Allempo orrta Juan ñeñt̃ serrpareʼtosets all amayo
3
1 Ñehua,
allempo c̈hap allempoch am̃chaʼtaret̃ta ñam̃a ñeñt̃ paʼsoʼcheñ Tiberio all Romo.
Allempo c̈hap oʼ am̃chaʼtaret̃ta c̈harraʼ puechena amnar char allempoña Judeopaʼ añ am̃chaʼtaret̃tatsa ñam̃a Poncio Pilato.
Galileoñapaʼ añ am̃chaʼtaret̃tatsa Herodes.
Paʼmoʼnasheñña Felipepaʼ ñapaʼ epa anetsocop am̃chaʼtaret̃ta,
ñeñt̃paʼ arr am̃chaʼtaret̃ta Iturea ñam̃a Traconite.
Lisaniasñapaʼ arr am̃chaʼtaret̃ta Abilinio.
2 Ñehua,
allempopaʼ judioneshaʼ añ poʼcorneshar penet Anás ñam̃a Caifás,
ñeñt̃ poʼcorneshar pen ora allohuen cornaneshac̈hno.
Eʼñe ñeñt̃e chararocma am̃chaʼtaret̃etyenet allemeñ anetsoʼmar eʼñe allempocma Yomporpaʼ eñoranaʼtana ñam̃a Juan ñeñt̃ Zacarías puechemer ñeñt̃ amayoʼtsen.
3 Ñeñt̃oʼmarña Juan allempopaʼ oʼ chopeñeʼchyes erracmañen Jordanasoʼmar,
all serrpareʼtyesnom.
Ñeñt̃paʼ atet̃ otyesnomanet:
—T̃eʼpaʼ oʼch soct̃apeʼcherr eʼñe ello cohuen Yomporecop att̃och Yomporpaʼ oʼch peretnerrnas allohuen soʼchñar,
allochñapaʼ oʼch sapataret̃terra Yomporecop.
4 Ñeñt̃paʼ añ serrpareʼtatosanet att̃och etsoterra ñoñets ñeñt̃ anaret̃ ñeñt̃ atet̃ eñoseʼt̃ ahuat̃ Isaías ñeñt̃ aʼm̃tayeʼt̃ Yompor poʼñoñ.
Ñeñt̃ Isaías poʼñoñ ñeñt̃paʼ atet̃ oten:
Eʼmorrterrach puesheñarr poʼñoñ all amayo allchaʼña serrpareʼtaterranña acheñeneshaʼ.
Puerranarot̃paʼ añchaʼ tomaʼntaterranet t̃oñ,
ñeñt̃paʼ atet̃chaʼ oterranet:
“T̃eʼpaʼ oʼch saʼcohuenetyes t̃oñ allchaʼ oñmos Partseshaʼ,
oʼch eʼñe saʼpac̈harretyesoñ paʼt̃ep̃.
5 All rrapatseʼtyen patspaʼ oʼch eʼñe saʼmuepñetyes,
all pocmoʼyaretyenapaʼ oʼch eʼñe saʼmuepñetuahue,
all terepeʼp̃arretyenapaʼ oʼch eʼñe saʼpac̈harretyes,
all arrorot̃etyena t̃oñpaʼ oʼch eʼñe sepampaʼhuahue.
6 Allempoña allohuen acheñeneshaʼpaʼ enteretchaʼ ñeñt̃ oʼ mueñerrnay Yompor ñeñt̃chaʼ yaʼqueshp̃aterreʼ.”
Arrpaʼ allohua ñeñt̃ atet̃ aquellcaret̃ ahuat̃ot̃eñ Cristocop.
7 Allempoñapaʼ shonteʼ acheñeneshaʼ huac̈haʼtet Juanesho.
Ñetpaʼ t̃arroʼmar huac̈henet añ muenenet oʼch apatapanet Juan Yomporecop.
Juanña serrpareʼtatapanetpaʼ otapanet:
—Sapaʼ ama cohuenayayso atarr ashcarñat̃es,
c̈ha sottena ñerraʼmrrat̃eʼ shechp̃a sompor sepen.
