Attho eñotañneshaꞌpaꞌ waxhaꞌtet oꞌch enteñetaꞌ Jesús allempo eñalleta
2
1 Allempo eñalleta Jesús all Beléño,
eꞌñe alla Judeopaꞌ añ amhchaꞌtarethtatseꞌth Herodes.
Oꞌña eñalletwapaꞌ eñotañneshaꞌña waxhaꞌtet alloth wena atsrrethpaꞌ oꞌ xhaxhaꞌtet Jerusaléño.
Visita de los magos (Mateo 2.1-23)
2 Ñetñapaꞌ ateth otyesoset:
—¿Erroꞌtsenaꞌtña ñeñth eñalletatsa ñeñthchaꞌ paꞌmhchaꞌtarether phaꞌ judioneshaꞌ?
Yapaꞌ yeñoteñ oꞌ eñalleta tharroꞌmar yapaꞌ oꞌ yentoñ poꞌrantor alloth wena atsrreth;
yapaꞌ ñeñthekopña yewena oꞌch yekonkorpanaꞌteñaꞌ.
3 Allempoña amhchaꞌtareth Herodes eꞌman ateth ñoñetspaꞌ ñañapaꞌ ñeñtha naꞌ poeyoxhro ama eñmato poeyoxhro.
Allowen jerusaléñoꞌmarneshaꞌpaꞌxhoꞌña ama eseshaꞌ eñmatatseto ñamet poeyoxhreto.
4 Allempoñapaꞌ agotatan amhchaꞌtarethneshaꞌ ñeñthara judioneshet;
oꞌch apxhet allowen kornaneshaꞌ ñeñth atarr sherbhaꞌyets judioneshakop.
Oꞌch apxhet ñamha ñeñth atarr etsotayeneꞌ ñoñets ñeñth ateth anareth judioneshakop.
Allña aꞌphthoꞌtyesanet:
—¿Erraꞌt oteteꞌthña allchaꞌ eñalletaña ñeñthchaꞌ Cristoterrets?
5 Ñetñapaꞌ ateth ochet:
—Arr anetso Beléño allara Judeo tharroꞌmar kellkopaꞌ ateth anwareth,
ateth kellkëꞌth ñeñth aꞌmhtayeꞌth Yompor poꞌñoñ.
Ñeñthpaꞌ Yomporña ateth otatseꞌth:
6 Añ Beléñ ñeñth judanaꞌtarneshaꞌ poꞌpatseñ,
eꞌñe poꞌñoxh ñeñth anetser ñeñth atarr asherben entyeñet allowen ñeñth amhchaꞌtarethetyetsa alloꞌmarneshaꞌ.
Tharroꞌmar all Beléño allchaꞌ eñalleterra ñamha ñeñthchaꞌ atarr amhchaꞌtarethterrtsa ñeñthchaꞌ kowamperreꞌ allowen neyochreshaxhno ñeñthara israelneshaꞌ.
7 Allempoña otwoset atethpaꞌ Herodesñapaꞌ eꞌñe aꞌnawa agotaterran ñamha poꞌpotantañ eñotañneshaꞌ ñeñth xhaxhaꞌtats allempo Jerusaléño.
Allñapaꞌ eꞌñe akopha aꞌphthoꞌtareꞌtyesapanet:
—Rantopaꞌ ¿eꞌñeꞌtña esempotheñña señch ñeñth sorrtoya ñenmath?
8 Allempoña eñotatosetpaꞌ ñañapaꞌ otanet:
—Theꞌpaꞌ oꞌch awes Beléño,
eꞌñech akopha seꞌnyesos ñeñth cheshatholl.
Ñerraꞌm oꞌch señchpaꞌ oꞌch sotwerren allochñapaꞌ napaꞌxhoꞌña oꞌch awen oꞌch nekonkorpanaꞌteñaꞌ namha.
9 Ñetñapaꞌ allempo eꞌmwanmoet ateth otanet amhchaꞌtarethpaꞌ allempoñapaꞌ awanmoet.
Rantoña ñeñth entnenet alloth wena atsrrethpaꞌ taꞌnetsa alleneth senet,
atthothapaꞌ oꞌ xhap eꞌñe alloꞌtsen cheshatholl.
Oꞌña xhap alloꞌtsen cheshathollpaꞌ oꞌ moechechosa eꞌñe alla ento eꞌñe pokto.
10 Allempoña enterreterr rantopaꞌ atarr nanak koshet.
11 Allempoñapaꞌ oꞌ beꞌthososet pokollo,
allña entoset cheshatholl epoet pachor María.
Konkorpanaꞌtosyetpaꞌ maꞌyochosyet.
Torampesyesoset poꞌtsapotpaꞌ aposet eꞌñe attha oro,
aposet tsach poeseꞌ ñeñth atarr eñmosath.
Aposet ñamha eñmosath poerets.
