo atakaci a̱ ukpa̱ ba.
Ukpa̱ u fuɗa u ciya̱ utsura a kaci ka̱ ni ba.
25 Ili i na Mogono Dawuda u yaꞋin kadanshi adama a̱ ni:
‘N ce ene ta̱ Vuzavaguɗu ɗevu nu mpa ayin tutu.
Mi a kupana wovon ba,
adama a na wi ta̱ ɗevu nu mpa.
Wi ta̱ e kukiye ku usingai ku va̱.
26 Adama a nannai,
ka̱ɗu ka̱ va̱ ka shana ta̱ m ma̱za̱nga̱,
una̱ u va̱ kpamu wi ta̱ o korukpo adama a kucikpa yi.
Ikyamba i va̱ yi ta̱ a̱ kuyongo n a̱pa̱Ꞌa̱ wa̱ ni.
27 Avu Ka̱shile ka̱ va̱,
vi a̱ kuka̱sa̱kpa̱ ikyamba i va̱ a kasaun ba.
Vi a̱ kuka̱sa̱kpa̱ ikyamba i Vuza vu Ciɗa vu nu i shama ba.
28 Vi yotsongu mu ta̱ uye u wuma,
vi neke mu ta̱ ma̱za̱nga̱ a ayin a na vi nu mpa.’◊
29 “Aza a̱ va̱,
u gaꞋan ta̱ n yaꞋan kadanshi adama a akaya a̱ tsu Mogono Dawuda.
A̱yi u kuwa̱ ta̱,
ɗa a̱ ciɗa̱ngi ni a kasaun.
Kasaun ka̱ ni kpamu ki ta̱ na koɓolo n a̱tsu,
ali a̱ kuta̱wa̱ anana.
30 Dawuda keneki kaꞋa,
u yeve ta̱ Ka̱shile ka yaꞋan ta̱ ɗe uzuwakpani u kuzuwa ta̱ vuza yoku punu a̱ ka̱tsuma̱ ka ntsukaya n ni wo okpo mogono uteku u na wi ishi.
31 A̱yi Dawuda we ene ta̱ ili i nam pa a ayin a na u yaꞋin kadanshi ka̱ kuɗenga̱ ku Kirisiti Kishi a kasaun,
u yaꞋin kadanshi ka nam pa:
‘A cinukpa n a̱yi a kasaun ba.
Ikyamba i ni kpamu i shama a kasaun ka ba.’
32 “Ka̱shile ka̱ ɗengusa̱ ta̱ Yesu n wuma,
a̱tsu feu ce ene ta̱.
33 “Ɗa u zuwai ni e kukiye ku usingai ku ni,
ɗa wi isai Ayinviki a̱ Ka̱shile a Ciɗa a̱ ni,
uteku u na u yaꞋankai ni uzuwakpani.
Ɗa Yesu u tsuwa̱in Ayinviki a̱ Ka̱shile a̱ ni,
a na yi a kupana n kene.
34 Dawuda ɗa u kumbai gaɗi a̱ Ka̱shile ba,
amma a̱yi ɗa u danai,
‘Vuzavaguɗu u danai Vuzagbayin vu va̱,
“Da̱sa̱ngu e kukiye ku usingai ku va̱,
35 sai ayin a na m bonokoi irala i nu ɗaka va ataka e ene a̱ nu.” ’◊
36 “Adama a nannai,
yaꞋan aza a Israila ra̱ka̱ i yeve mayun,
a na Yesu vu na i bapai a maɗanga ma atakaci,
Ka̱shile ka zuwa yi ta̱ wo okpo Vuzagbayin n Kishi.”
37 Ana a panai nannai,
ɗa asuvu e le a̱ na̱mgba̱i.
Ɗa e ecei Biturusu n azusuki a na a buwai,
“Aza a̱ tsu yi ɗa̱i tsa kuyaꞋan?”
38 Ɗa Biturusu u danai le,
“Ra̱ka̱ vu ɗa̱ shika̱i unushi u ɗa̱,
ka̱ta̱ a yaꞋanka ɗa̱ kusumbu ka akucina n kula ku Kirisiti Kishi,
adama a na a cinukpaka ɗa̱ unushi.
Yi ta̱ a̱ kuciya̱ kuneꞋe ka Ayinviki a̱ Ka̱shile.
39 Uzuwakpani wa adama a̱ ɗa̱ a ɗa,
m muku n ɗa̱,
n aza a na i daꞋin,
n aza a na Ka̱shile ke ɗekei dem.”
40 Ɗa Biturusu u doku u danai le ili n a̱bunda̱i.
Ɗa u folonoi le,
u danai,
“Isai ka̱ci ka̱ ɗa̱ adama a wupa u Ka̱shile u na wi lo a̱ kuta̱wa̱ adama a uma a gbani-gbani a ayin a nam pa.”
41 A kanna ka nan lo uma a na a isai kadanshi a yawa ta̱ ɗevu n a̱kpa̱n a tatsu (3,000),
ali ɗa ta na a yaꞋankai le kusumbu ka akucina.
Uteku u na aza o Kutoni a o yongoi
42 Ɗa aza o Kutoni a o ɓolongi ka̱ci ke le n a piꞋisai a̱ ubuta̱ wa azusuki.
Ɗa a̱ ka̱na̱i kuyongo a̱ ubuta̱ u te,
n a̱ ɓa̱mkpa̱na̱i,
n a lyaꞋi ilikulyaꞋa koɓolo,
n a yaꞋin avasa.
43 Uma n a̱bunda̱i ɗa a̱ ka̱na̱i mereve ana e enei azusuki a a̱ ka̱na̱i kuyaꞋan ili i mereve n i na a̱ kpa̱ɗa̱i kuyeve.
44 Aza o Kutoni a tsu gasa ta̱ ayin tutu,
a ciga ta̱ kupece uteku u le ili i na i n i ɗa.
45 E ci denge ta̱ ili i na i n i ɗa e pecuku uteku u na uma i n unambi.
46 A ci yaꞋan ta̱ avasa koɓolo a̱ A̱Ꞌisa̱ a Gbayin kanna dem.
A tsu gasa ta̱ kpamu kpaꞋa kpaꞋa,
adama a na a lyaꞋa ilikulyaꞋa m ma̱za̱nga̱ ba̱ri.
47 Ayin dem o ci yongo ta̱ a kucikpa Ka̱shile,
ɗa uma kpamu a̱ ka̱na̱i kuneke le tsugbayin.
Kanna dem Ka̱shile ki ta̱ o kudoku ka̱bunda̱i ke le,
n aza a na i a̱ kuciya̱ wishi.