Poʼñoc̈hcaʼ ama eseshayeʼ sotenaye eʼñech sapataret̃teñot̃a oʼch sequeshperra allochñapaʼ amach coñchatuerrso Yompor allempoch yoroc̈htatuer tsapat̃onet̃.
8 Napaʼ añchaʼña notapas oʼch sorrtatyes ñeñt̃ eʼñe cohuen enten Yompor ñeñt̃ atet̃ pena ñeñt̃ poʼñoc̈h oʼ cot̃apeʼcherran ello cohuen Yomporecop.
Sapaʼ c̈ha soteneñ seyoc̈hro añoʼ es sepallteno sapaʼ añoʼ eʼñe seyemtena satañ Abraham.
T̃arraña napaʼ oʼch notas amach atet̃ soct̃apeʼchatsto t̃arroʼmar ñeñt̃paʼ ama esoyeʼ enteñe Yompor.
T̃arroʼmar oʼch notas ñerraʼm Yompor muenetseñ amaʼt añ mapueʼ ñeñt̃ senten arr oʼch aʼpnasereñ Abraham poʼm̃reneñ.
9 Ñeñt̃oʼmarña napaʼ oʼch notas ñerraʼm amach soct̃apeʼcherro cohuen Yomporecop oʼ mamesham̃a oʼch c̈haponasa att̃och coñchaterres Yompor.
Oʼch netmaʼntatasa atet̃ ñerraʼmrrat̃eʼ allempo oʼch aʼmatamochet tsach.
Oʼ eʼñe onañchachet gach allchaʼ tet eʼñe allohua huañen puepallactar.
Ñeñt̃ allohuen tsachec̈hno ñeñt̃ ama cohuenayeʼ meʼtetsopaʼ aʼmataʼtueretchaʼ saprrochetchaʼ all huorten tsoʼ allchaʼ eʼñe aʼpoyatatueret.
10 Allempoña acheñeneshaʼpaʼ aʼp̃t̃oʼtyeset Juan,
ochet:
—Ñehua,
¿esoʼtña poctetsaña yocop att̃och eʼñe yorrtatyes ñeñt̃ cohuentetsa Yomporecop?
11 Ñañapaʼ anapanetpaʼ otanet:
—Ñerraʼm eseshas echeneʼ epma seshtam oʼch sap̃ ñeñt̃ ama echenaye ñeñt̃chaʼ chorrena.
Ñam̃a ñerraʼm eseshas echeneʼ serrar oʼch sap̃ ñeñt̃ ama echenaye ñeñt̃chaʼ rrenet.
12 Allempoña huac̈haʼta ñam̃a acheñeneshaʼ ñeñt̃ poʼtaruas peneʼ att̃o cobrenan acheñeneshaʼ quelle ñeñt̃ gobiernocop.
Ñetpaʼc̈hoʼña añecop huenet Juanesho oʼch apataret̃tet Yomporecop.
Ñetpaʼc̈hoʼña oʼ aʼp̃t̃oʼtoset Juan,
atet̃ otoset:
—Yocop Nomporchaʼ ¿esoʼtña poctetsa att̃och yorrtatyes yam̃a ñeñt̃ cohuentetsa Yomporecop?
13 Ñañapaʼ anapanetpaʼ atet̃ otanet:
—Ñeñt̃ allpon quelle ñeñt̃ eʼñe allpona enamuen gobiernopaʼ eʼñech allpona secobreñña acheñeneshaʼ,
amachña alloʼna atarr aton secobraʼneñe acheñeneshaʼ quelle ñeñt̃ eʼñech socpaʼna.
14 Allempoña patantarr guardianeshaʼ ñeñt̃ alloʼtsaʼyenpaʼ aʼp̃t̃oʼtoset ñamet,
ñetpaʼ atet̃ otet:
—Yocoppaʼc̈hoʼña ¿esoʼtña poctetsa ñeñt̃chaʼ att̃och yorrtatyes yam̃a ñeñt̃ cohuentetsa Yomporecop?
Ñaña anapanetpaʼ atet̃ otanet:
—Sapaʼ amach es seprratam̃p̃satsche acheñeneshaʼ eʼñe seʼmueñocma ñam̃a saʼmet̃am̃peñot̃ eʼñe seshquëñot̃paʼc̈hoʼña amach es seprratam̃p̃satsto eʼñe att̃ot̃a.