12 Allempoña ñetpaꞌ eñotatanet Yompor poexhopoño allochñapaꞌ atthoch ama oñerreto Herodeseshoꞌmar.
Allempo poerrerret paꞌnyetopaꞌ aña kotherret poꞌpoñ thoñ.
Allempo cheshatholl Jesúspaꞌ anmet Egipto allchaꞌ aꞌkeshphachet
13 Poerraxherrtsetpaꞌ Yomporña poꞌmhllañotheñerpaꞌ alla orrterranerr José poexhopoñoth.
Ñeñthpaꞌ ateth otererr:
—Petantayeꞌcha oꞌch phaꞌyech cheshatholl pachoreꞌna,
orrayeꞌchaph all anetso Egipto allchaꞌ seyxhosa.
Esempowañenñapaꞌ oꞌch alla noterrperr atethchaꞌ pepha.
Herodes poꞌñoxhpaꞌ eꞌnatanchaꞌ añ cheshatholl atthoch moetsatach.
14 Allempoña oꞌ tantapaꞌ anman cheshatholl,
pachoreꞌna yeta tsapo,
awanmoet Egipto.
15 Allñapaꞌ alleneta atthothañapaꞌ oꞌ rromoen Herodes.
Atthoña etsota Yompor poꞌñoñ ateth oteꞌth ñeñth aꞌmhtayeꞌth poꞌñoñ;
ñeñthpaꞌ Yompor ateth otatseꞌth:
“Egiptothchaꞌ nagotater Nechemer.”
Allempo Herodespaꞌ moeñan ñeñthchaꞌ moetsweꞌ allowen asheñorrotholleshaꞌ
16 Ñewa,
allempoña Herodespaꞌ oꞌ eñoch xha shekaꞌnemh eñotañneshaꞌpaꞌ ñañapaꞌ ñeñtha atarr atsrreꞌmateꞌ.
Attho atsrreꞌma nanakpaꞌ allempoñapaꞌ moeñan ñeñthchaꞌ moetsweꞌ allowen asheñorrotholleshaꞌ ñeñth Beléñoꞌtsaꞌyen ñamha ñeñth allowen allampañoꞌtsaꞌyen Beléño.
Allowen asheñorrotholleshaꞌ ñeñth echeneꞌ epa poꞌcharña amaꞌt ñamha allowen ñeñth eñalletyetsa chentaꞌ eꞌñe poktakma moetsanatwet.
Ñewa,
ñeñth ateth eñotatos eñotañneshaꞌpaꞌ ñañapaꞌ ateth kothapeꞌch awoꞌtheꞌ epa char eñalletwaña ñeñth cheshatholler.
17 Atthoña etsota ñeñth ateth oteꞌth Jeremías ñeñth aꞌmhtayeꞌth Yompor poꞌñoñ awath;
ñeñthpaꞌ ateth oteꞌth:
18 Ñeñth anetser Ramopaꞌ atarrchaꞌ eꞌmorrterra yaweñets,
atarr gogatstena;
allpaꞌ Raquelkaꞌye yaꞌnaꞌteneꞌ poechoyoreshaꞌ;
ama moeno oꞌch eseshaꞌ emyaꞌteꞌ tharroꞌmar poechoyoreshaꞌpaꞌ ama eñallmeñe,
oꞌ eꞌñe moetsanatwet.
19 Allempoña rroma Herodespaꞌ Yomporña poꞌmhllañotheñerpaꞌ alla orrterranerr José poexhopoño all Egipto.
20 Allñapaꞌ otererr:
—Theꞌñapaꞌ oꞌch petanterra,
oꞌch alla phaner cheshatholl pachoreꞌna oꞌch alla pepoerrerra israelneshaꞌ paꞌnyo;
oꞌkaꞌye kollaꞌwaña ñeñth oꞌpatayeꞌth añ cheshatholler ñeñthoꞌch moetsayeñ.
21 Ateth otwepaꞌ ñañapaꞌ allentha tantena oꞌ alla anerran cheshatholl pachoreꞌna alla awerret israelneshaꞌ paꞌnyo.
22 Allempo awerretpaꞌ ñetñapaꞌ eꞌmareꞌtweret añ amhchaꞌtarethterrtsa Judeo ñeñth Herodesoñ poechemer ñeñth sochetsa Arquelao.
Ñeñthoꞌmarña mechaꞌtenet serrtset all.
Poexhopoñoñapaꞌ alla eñotatererr ñeñthoꞌmarña allempopaꞌ alla serr Galileo.
23 Xherr Galileopaꞌ awerr patherr anetso ñeñth paꞌsoꞌcheñ Nazaret.
Allñapaꞌ alla yexhaꞌwerra.
Atthothkaꞌyeña etsotaña ñeñth ateth otyeseꞌth ñeñth aꞌmhtaꞌyesayeꞌth Yompor poꞌñoñ;
ñetpaꞌ ateth otyeseteꞌth ñeñthchaꞌ Cristoterretspaꞌ “oteñetchaꞌ nazaretoꞌmarneshaꞌ.”