Ñam̃a ñeñt̃ allpon tsaʼtenset gobierneshot̃paʼ eʼñepaʼchña ñeñt̃a cohuen socshena.
15 Acheñeneshaʼñapaʼ att̃a cohueñet,
pueyoc̈hretoñapaʼ att̃a cot̃apeʼchyenet c̈ha otenapuetañ Juanpaʼ ñeñt̃t̃eʼña Cristotets ñeñt̃ cohuenet ahuat̃ot̃eñ ñeñt̃chaʼ mueñerranet Yompor.
16 Juanñapaʼ atet̃ otanet:
—Napaʼ ama añeyayno ñeñt̃ Cristotets,
t̃arroʼmar napaʼ amaʼt napatensoñ Yomporecop eʼñe oñochaya napatenes.
T̃arraña Cristo ñeñt̃chaʼ huapatsa chentaʼpaʼ ñapaʼ añchaʼña chorratossa Parets Puecamquëñ ñeñt̃ atet̃ ñerraʼm tsoʼ.
Ñapaʼ ñeñt̃ atarr ahuamencat̃eshaʼ,
nañapaʼ ama tama ahuamencat̃eyayno.
Ñapaʼ ñeñt̃ña atarr sherbets,
nañapaʼ ama es nesherbeno att̃och amaʼt poʼsapatrec̈hapaʼ oʼch nepyoñ.a
17 Ñapaʼ atarr ahuamencat̃,
ñapaʼ ñach acrerreʼ allohuen acheñeneshaʼ.
Ñapaʼ añ tomaʼntena ñeñt̃ orreneʼ pueshoshnat alloch shoshnan poʼtrigo oʼch eʼñe pueʼllom̃rochayam̃a.
Ñeñt̃ña pueʼllomerpaʼ oʼch aʼyapac̈heʼ oʼch aññoʼch allecma aññoʼteñ eʼñe cohuen.
Pueʼsheʼmarñapaʼ oʼch huaporeʼch tso allchaʼ eʼñe poyhua.
Ñeñt̃ña tsoʼpaʼ ama emayaʼpahuo amaʼt errponaña.
18 Juanña allpaʼ atet̃ serrpareʼtatyenanet cohuen ñoñets ñeñt̃ huetsa Yomporeshot̃ alloch yequeshperra.
Ellonet̃ñapaʼ shonteʼ paʼnamen serrpareʼtatan acheñeneshaʼ ñeñt̃ ama pocteyeʼ enteno Yompor.
Allempo apataret̃ta Jesús Yomporecop
19-22 Allempoña oʼ atarr apataret̃ta shonteʼ acheñeneshaʼ Yomporecoppaʼ c̈ho apataret̃tatsa ñam̃a Jesús.
Eʼñe apataret̃etuatsapaʼ oʼ maʼyocha.
Allempoña maʼyochenapaʼ enetñapaʼ ahuepaʼt atoraret̃ta.
Allot̃ña eʼñe sohuaʼnma Parets Puecamquëñ eʼñe atet̃ entapet ñerraʼmrrat̃eʼ yep̃ oʼ sohuaʼnma entot̃.
Eʼñe arr c̈hap Jesúsesho.
C̈ha eʼmorrtatsa ñoñets entot̃ atet̃ eñorena Yompor.
Ñeñt̃ña ñoñetspaʼ atet̃ oten:
—P̃apaʼ ñeñt̃ep̃ Nechemerep̃ ñeñt̃ep̃ atarr nemorrentena,
p̃a atarr nanac nocshateneʼ.
Allempoña am̃chaʼtaret̃ Herodespaʼ oʼ yottam̃p̃satan Juan t̃arroʼmar Juanpaʼ eñotach ama pocteyeʼ enteñe ñeñt̃ atet̃ p̃atseʼtyena.
Amaʼt paʼmoʼnasheñ Felipe puet̃aporpaʼ oʼ yoram̃per.
Amaʼt shonteʼ paʼnamen ñeñt̃ atet̃ p̃atseʼtyena Herodespaʼ elloñapaʼ oʼc̈hoʼ yottam̃p̃saterranerr ñam̃a Juan.
Arrpaʼ all aquellcaret̃ allohuen paʼsoʼchñec̈hno ñeñt̃ paʼtañneshañ pen Jesús
23 Ñehua,
Jesúspaʼ allempo orrta oʼ t̃orraʼmochana ñeñt̃ poʼtaruas pen Pomporecop,
allempoña poʼcharñapaʼ ñatoʼ oʼt̃eʼ c̈hap maʼpoch c̈harraʼ char.
Acheñeneshaʼñapaʼ aña pompor p̃ateñet ñeñt̃ José.
Ñehua,
Josépaʼ Elí puechemer,
24 Elípaʼ Matat puechemer,
Matatpaʼ Leví puechemer,
Levípaʼ Melqui puechemer,
Melquipaʼ Jana puechemer,
Janapaʼ José puechemer,
25 Josépaʼ Matatías puechemer,
Matatíaspaʼ Amós puechemer,
Amóspaʼ Nahum puechemer,
Nahumpaʼ Esli puechemer,
Eslipaʼ Nagai puechemer,
26 Nagaipaʼ Maat puechemer,
Maatpaʼ Matatías puechemer,
Matatíaspaʼ Semei puechemer,
Semeipaʼ José puechemer,
Josépaʼ Judá puechemer.
27 Judápaʼ Joana puechemer,
Joanapaʼ Resa puechemer,
Resapaʼ Zorobabel puechemer,
Zorobabelpaʼ Salatiel puechemer,
Salatielpaʼ Neri puechemer,
28 Neripaʼ Melqui puechemer,
Melquipaʼ Adi puechemer,
Adipaʼ Cosam puechemer,
Cosampaʼ Elmodam puechemer,
Elmodampaʼ Er puechemer,
29 Erpaʼ Josué puechemer,
Josuépaʼ Eliezer puechemer,
Eliezerpaʼ Jorim puechemer,
Jorimpaʼ Matat puechemer,
30 Matatpaʼ Leví puechemer,
Levípaʼ Simeón puechemer,
Simeónpaʼ Judá puechemer,
Judápaʼ José puechemer,
Josépaʼ Jonán puechemer,
Jonánpaʼ Eliaquim puechemer,
31 Eliaquimpaʼ Melea puechemer,
Meleapaʼ Mainán puechemer,
Mainánpaʼ Matata puechemer,
Matatapaʼ Natán puechemer,
32 Natánpaʼ David puechemer,
Davidpaʼ Isaí puechemer,
Isaípaʼ Obed puechemer,
Obedpaʼ Booz puechemer,
Boozpaʼ Salmón puechemer,
Salmónpaʼ Naasón puechemer,
33 Naasónpaʼ Aminadab puechemer,
Aminadabpaʼ Aram puechemer,
Arampaʼ Esrom puechemer,
Esrompaʼ Fares puechemer,
Farespaʼ Judá puechemer,
34 Judápaʼ Jacob puechemer,
Jacobpaʼ Isaac puechemer,
Isaacpaʼ Abraham puechemer,
Abrahampaʼ Taré puechemer,
Tarépaʼ Nacor puechemer,
35 Nacorpaʼ Serug puechemer,
Serugpaʼ Ragau puechemer,
Ragaupaʼ Peleg puechemer,
Pelegpaʼ Heber puechemer,
Heberpaʼ Sala puechemer,
36 Salapaʼ Cainán puechemer,
Cainánpaʼ Arfaxad puechemer,
Arfaxadpaʼ Sem puechemer,
Sempaʼ Noé puechemer,
Noépaʼ Lamec puechemer,
37 Lamecpaʼ Matusalén puechemer,
Matusalénpaʼ Enoc puechemer,
Enocpaʼ Jared puechemer,
Jaredpaʼ Mahalaleel puechemer,
Mahalaleelpaʼ Cainán puechemer,
38 Cainánpaʼ Enós puechemer,
Enóspaʼ Set puechemer,
Setpaʼ Adán puechemer,
Adánpaʼ Yompor puechemer.